HMANGAIHNA CHUAN A ENA, A NGAITHLA BAWK

 Hmangaihna Nen Ni 40

By Rick Warren 

— Oct 4, 2023

“Mi zawng zawng chawimawi rawh u. Unauhote chu hmangaih rawh u.” 1 Petera 2:17

Isua anga hmangaihna neih tih awmzia chu Isuan a ngaihlu che ang bawka mi dang  ngaihhlut hi a ni.

Lal fa i ni a. Pathianin a siam che a, Kristan a nun i tan a hlan a ni. Bible in 1 Petera 1:18-19 ah, “In thlahtute pek chhawn, in awm dan engkhaw ni lawi lo lak ata chu, thil chhe thei, tangka leh rangkachaka tlan in ni lo va, beram no hmelhem lo leh bawlhhlawh kai lo thisen anga Krista thisen hlu chuan tlan in ni zawk tih in hre si a. ”

Engtiang chiaha hlu nge i nih? Kraws en ang che. Isua khan i tan thih a huam a. Pathianin a fapa chu i tana hlan a huam a. Chutiang tak chuan i hlu a ni!

Chutianga hlutna chu Isuan mi zawng zawng min pe a - mi i ngainat loh ber thlengin a pe che a ni. Krawsah khan Isuan a ban zau taka pharin, hetiang hian a sawi a, “Ka fa duh tak, heti khawp hian ka hmangaih che a, chutiang chiah chuan mi dang pawh ka hmangaih che anga hmangaih turin ka duh che a, a chhan chu - i tan chauh ni lo vin, midang tan pawha thi ka nih vangin. Ka en ang bawkin mi dang pawh en la. Ka ngaihhlut ang tho vin mi dang pawh ngaihlu ve rawh.”

Thil har a ni lo, Bible  in 1 Peter 2:17 a, “Mi zawng zawng chawimawi rawh u. Unauhote chu hmangaih rawh u,” min ti a ni.

Engtin nge i tih ang? Mi dang zahawm taka i siam dan tur chu, anmahni en la, i rilru pe la, an thusawi ngathla ṭhin rawh.

Ka Bible chang ngainat ber pakhat chu Marka 10:21 a ni. Isua chu kawtthlerah a kal laiin, mi pakhat a lamah a lo tlan a, zawhna a zawt a. Isuan a chhanna chu, “a en a, a hmangaih ta a.” Isuan a en khan a hmangaih ta nghal a ni. Anmahni en lo chuan i hmangaih thei lo vang!

Nitina i mi hmuh ṭhinte han ngaihtuah teh — restaurant a thawkte, dawr nghaktute emaw kawnga hnathawkte emaw pawh. Biak an tum lai che khan, i hawi ṭhin lo va, i lo hmangaih ngai lo va. Hmangaihna chuan a en a, a ngaithla ṭhin.

Hmangaihna nena i en a, an thu i ngaihthlak chuan, an hlutnate i hriatthartir a - chutiang zelin Pathiana an hlutna pawh.

Ngaihtuah zui atan

* Mi dang nena indawrna kawngah hian eng dinhmunah nge i din? Engtin nge hma i sawn theih ang?

* I nunah tu nge i tan leh Pathian tana hlutna nei tih hrilh hriat ngai awm? Tunkar chhung hian chumi chu i tan leh Pathian tan a hlu a ni tih tichiang turin eng nge i tih theih?

* Mi hmangaih taka i biak lai kha han ngaihtuah let la. Chuta an chhanna chu eng nge ni le?

[Lettu: Sangpuia]