Mizo Independence Movement behchhana siam Ambush film boruak a lian; Oct 7 zanah Lunglei-ah tlangzarh leh dawn

Aizawl | October 6, 2023: Mizo Independence Movement behchhana film siam, Leitlang Pictures siam Ambush, a war story chu Nizan dar 8:00 khan Chief Minister Zoramthanga'n MZU Auditorium, Tanhril-ah a tlangzarh. Mipuiin an en ho nghal a, boruak a nei lian hle.

Lunglei lamah chuan, October 7 zan dar 7:30 hian Saikuti Hall-ah tlangzarh leh show kalpui a ni thung ang.

Khua/Veng a show book duh tan 9436702516 ah a biak theih reng a. Show system a kalpui chhungin app ah dah a ni rih dawn lo niin he film director Mapuia Chongthu chuan Instagram ah post a siam.

Chief Minister chuan, Ambush film chu a hming mai pawhin a lung a tihlen thu sawiin underground a an awm lai behchhan film an lo buaipui ve tawh dan leh film siam hautakzia a lo hriat ve tawh thute a tarlang a. Zaninah rambuai film tha tak tlangzarh tur a awm ta hi a buatsaihtute an chhuanawm hle a, thangtharten kan nu leh pa, kan pi leh puten ram chhan nana an lo tawrh nasatzia te kan hmuh theih phah dawn a ni, a ti. Tin, film industry lamah mizoten hma kan sawn zel hi a lawmawm a, hmalam hun eng tak pawh kan nei tih hriaa nasa zawka bei zel turin ka sawm cheu a ni, a ti bawk.

Pu Mapuia Chongthu, Director chuan Ambush- a war story film an siam chhan leh an buatsaih dan tlangpui report a pe a. Mi tinin tui zawng leh tum kan nei thin, kei pawhin he film siam duhna hi kum sawm kalta atang tawh khan ka nei a, mahse sum leh pai a duh hautak avangin tlin ka inti rih lova. Tlem lai khan Serchhipah thawhpui tur tha tak mai, Rambuai History lama Doctorate Degree nei Dr. Zarzosanga ka chhar hlauh mai a. Anin script tha tak min ziah saka a bul kan tan thei ta a ni. A changtute inpekna a thuk em em a, an zarah he film hi a puitling thei a ni. Rambuai hre pha lo thangthar tam tak kan awm tawh avangin he film hi entertainment rilru ringawt pua siam a ni lova, rambuai chanchin inzirtirna film pawimawh tak niah ka ngai a ni. Chief Minister meuhvin min tlangzarh sak theih avangin kan lawm hle a ni, a ti bawk.

He film-ah hian lemchanthiam mi 70 vel an inlan a, Mizorama film siam tawh zinga sum senna sang ber nia sawi niin darkar hnih leh minute sawmngaa sei a ni.

Ambush hi indo film niin, a taka thil thleng behchhana siam niin, Mizo Independence Movement 1966 behchhana siam a ni. He film siam nan hian nuai 20 chuang sen a nih thu Director chuan a sawi a, a tak behchhan a siam a ni a, a tihmuhnawm tur atan a thawntu erawh siam danglam a ni thug. He Ambush hi Kawlkulh khaw bul Dulte daia a taka thil thleng behchhana siam a nih thu Director Mapuia Chongthu chuan a sawi bawk.

He film-ah hian Vairengte daia inkah laia a live vanga hriat hlawh, a hnua Ramri filma thiam taka rawn chang Gilbert Colney, Sangtea Chhangte, Marilyn Chhanchhani leh Sena Ngente te'n role pawimawh an chang a. Heng bakah hian, Nunna Thar star zing ami kan hmu a, Mister India Mizoram 2019 Jonathan Thangeo a inlan a, film lama sulhnu sawi tur ngah tak Eddie Tochhawng kan hmu bawk a ni.

Lunglei Tlangval Sangte Chhangte hi film a chan pahnihna a ni a, Aizawl Tuikual nula Marilyn Chhanchhani erawh film a a vawikhat inlanna a ni thung.

Marilyn Chhanchhani hi filma a vawikhat inlanna a ni a, he film hi a nun her danglam bawihtu a ni dawn nge dawn lo chu amaha theihna awm atangin a la hriat ang.

He film hi Leitlang Pictures kutchhuak niin, Mapuia Chongthu Director a ni a, a thawnthu hi Dr Zarzosanga ziah niin, Screenplay hi 'Ramri' film hlawhtling taka lo siam tawhtu Nuna Hrahsel ziah a ni thung.

Cinematographer-te hi Isaac Lalchhanpuia, Nicholas Remruatpuia leh Mapuia Chongthu niin, Sound Recordist hi Mesa Varte a ni. Maukeup Artist hi Duss niin, Background Scores hi Kima chhangte, Gaffers - Makima Chawngthu, Benjamin Ramdinsanga leh Maena Varte te an ni a, Editing hi Isaac Lalchhanpuia, Nicholas Remruatpuia leh Mapuia Chongthu te vekin an khawih a, Production Manager hi Saiteii Sailo niin, Location Manager hi remruat Colney a ni thung.

He film hi Serchhip, Thenzawl leh Lunglei-ah an chang a, an shoot hma hian hmuifang-ah hun eng emaw chenin an inzir hlawm a ni. Mizo Film industry a sulhnu ngah tak tak leh mi thar kan hmu nual dawn a ni.

He film-ah hian, Mizo Independence Movement laia hnam tana nunna thapa inpete tawrhna leh hlutna a lang a, Hnam Movement vanga mipui nunau pawi sawi lo tam takin an tawrh dante, khaw khawm a ni a, India Sipaite chet rawva ziate tarlan a ni.

Ram tan tia Nu leh pain an hmangaih an fate thi tura a thlah liamna hmuh tur a awm a, Curfew rip tak kara nula tlangval inhmangihna kuhmum hmuh theihin a awm bawk.

Darkar hnih leh minute 50 a sei film-ah hian lang rei lo mahse a paw lo thei mai ang em tih tur lang rei ta deuh tia ngaih theih a awm nual a, chungte chu paih hlek hlek se darkar hnih leh a chanve (2:30) ah a chhuak thei mai ang em tih theih a ni. Puak phur tura Sipaiin an hruaite'n lam hla tak kal tura an inpu leuh leuh pawh, a hun lai ngaihtuahin Nghawngkawl nen rit takin an inphurh a rinawm!!

He film i en lai hian, i nui leh sak thin ang a, a changin i tang tung ang a, a changin tu emaw i haw hle mai thei a, chungte chuan a changtute, a scrip ziaktu thiam zia a pholang.

An tawngkam hman tam tak tha tih i nei ngei ang a, i thinlung deuh zar i tawng ngei ang a, hnam hmangaihna thinlung paw chhuak thei, kut lo ben ve dar darna tur khawpa thu tha an chhak chhuak thin hian an tawngkam phuah chhuaktu hi Mizo Independence Movement-ah a chiang hle a nih loh vek pawhin hnam thinlung pu mi a nih zia a pholang chiang hle.

He film-ah hian Gilbert Colney in lemchan a thiam zia hmuh theihin a awm leh a, a chang a ni satliah lova a filma a thawnthu milin a hmel leh chezia zawng zawng-ah a tilang a. Misualpa-ah chang se, huat a hlawh phah mai thei! Sangtea Chhangte thiamna kan hmu a, Marilyn Chhanchhani nurse zir zo film-a an seng lut nghal hi an tihsual loh zia kan hmu a, Sena Ngente a lo pui hle bawk!

Shooting neih lai thlalak thenkhat: