Mizoram University (MZU) Master of Arts (MA) Economics Gold Medalist 2023 Hmingthansangi kan belchiang.
Papuii tia koh thin, CGPA 8.33 score-a MZU MA Economics Gold Medalist 2023 Hmingthansangi hi C Lalhmingthanga leh Zoramthangi te fanu niin, 7th June, 1999 khan a piang a. Unau pali zinga upa ber dawttu niin, an unau hi mipa pahnih leh hmeichhe pahnih an ni.
Papuii te hi Durtlang, Leitan-a awm niin, Kohhran lamah chuan, Mizoram Presbyterian Kohhran-ah an lawi a ni. Papuii hi tunah hian Delhi-ah a cheng mek.
Papuii'n Explore Mizoram zawhna a chhannate:
📌 Zirna lam:
~ Pawl 10 leh 12 hi Mount Carmel School atangin ka pass a, BA hi Pachhunga University College atanga zo lehin MA Economics hi Mizoram University, 2023 atangin ka zo leh a ni.
📌 I lehkha zir dan?
~ Kan zirlai hi hriat chian ka tum hle ṭhin a, class lectures ka ngaithla uluk a, in lama ka en let leh pawhin thil hriat belh leh chhiar zau belh anga ka in ngaih ṭhin avang hian ka tui phah a, ka hlawkpui hle ṭhin. Exam naah hian a tlângpui in ka byheart vak ngai lo a, ka hriatthiamna aṭanga ṭha taka ziah chhuah erawh ka zir nasa thung. Zirlai kaihhnawih lehkhabu ka chhiar te hian min pui hle bawk.
📌 Harsatna I hmachhawn dan?
~ Harsatna ka tawh hian a êng lam zawng a thlir ka tum tlat ṭhin a. Ka harsatna tawh te ah ka chinfel theih thil a awm a nih chuan ka theihtawp ka chhuah a, ka tih ang theih zawng zawng ka tive a ka inhriat hnu chuan a bâk chu Pathian kutah ka dah mai zel a ni.
📌 Gold medalist i nihna (Subject) leh CGPA?
~ Pathian zarah Economics subject ah CGPA 8.33 score in Gold Medalist ka ni ve hlauh a ni.
📌 Gold medalist ni tura i beih dan?
~ Gold Medalist nih hi ka rilru ah pawh ka suangtuah phak lo hrim hrim a. Mahse keima phak tawk a a ṭha ber ka pekna zelah Pathian malsawmna ka dawng ni berin ka hria.
📌 Gold medalist ni tura i beihnaah faculty lamin an ṭawiawm/pui ṭha chein i hria em?
~ Kan zirtirtu te hi kawng engkimah ka fak takzet. Kan thiamna leh hmasawnna an ngai pawimawh em em a. Classroom environment a nawm avang hian zirlai te har ṭhin mahse nitin phur takin class kan kal ṭhin.
Keimah chang ni lo in Mizoram University hnuaia Economics Department aṭanga lo zir chhuak tawh te chuan kan zirtirtu te thiamzia leh an felzia te, kan tán an inhawn zia leh zirtirtu nih piah lama kan tán ṭhian ṭha tak an nih zia te an hriat ka ring. Zirlai ah chauh nilo, hringnun kawng tinrengah hian hma kan sawn phah a ni.
📌 I zirna atana i chhungte pawimawhna:
~ Ka chhungte hian lehkha zir an ngai pawimawh em em a. Ka zirlai a ṭha tak a ka tih theih nan kawng engkimah min pui a, min backup ṭha hle. Zirlai tán a thil hlu ber 'hun' ka neih theih nan ka mamawhna ang zelin min awl ṭhin bawk. Ei leh in tur ṭha te, lehkhabu leh ka mamawh apiang ka neih theih nan kawng tinrengah min pui ṭhin a ni.
📌 I zirna atana i ṭhiante pawimawhna:
~ Pathian zarah ṭhianṭha tak tak ka neih avang hian ka thil tihnaah leh hlawhtlinna ah te phûrna nasa tak min pe ṭhin. Hei hian min khalh kal a, eng thil pawh tawk ila ka tán an awm reng tih ka hriat avangin huaisen takin engkim ka hmachhawn thei ṭhin.
📌 COVID 19 in i nun leh zirnaah nghawng a nei em? A neih chuan, nghawng a neih dan?
~ Covid-19 avang khan tum ang a thil te a kal theih loh avangin BA zawhah kum khat ka awl a. Khami hun chhung khan mimal takin kawng engkimah hma ka sawn a ni. Hringnun ka thlir dan a inthlak vek a, chhungkaw pawimawhna te, self-awareness, self-discipline leh Thlarau lam thlengin hma ka sawn a. Ka tán chuan kum chhinchhiah tlak tak a ni.
📌 I duhzawng leh ngainat zawngte:
• Lehkhabu duh - Tun hnaiah chuan Viktor E. Frankl-a ziah Man's Search for Meaning
• Rawng - Black
• Chawhmeh - Thlai lam leh arsa
• Incheina - Simple leh hak nuam
• Rimawi – Genre chi hrang hrang ka ngaithla kual nasa
• Mizo Ziaktu zingah - Duhzawng nei turin ka la chhiar tam tawk lo a
• Hla - Pathian Hmangaihna, Maruati sak, Mafela phuah
• Hla phuahtu - C Lalzarmawia
• Teacher - BA leh MA a kan zirtirtu te ka ngaina in ka kawm ngeih hlawm em em a ni.
• Leader - Abraham Lincoln
📌 Mize ngainat zawng:
~ Nihna anga lang, mi ṭha.
📌 Mize ngai nat loh zawng:
~ Mi chapo
📌 Hobby- Hiking leh lehkhabu chhiar
📌 Relationship status - Loved and in love (eisss hahhaha)
📌 Kawppui atan duhzawng:
~ Pathian ṭih tu leh chhungkua ngai pawimawh mi, mawhphurhna hlenchhuak ṭhin mipa hi ka dah sang.
📌 Aim in Life: Inchhirna nei lo tura theihtawp chhuah
Zawhna dang:::
1. A tel lova i awm theih loh: Ei tur (riltam hi ka pe na ve lutuk a😂)
2. I nun kaihruaitu: Pathian thu
3. Hringnuna i hlauh ber: Ka tih tur ka tih loh avanga inchhir
4. I tih ngai miah loh tur: Mahni indah san
5. Mizo Tualzal nuna ṭha i tih: Tlawmngaihna leh in ngaihsak tawnna
6. Quote i duh ber: Be you, always.
7. Mizoram leh Mizo tualzal nuna Mizo hmeichhiate dinhmun:
~ A ṭha thawkhat ka ti... Mahse in zah tawnna kawngah te, zahawmna inhumsak kawngah te hei ai hian hma kan sawn thei in ka hria
8. Hnam hmingṭhat leh hmingchhiat kawngah Hmeichhiate'n mawhphurhna:
~ Hmeichhia te hi ho te a hmingṭha leh hmingchhe thei kan nih avangin mahni invawng a, zahawm tak leh mahni inringtawk a, khawi hmunah pawh nun mawi leh hawihhawm tak a awm zelin, kan theihna te ti pung a kan hmazawn a tihtur awm te ṭha tak a hlenchhuah mai hian kan hnam kan chawimawi in ka hria.
9. Hnam ziarang chawinun kawnga Hmeichhiate mawhphurna:
~ Hnam zia rang pholan theihna hun leh hmun reng rengah a uar lam hawi zel ila, kan hnam ṭobul leh hnam rohlu te ngaihlu in chhungkuaah te in hrilh hre tam ila.
10. Mizote tan 'Fa neih tlem' inzirtir hi a ṭulin i hria em?
~ Hre miah lo. Chhungkaw dinhmun in a zir phei chuan neih tam lam hi inzirtir zawk zel ila a ṭha ka ti.
11. Mizo hnam ṭhanmawh bawk nia i hriat?
~ Zu leh ruihtheihthil hian Mizo ṭhalai tamtak, theihna sâng tak nei te, khita awm thei tur te min ei chhia in nunna tam tak a suat tawh a. Hei hi a pawi ka ti in a runthlak ka ti ṭhin.
12. Mizo hnam damna atana kawng awm nia i hriatte?
~ Mimal tin te midang vei lo a, mahni ṭheuh in enfiah a, mahni a diklo leh ṭha lo lai pawm thiam a, insiamṭha a, hawi zau a, hmasawn duhna thinlung kan put tlat hi a pawimawh in ka hria.
13. Hnam chhan nana Hmeichhiate ṭangkaina leh mawhphurna?
~ Hmeichhia te hi kan inhriat ang ai hian kan powerful a, mahse kan hmang thiamlo fo ṭhin in ka hria. Hnam chhan nan pawh hian kan rilru te sêng a, inchhiar zau a, in support tawn a, fing leh hawihhawm tak chung si a ke kan pen hi a pawimawh ka ti.
14. Zirna, Khawtlang leh Kohhran hi?
~ Khawtlâng leh Kohhran te hi kan society ah hian an pawimawh em em a, mahni theihna zawn ṭheuh a in hman pawh hi a ṭha ka ti. Zir hunah chuan ṭha takin zir mai ila, kan theihna leh thiamna te Kohhran leh Khawtlâng tána chhawr tlak ni thei tur khawp a kan thiam hi zirlai ten kan tihmakmawh a ni.
15. Khawtlang, Kohhran leh nangmah:
~ Hun awl ka neih apiangin Kohhran leh Khawtlângah hian ka inhmang ve ṭhin a. Hun lo la kal zel turah pawh Kohhran leh Khawtlâng tán a ka theih ang ang pek let hi ka tum tlat a ni.
16. Social Media leh Nangmah:
~ Social media hi ka khawih tam lo khawp mai. Mahse a ṭul dan ang zelin ka hmang ṭangkai viau bawk.
17. Mizoram ṭhalai tam tak tlakchham:
~ A zavai chuan nilo mahse hrehawm hmasak aia nawm vat vat kan duhna hian kan nih tur ang min nih tir lo ṭhin in ka hria. Chuan kan thil tihna kawngah kan thiam filawr lo ṭhin leh kan zawng zawng kan pek loh ṭhin avang hian kan hmasawnna tur a dal in ka hria.
18. Mizo ṭhalaite hian ngaihsan tur dik an ngaisangin i hria em?
~ Duh ai chuan kan la hawi zim a, kan value system hi a hniam ka la ti khawp mai.
19. Ngaihsan tur dik nia i hriat:
~ Mi rinawm leh thawkrim, mahni theihna ti pung a, hma sawn a, a mihring pui te tán a luangchhuak ṭhin mi.
20. Hlawhtlinna tura pawimawh:
~ Taimakna leh tei rei peihna
21. hloh i hlauh ber:
~ Ka inrintawkna
22. Hnam dang nupui pasal neih hi-
~ An inhmangaih chhung chuan a ṭha a ni mai.
23. Nupui pasal inneih hmaa mipat hmeichhiatna hman hi?
~ Midang chu ka sawi sak thei lo a. Kei chuan nupui /pasal te tán chauh a invawn thianghlim hi ka duhthusam a ni.
24. Hlawhtlinna hi?l
~ Lungawina leh fulfillment nen a kal kawp tlat.
I thalaipuite tan fuihna---
~ I hun hmang ṭha rawh 🙂
EXPLOREMIZORAM.COM i hmuh dan:
~ A ṭha in a ṭangkai a, a content hi a ṭha ka ti thei em em bawk.
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: