HRINGNUNA LUANCHHUAHNA THA BER CHU HMANGAIHNA HI A NI

 Hmangaihna Nen Ni 40

HRINGNUNA LUANCHHUAHNA THA BER CHU HMANGAIHNA HI A NI

By Rick Warren 

— Sep 27, 2023

“Chung zawng zawng chungah chuan Hmangaihna inbel rawh u, chu chu phuar famkimna a ni.” Kolossa 3:14.

Pathian chuan i damchhan, i hna pui ber, i tum leh hmathlir chu hmangaih zir turin a duh che a ni. Engvangin nge chu chu a sawi? Thil dang zawng aia hmangaihna a pawimawhna chhan kawng hnihte chu.

Hmangaihna chuan i rinna a siam. Kawng danga kan sawi chuan, hmangaihna chuan Pathian chhungkuaah i tel a ni tih a tichiang.

Bible chuan, “... mi tin hmangaihna nei apiang Pathian hrin an ni tawh a, Pathian an hre bawk a. Hmangaihna nei lo chuan Pathian a hre lo; Pathian chu hmangaihna a ni si a” 1 Johana 4:7-8

“Miin Pathian ka hmangaih tiin a unau haw si sela, amah chu dawthei a ni; a unau a hmuh tawh renga mah a hmangaih loh chuan Pathian a hmuh ngai lohva chu engtin nge a hmangaih theih ang?” 1 Johana 4:20

Mi dang hmangaihna i neih chuan, Pathian fa i nihna i ti lang.

Hmangaihna chuan i nun a phuarkhawm. I nunah chuan thil tam tak an tel ve a: khawtlang nun, chhungkaw nun, kohhran nun, nupa nun, eizawnna hmuna nun dan thlengin. Chung zawng zawng phuar khawmtu chu a awm a ngai - a laipui ber phuarkhawmtu leh kuahkhawmtu a awm a tul a ni.

I nun hruaitu atana hmantlak loh thil tam tak a awm. Thenkhat chuan an duhzawng, sum, larna leh hlawhtlinna hmang ten an nun an khalh kal a. Amaherawhchu chung zawng zawngah chuan engmah tling tawk a awm lo. I nunah harsatna entirnan - kawng lo tawp se, lirnghingin min tichi-ai se, sum leh pai harsatna lo thleng se, nghing ve mai mai lo tur i nun laipui luahtu i mamawh a ni.    

Harsatna thlipui chuan nuai che mah se, thlah lo va, vawn tlat tur, i nun laipuia awm tur i mamawh a nih chu.  Bible-in a sawi - chung zawng zawng laka min vawn tlattir theitu chu hmangaihna - Pathian hmangaihna leh vengte hmangaihna hi a ni a ti. Hmangaihnain i nun laipui a luah chuan, thil dang zawng zawng pawh a luahin, chumi lam chu a hawitir thei ang che.

Kolossa 3:14 ah chuan, “Chung zawng zawng chungah chuan Hmangaihna inbel rawh u, chu chu phuar famkimna a ni,” a ti. 

Ngaihtuah zui atan

* Hmangaihna nun i neih tum ber chu eng thilin nge rawn luahlan thin le?

*Engti zawngin nge miin Pathian fa i nih an hriat thin che? Chung zinga pakhat chu hmangaihna a ni em?

* Hmangaihna hi i nun laipui berah i neih theihna turin engtin nge hma i lak ang?

[Lettu: Sangpuia]