Mizoram University (MZU) Bachelor of Arts (BA) Gold Medalist 2023 Lalduhsaki kan belchiang.
CGPA 9.42 hmua MZU BA Gold Medalist 2023 Lalduhsaki hi Duhsak emaw Doozy emaw in an ko thin a. December 1, 1999 khan Lalenpuii leh K Lalthansanga (L) te inkar-ah a lo piang a. Unau pathum niin, amah hi an milai a ni a, nuta pakhat an nei a ni.
Lalduhsaki'n Explore Mizoram zawhna a chhannate:
📌 Zirna lam:
~ Pawl 10 leh 12 hi St. Paul’s Higher Secondary School (Tlangnuam) atangin 2017 leh 2019 khan ka pass a. Kum 2020-ah Pachhunga University College-ah History Honour turin ka lut a, Pathian zarah kumin (2023) ah ka zo a ni.
📌 I lehkha zir dan?
~ Class kal pangngai ni chuan nikhatah darkar3 vel ka zir tlangpui a, exam hma kar thum vel atang hi chuan full time-in ka zir deuh tawp thin. Zingah class kal hmain khami ni a kan zir tur kha tlem tal ka en lawk thin a, tlaia kan haw hnuin question study te neiin note ka siam thin. Tlai chaw eikhamah ka zir tur ang ang te chu ka zir tan a, zan lama zir nuam ka tih zawk avangin ka mengrei thin, zing lamah erawh ka tho hma lem lo a, exam/test dawn ni te a nih loh chuan zingkara zir hi chu ka ti vak ngai lo.
📌 Harsatna I hmachhawn dan?
~ Covid vangin kan final year atang chauh offline class kan kal thei a. Kum hnih lai online a kan kal avangin kan thiam tur ang tam tak kan thiam lo va, thluak lo chawl ve hman deuh nen, 5th sem kha chu beidawn lek lek chang ka ngah khawp mai. Mahse nitin tlem tal lo tih ve bek bekna khan min pui a, 6th Sem kan nih meuh kha chuan kan zirlai hrim hrim kha chu phurrit angin ka en tawh lo.
📌 Gold medalist i nihna (Subject) leh CGPA?
~ History department ah 9.42 CGPA hmuin topper ka ni a, BA Gold Medalist ka ni bawk.
📌 Gold medalist ni tura i beih dan?
~ Gold Medalist nih hi chu ka beisei phak loh thil a ni a, chutih rualin ka theih ang tawka tha result neih chu ka tum deuh tawp a. Aizawla in leh lo nei ni mah ila, lehkha zirna hun thawl zawk ka duh avangin kan college bul, L.C Hostel ah ka awm a. Questions hlui te mumal taka study in, note ka insiam thin a, regular takin lehkha ka zir.
📌 Gold medalist ni tura i beihnaah faculty lamin an ṭawiawm/pui ṭha chein i hria em?
~ Aw, Gold Medalist ka nih theih nan hian kan faculty te hian nasa takin min pui a ni. A khat tawkin counselling min neih pui a, career guidance te min pe in, kan class performance an vil reng thin. Tin, kan zirlaiah min spoon feed tawp lovin mahni a ngaihtuahna seng thiam thei turin min chher a. Kan hriatthiam loh leh kan harsatnaah te erawh chuan min pui turin an inhawng em em reng a ni. An ni ang zirtirtu tha kan neih azarah result tha nei turin theihtawp kan chhuah theih phah a ni.
📌 I zirna atana i chhungte pawimawhna:
~ Chhungkaw indaih lo tak ni chungin ka lehkha zir that theih nan hostel ah min dah a, ka zirna lam a ni tawh phawt chuan tha leh sum an ui ngai lo. Ka nu hian bang lovin min tawngtai sak reng thin bawk a, an mi support na tel lo chuan tun dinhmun hi ka thleng lo ang.
📌 I zirna atana i ṭhiante pawimawhna:
~ Ka thiante hi an taima em em a, note an neih sa te phal takin min pe thin. Ka tih thatin min lawmpui a, ka beidawn deuh leh min fuih thin bawk.
📌 COVID 19 in i nun leh zirnaah nghawng a nei em? A neih chuan, nghawng a neih dan?
~ COVID 19 hma 2019 khan Delhi-a Shyam Lal College-ah History Honour turin ka lut ve zuai hman a, nimahsela, an zirnaah duhthusam lohna a tam a, tin class lectures atan Hindi an hman nasat em avangin kan zirlai hriatthiam loh ka ngah thei hle. 2nd Sem exam hmain COVID 19 a rawn ni a, Mizoramah kan rawn haw a, online in class kan chhunzawm a. Online class Hindi-a lectures ni bawk nen kan zirlai pawh ka tui lo ta em em a, heta Mizoram-a bul tan that leh kha fuh zawk a ring in, Pachhunga University College ah admission ka ti leh ta a ni. Kum khat lost mah ila PUC a ka bei tha leh hi ka inchhir lo a, ka tan chuan Covid 19 kha malsawmna, ka nuna second chance min petu angin ka ngai.
📌 I duhzawng leh ngainat zawngte:
• Lehkhabu duh – Think and grow rich; 101 essays that will change the way you think; Atomic habits.
• Rawng – Blue and Beige
• Chawhmeh - Aloo, vaimim, arsa, bawngsa, pa (mushroom).
• Incheina – Smart tho minimalistic lam hi nalh ka ti.
• Rimawi – Pop and country.
• Mizo Ziaktu zingah – Pu F. Vanlalrochana
• Hla - “Lalpa a tha”
• Hla phuahtu – Pu C. Lalzarmawia
• Teacher – PUC History department faculty zawng zawng.
• Leader – Dr A.P.J. Abdul Kalam
📌 Mize ngainat zawng:
~ Tawng tam lo, taima, mi hriatthiamna ngah leh inngaitlawm.
📌 Mize ngai nat loh zawng:
~ Chapo, mi chhiatna hmu thei tak, dawthei.
📌 Hobby
~ Baking
📌 Relationship status:
- Unmarried
📌 Kawppui atan duhzawng –
~ Pathian tih mi, thawh hreh nei lo, taima, tlawmngai, zaidam leh caring tak.
📌 Aim in Life:
~ Civil Service
Zawhna dang:::
1. A tel lova i awm theih loh:
~ Ka chhungte leh ka thiante.
2. I nun kaihruaitu:
~ Bible leh ka chhungte min tawngtai sakna.
3. Hringnuna i hlauh ber:
~ Nun hloh/Khawtlang tan a mi hnawksak nih.
4. I tih ngai miah loh tur:
~ Ruihtheihthil
5. Mizo Tualzal nuna ṭha i tih:
~ Tlawmngaihna leh aia upa zah te hi Mizo nun timawitu an ni.
6. Quote i duh ber:
~ “Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang.” – 1 Korinth 10:13
7. Mizoram leh Mizo tualzal nuna Mizo hmeichhiate dinhmun:
~ Kan pi leh pute hunlai ngaihtuah chuan Mizo hmeichhiate dinhmunin hma a sawn viau a, amaherawhchu khawthlang ram hmeichhiate dinhmun chu a la phak lo niin a lang. Sawrkar hna, sumdawnna leh hna hrang hrangah te hmeichhe hmel hmuh tur a tam tan hle a, Local council leh AMC ah te pawh hmeichhiate tan reservation a awm tawh a, a lawmawm hle, chutih rualin kan rorelna hmun sang Assembly House ah hmeichhe hmel hmuh a khat a, reservation te han awm ve thei se, hmeichhiate dinhmun nasa taka a chawisan ka ring.
8. Hnam hmingṭhat leh hmingchhiat kawngah Hmeichhiate'n mawhphurhna:
~ Hnam hmingthat leh hmingchhiat kawngah Hmeichhiate leh Mipate mawhphurhna hi a in angkhat rengin ka hria.
9. Hnam ziarang chawinun kawnga Hmeichhiate mawhphurna:
~ Kan hnam thuam mawi tak tak ngaihhlut thiam te, kan hnam zai leh lam chawinun kawnga hmalak te, kan kut themthiam thil hrang hrang ngaihhlut thiam te hi kan hnam ziarang chawinun kawnga hmeichhiate mawhphurhna pawimawh tak a niin ka hria.
10. Mizote tan 'Fa neih tlem' inzirtir hi a ṭulin i hria em? –
~ Mizoram hi India state ho zinga mihring tlem lama pahnihna kan ni a, hei vang hian state dangte phak lohna kan ngah hle. Consumer kan tlem avangin eng market mah a thang duang thei lo va, tin, a mihring kan tlem avangin central Parliament lamah pawh kan aiawhtu tur Member of Parliament (MP) kan nei tam thei lo. Chuvangin ‘Fa neih tlem’ inzirtir hi a tul ka ti lo.
11. Mizo hnam ṭhanmawh bawk nia i hriat?
~ Mizo hnam thanmawh bawk lian ber chu hna thawh that loh leh eirukna hluar lutuk hi a niin ka hria.
12. Mizo hnam damna atana kawng awm nia i hriatte?
~ Mizo hnam damna atan chuan mitin hi kan pawimawhin ka hria. Dik lo ni a kan hriat chu sawiselin hnawl ngam ila, mi tha leh dik ni a kan hriatte chawimawi thiam bawk ila. Tin, hruaitu tha, hmathlir thui tak nei, thu a sawi mai duh tawk lova, hna tha taka thawk tur mi nei thei turin rilru lo siam fel ila, kan hnam damna tak tak kan hmu ngeiin ka ring.
13. Hnam chhan nana Hmeichhiate ṭangkaina leh mawhphurna?
~ Hnam chhan nana hmeichhiate tangkaina leh mawhphurhna ni a ka hriatte chu chhungkuaa fate enkawl that te, mizo nun ze mawi chawinun te leh kan hnathawhna a rinawm taka thawh te hi an ni.
14. Zirna, Khawtlang leh Kohhran hi?
~ Zirna, khawtlang leh kohhran hi chu a mihring a zirin kan dah pawimawh dan a inang lo a, a thenin a ruala an kalkhawm tir theih vek laiin, a then tan duhthlan a ngaih chang a awm ve bawk.
15. Khawtlang, Kohhran leh nangmah:
~ Kan chawlh lai chuan theih ang tawkin ka inhmang ve thin a, mahse class kan kal tawh hi chuan khawtlang leh kohhran tan ka tangkai lo thei hle, inthlahrun chang a tam. Chutih rualin kan kohhran hruaitute leh khawtlang lama kan hotute hi chuan zirlai kan nihna angin min hrethiam em em a. Zirtur ang ang te kan zawh hnuah nasa zawkin ka inhmang ve ang.
16. Social Media leh Nangmah:
~ Tunlai khawvelah hi chuan social media hi kan nitin nunah a bet ve tlat tawh a. Keimah bikah hi chuan nghawng tha lo a neih sawi tur ka hre lem lo, information inpek zung zung nan a tangkai a, note inthawn nan te kan hmang nasa, chubakah khawvel hmun danga thil thleng rang zawkin kan hriat theih phah thin a ni.
17. Mizoram ṭhalai tam tak tlakchham:
~ Mizoram thalai tam zawk hian teirei peihna leh tumruhna kan tlachhamin ka hria.
18. Mizo ṭhalaite hian ngaihsan tur dik an ngaisangin i hria em?
~ Mizo thalaite hian ngaihsan kan ngah khawp mai a, a inang lo nasa hle bawk a. A tlangpuiin khawtlang tana tha lo tur hi chu ngaihsan loh nachang kan hria chuan ka hria. Chutih rualin social media-a kan hmuh zawng zawng changkanna ni a ngaia entawn hi chu thil fuh tak a niin ka hre lo va, kan Mizo culture nena inrem lo thil hi chu ngaihsan/entawn loh ngam a tha ka ti.
19. Ngaihsan tur dik nia i hriat:
~ Mi lehkhathiam, fing leh tlawmngai; khawtlang leh ram tan a mi tangkai te hi ngaihsan tur dik an niin ka hria.
20. Hlawhtlinna tura pawimawh:
~ Taimakna, tumruhna leh Pathian tih hi hlawhtlinna bul a ni.
21. hloh i hlauh ber:
~ Ka chhungte.
22. Hnam dang nupui pasal neih hi-
~ Nupui Pasal neih thuah hi chuan ‘Khuanu ruat a awm a ni’ an tih hi a pawmawm ka ti a, chutih rualin ka tana Khuanu ruat hi chu Mizo mipa ngei ni se ka duh.
23. Nupui pasal inneih hmaa mipat hmeichhiatna hman hi?
~ Kan Kristiannain min zirtir angin nupui pasal inneih hmaa mipat hmeichhiatna hman hi a tha ka ti lo.
24. Hlawhtlinna hi?
~ Thawhrim rah, Pathian khawngaihna zara mihring tena A malsawmna kan chan thin hi a ni.
I thalaipuite tan fuihna---
~ Ka thalai puite, an thil tih engkimah theihtawp chhuah zel turin ka fuih duh a. Tin, an beisei anga thil a lo thleng ta kher lo a nih pawn indawm kun reng lo a, Pathian nen hma lam pan zel turin ka chah duh a ni.
EXPLOREMIZORAM.COM i hmuh dan:
~ Mizoram leh a chhunga cheng Mizote khawvel hmaa min phochhuaktu a niin ka hria a. A hma pawn ka (Instagram) explore-ah an rawn lang fo tawh thin a, an thil post ten mit a titlaiin a bengvar thlak thei khawp mai. He website-a lanna chance ka nei hi vannei ka inti hle a ni.
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: