'Ambush' film Oct 5 zanah tlangzarh dawn; Show in kalpui dawn

Aizawl | Sept 30, 2023: Leitlang Pictures kutchhuak, Mizote'n zalenna an sual lai behchhana siam 'AMBUSH - A War Story' film chu October 5 zan dar 8 hian MZU Auditorium, Tanhril-ah tlangzarh pahin show kalpui nghal a ni dawn.

Lunglei lamah chuan, October 7 zan dar 7:30 hian Saikuti Hall-ah tlangzarh leh show kalpui a ni thung ang.

Khua/Veng a show book duh tan 9436702516 ah a biak theih reng a. Show system a kalpui chhungin app ah dah a ni rih dawn lo niin he film director Mapuia Chongthu chuan Instagram ah post a siam.

'Ambush' hi indo film niin, a taka thil thleng behchhana siam niin, Mizo Independence Movement 1966 behchhana siam a ni.

He film-ah hian Vairengte daia inkah laia a live vanga hriat hlawh Gilbert Colney, Sangtea Chhangte, Marilyn Chhanchhani leh Sena Ngente te'n role pawimawh an chang dawn a. Heng bakah hian, Nunna Thar star zing ami kan hmu dawn a, Mister India Mizoram 2019 Jonathan Thangeo a inlan a, film lama sulhnu sawi tur ngah tak Eddie Tochhawng kan hmu dawn bawk a ni.

Marilyn Chhanchhani hi filma a vawikhat inlanna a ni a, he film hi a nun her danglam bawihtu a ni dawn nge dawn lo chu amaha theihna awm atangin a la hriat ang.

He film hi Leitlang Pictures kutchhuak niin, Mapuia Chongthu Director a ni a, a thawnthu hi Dr Zarzosanga ziah niin, Screenplay hi 'Ramri' film hlawhtling taka lo siam tawhtu Nuna Hrahsel ziah a ni thung.

Cinematographer-te hi Isaac Lalchhanpuia, Nicholas Remruatpuia leh Mapuia Chongthu niin, Sound Recordist hi Mesa Varte a ni. Maukeup Artist hi Duss niin, Background Scores hi Kima chhangte, Gaffers - Makima Chawngthu, Benjamin Ramdinsanga leh Maena Varte te an ni a, Editing hi Isaac Lalchhanpuia, Nicholas Remruatpuia leh Mapuia Chongthu te vekin an khawih a, Production Manager hi Saiteii Sailo niin, Location Manager hi remruat Colney a ni thung.

He film hi Serchhip, Thenzawl leh Lunglei-ah an chang a, an shoot hma hian hmuifang-ah hun eng emaw chenin an inzir hlawm a ni.