Kolasib-ah MLA Inthlanpui 2023 campaign-naa hman tur Rate Chart siam

Aizawl | October 4, 2023: Mizoram Legislative Assembly Inthlanpui 2023 lo awm tura candidate-te campaign senso chhutna atana Kolasib District chhunga hman tur thil man bitukna (rate chart) chu vawiin khan Kolasib District Election Officer Pu John LT Sanga hovin Kolasib DC Conference Hall-ah siam fel a ni.

Kolasib DEO Pu John LT Sanga chuan inthlan felfai leh muanawm tak a awm theih nan official-te leh political party-te inkarah te, political party hrang hrang inkarah te thawh hona ṭha a awm a pawimawh a ni, a ti a. Political party-te leh candidate-te chu ECI leh inthlan buaipuitute'n ruahmanna an siam zawm thiam tur leh thianghlim taka inthlan hmachhawn turin a chah a ni.

He hunah hian election official-te, ERO, AERO leh DIPRO te bakah, political party hrang hrang ai awhte an tel a. Inthlan campaign nana bungrua leh thil dang mamawh hrang hrang awm thei turte ngaihtuahin, a man tur awm ang an bithliah a. Hemi zulzui hian candidate-te campaign senso chhut a ni ang.

Election Commission of India (ECI)-in inthlan campaign sensova candidate-te sum hman theih zat a bituk angin, kumin Mizoram MLA Inthlanpui 2023-a candidate pakhatin campaign sensoa sum a hman theih tur zat chu cheng nuai 28 (₹ 28 lakh) a ni.