Aizawl | May 8, 2023: Vawiin Dt 8th May, 2023(Thawhtanni) khan MZP Headquarters, Lunglei buatsaihin ‘Peaceful Demonstration on Manipur Conflict’ hun Venglai Old Tennis Court ah hman a, "Manipur Sorkar chetdan hi India Constitution palzutna a nih avangin a rang thei ang berin Central Sorkar inrawlh rawh se." tiin thutlukna an siam.
He hun hi Johan Hmangaihzuala Treasurer MZP Hqrts Lunglei-in kaihruaiin, Pu Eric R Zomuanpuia Adviser chuan hunserh a hmang.
MZP Hqrts Lunglei President Lalpeksanga Chenkual chuan, Peaceful Demonstration an buatsaih chhan chu Manipur-a Meitei leh Tribal (Kan unau Zofate) te inkar-a inhmuhthiam lohna awm avang a nih thu sawiin. Remna leh muanna a awm theih nan a hun buatsaih an nih thu a sawi. Tuna Manipur buaina lo awmchhan hi tunhnai maia thil thleng a ni lova, he buaina hi hun reitak kal ta atanga lo in tan tawh thu sawiin. Manipur ah hian hnam hrang hrang chengin chung zingah chuan Zohnahthlak unaute pawh District tam takah an khawsa a. Kum 2015 a Manipur Assembly in Bill Pathum an pass-a heta tang hian Tribal ten he Bill duh lohna avangin lungawilohna an lo lantir tawh a, kum 2015 khan mi pakua(9) laiin nunna an lo chan phah tawh a ni. Ni 3th May, 2023 khan Tlangram a cheng Tribal te chuan Manipur Sorkar in an chenna hmun Forest Reserve Area atan puan duh lohna avangin lungawilohna ‘Peace Rally’ an buatsaih a, chawhnu lamah Meitei hovin tharum thawh a buaina an siam avanga hetiang thil hi lo thleng ta a ni.
He thil thleng avanga Manipur Sorkar thil tum chiang tak a lang chu tlangmite chenna hmun engmah pawisak leh midang khawngaihna nei lova laksak a ni. Tlang mite chenna Forest reserve area-a puan a ni ringawt pawh hi Democracy leh Human right palzutna a ni a, hnam tlem zawk leh Tribal te hmuhsitna a nih thu a sawi. Manipur Sorkar hian India Danpui(Constitution of India) a bawhchhiat bakah Democracy ram kan nihna nasa takin a palzut a. Heti ang a nih avang hian MZP chuan a rang thei ang bera Central Sorkar inrawlh vat turin a ngen a ni.
Zohnahthlakte hi Mizoram ah chiah kan cheng lova ram hrang hrangah chengin tlang hrang hrangah thendarh kan ni a. Kan awmna a zirin min koh dan a dang mai zawk a. Tlang hrang hranga cheng Zofate hian harsatna kan tawk mek vek a, he thil thleng avang hian Zofate kan inpumkhatna ti nghettu lo ni zel se. MZP chuan tlang hrang hrang a chengte rorelna hmun khat a kan la awm vek a beisei tlat a. Mizoram pawn a chengte Mizo ah lungawi lohna leh duhkhawp lohna tam tak ala awm thei ang. Inpui nghak tuten kan dawhtheih a ngai tak zet a, engtik ni ah emaw chuan kan la inpumkhat ngei tur thu a sawi.
He buaina hian eng chen nge a nghawng dawn hriat ala ni lova, sahimna duh tam tak an awm dawn a. Inpui nghaktu kan nih angin theihtawpa lo tanpui turin kan inbuatsaih a ngaih thu a sawi. Manipur Unaute huaisen leh chhel taka awm tura fuihin, he harsatna an tawh atang hian impumkhatna tha zawk, inlungrualna tha zawk, induhsakna tha zawk lo chhuak ngei se a duh thu a sawi.
Zofa hnam hrang hrangte hi Pathian in min awmpui zela, engtik niah emaw chuan min la phuarkhawmin rorelna pakhat hnuaiah kan la awm ngei tur thu a sawi. Unau chu lo inhmel haiin lo inti thiamlo thin mah ila vawiin ni atang hian rilru thar ngaihtuahna thar pu theuh turin kalkhawm te a chah bawk a ni.
He hun hmanna ah hian MSU Regional Hqrs. Lunglei, LGC, GJBC leh Mizoram Polytechnic, Lunglei Students’ Union ten thu an sawi bawk a ni.
Vawiin ‘Peaceful Demonstration On Manipur Conflict’ ah hian hetiang hian Resolution an siam:
1. Manipur Sorkar chetdan hi India Constitution palzutna a nih avangin a rang thei ang berin Central Sorkar inrawlh rawh se.
2. Manipur Sorkar chetdan hi hnam tlem zawkte chimral tumna a nih avangin Central Sorkar-in hma la rawh se.
3. Manipur harsatna/buaina thleng mek ah hian Sakhua hmun leh Biak-in thleng intihchhiat sakna a thlen avangin, India danpui Constitution of India hnuaia Freedom of Religion kalh tlat a ni a. Central Sorkar-in hma la rawh se.
4. Chi leh chi inkara inhuatna thlen chhan chiang taka chhui nise, a mawhphurtu te ah hremna pek ngei ni rawh se.
5. He harsatana avanga chhiat tawk chhungte hnenah zangna dawmna pek nise, hliam tuarte chhawmdawlna Manipur Sorkar hian pe ngei rawh se.
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: