Hnahthial | Aug 16, 2023: Higher & Technical Education Minister leh South Tuipui AC Bialtu ni bawk Dr R Lalthangliana chuan vawiin khan Community Hall, Electric Veng Hnahthialah Sports & Youth Services Department leh Mizo Zirlai Pawl (MZP) tangkawp buatsaih ‘Youth-20 Meet on Nationalism, Patriotism and Development’ chu Khuallian niin a hmanpui.
He hunah hian Khuallian Dr R Lalthangliana chuan G-20 hnuaia hmalakna peng pawimawh tak pakhat, thalaite tana Youth-20 buatsaih a ni chu lawmawm a tih thu sawiin Hnahthial mipui leh thalaite hmaa thusawina hun a nei thei chu vannei a inti hle tih a sawi. Minister chuan Zo nunze mawi tak chu tlawmngaihna a ni tiin Hnam dangte pawhin an ngaihsan a ni a ti a, ‘Hnam dang laka kan hmel ti mawitu leh Mizo nih ti nuam tu a ni fo’ a ti. Tlawmngaihna tih tawngkam chu tawngdangah a tlukpui a awmlo tiin sawifiah rualloh thiltiha lantir thin zawk a ni a ti bawk.
Khuallian Dr R Lalthangliana chuan Nationalism awmzia chu Hnam rilru put ringawt nilovin ram leh Hnam tana pen chhuah a, a taka Zo nunze mawi nunpuia, chet chhuahpui a ni tiin mahni mai bakah midang lainatna leh ngaihsaknate chu Hnam hmangaihna dik tak a ni a ti. Zofate zingah inpumkhatna a lian chho zel a, geographical boundary chuan Zohnahthlakte inunauna a daidang theilo ti bawkin thinlunga inkungkaihna leh a taka chet chhuahna chu ram leh Hnam hmangaihna (nationalism & patriotism) dik tak a ni a ti a, Mizo Nationlism-ah thanharh zual zel a ngai a ti bawk. Mizoramin hma a sawn zel nan lêh Hnam a boral loh nan zirna ngai pawimawh zual sauh turin kalkhawm zirlaite a fuih a, kum zabi 21-na a thiamna leh technology thangchak takah midang umpha ve tur chuan thiamna tak tak neih a tul hle a ti a. Zirna lama chimralna chuan Hnam boralna a thlen thei tiin ram leh Hnam damkhawchhuah nan thiamna tak tak nei turin a fuih a ni. Mizoram chhunga hna sang leh lian a dinhmun pawimawhte chu Zohnahthlak thalai lehkhathiam ten an luah vek theih nan tan la thar turin a fuih a, JICA funding na hnuaia Cancer Super Specialty Hospital sak tur te, NẾP 2020 tihhlawhtlinna tura State University din turah te leh sorkar inrelbawlna hrang hrangah a khaikhawmtu ni turin theihna an nei vek a, midang hlawhtlingte huphurh en a en lova, ‘ka thei ve a ni’ tih rilru pu chunga theihtawp chhuah turin a fuih bawk a ni. Midangte tana nun chu essence of life ( dam chhan) a ni tiin ram leh Hnam tan ke pen zual zel turin kalkhawmte a sawm a. Youth-20 meet chuan Hnahthial District thalaite ah chona thar pe se tiin tangkai taka hman a nih theih nan duhsakna a hlan nghal a ni.
Vawiina Youth-20 Meet on Nationalism, Patriotism & Development programme a Speaker Pu Lalnuntawma Fanai, MZP General Headquarter Adviser chuan thusawina hun pek niin duhsakna chantir a ni chu lawmawm a tih thu a sawi a, Zohnahthlak khaw hrang hranga cheng te rilru ah Mizo Nationalism a lian chho zel chu ropui a tih thu sawiin ram leh Hnam hmangaihna, ram tana thahnemngaihna leh hmasawn duhna a lian chho zel tih a sawi a, Zirlaite chu hnam inpumkhatna ah an pawimawh hle tiin taima taka zir chhunzawm zel turin a fuih bawk.Zoram mipuite chu hmun hrang hranga awm Zohnahthlakte tan inpui nghaktu rilru puin khaw hrang hranga an unaute hmakhua ngai a, tuamhlawm thin tu ni fo turin a chah bawk a ni.
Youth-20 meet ah hian MZP Headquarters Hnahthial President Pu K Lalzarzova chuan lawmna thu sawiin, Students Union Hnahthial College Vice President Lalthlamuanpuia’n hunserh a hmang a, MZP general Headquarters President Pu Lalnunmawia Pautu in keynote address pein MZP Headquarters Hnahthial Secretary Pu Jimmy Lalrosanga’n lawmthu sawiin hun tawp a khar a ni.
- DIPR
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: