Tangka Sum Ngainat hi Sual Tinreng Bul a ni

(A legal perspective)

- K. Remruatfela

Upper Republic Branch KTP/Master in Business Law

KTP te chuan ram pum huapin sum ngainat hi sual tinreng bul a nih thu kan zir thin a. Nimahsela, heng zirho nikhuaah te hian sawihona hun thâwl tha pawh awm lova a rûn dâl ang leka zir kan nih hlawm thin avangin harh chhuah hawkna tham kan kan zir tâwk lo tlângpui thin niin a lang a. Chuvangin, heti zawng hian tawi kim taka khaikhâwm tum ta mai ila.

Hnam tin hian sum hi chu kan ngaina vek tih phat rual a ni lova. Nimahsela, heti tak maia khaw êng pawh hmu fiah thei lo khawpa Zofaten sum kan bawh ta mai hi a bul berah chuan kan ram economy chhiat vang leh sawrkar tha kan neih tâwk loh vang a ni ka ti lo thei lo. A chhan dang leh pakhat chu KTP hian a dinchhan - Kohhran hnathawh tih puitlin piah lamah activities phuah belh neuh neuh kan ngah si a. Thalai tân lah KTP rawngbawlna hi a lo nuam bawk si nen, kawng lehlama thlirin, chu chuan thalaite kan nih tur ang min nih loh tir phah thin em aw a tih theih a. Zirna kawnga min hnufuam tir piah lamah thiam bik thil neia mahni inhaikaw turin hun thâwl leh hun fianrial min neih tir theih loh phah thin ni te pawhin a lang.

A hrin chhuah zel chu thalaite tân inngahna tlâk eizawnna a vang tial tial a. Lehlamah thil man a pung chak si a. Hei hian a nghawng chu hun rei lo te chhunga hausak phut dan kawng zawn a, awlsam tea sum thawh chhuah dân kawng dap mai hi a ni. Tichuan, thalaite rilruah nu leh pa te pawisa dil reng hi hrehawm tihna a lo awm tan a. Nimahsela, mahni intodelha, eizawnna ngialnghet nei turin kan thiamnain a tlin tak tak tawh thin si lova. Thiamna leh zirbingna nei miah lovin risk market ah kan zuang lut  ve ta rawih a. Vawilehkhata sum hlawm hmuh phut theihna tur a nih dawn phawt chuan tiin financial market-ah zuanglutin, hriat chian loh financial institution hrang hrangah sum kan invest ve ta hum hum a. A tawpah kan talbuai leh thin si a nih hi!

Financial market-a survive tur hi chuan business technique/business skills hi kan hriat ve tak meuh meuh a ngai a. Chutiang kan thiam ve lo a nih chuan zuah luh ve loh mai hi a him ber a. Sum kan nei a, risk kan la ve duh hram a nih pawhin hriat chian financial institution hnuaia mutual fund tih hi a him ber. Mahnia lo inhai ve bawrh bawrh hi a him lo! A nihna takah chuan Stock Exchange velte phei hi chu skills ngai ve tak tak a ni a. SEBI/ FEMA/ IMF/ FDI/ TRIPS/ GATT etc vel awmzia hre thiam lo leh Japanese Candlestick tih vel follow thiam lo tân phei chuan mahni tâwka financial market-a zuan luh ve mai mai chi a ni lo tak zet! Mizote hian risk hi kan la huai mah mah thin a. Kan beidawn tawh fe hnuah lo chuan a thiam zâwkte thurâwn lâk hi kan hreh thin si a. Chhungkaw tam tak chu a keh chhe mek zel a nih hi! A pawi ngawt mai. 

KTP active member tak tak zingah te pawh hriat chian loh financial institution hnena sum lo chiah puam ve ringawt te, a pung awma mi pawisa lo pûk emaw lo pûk tir ve ringawtte hi kan awm leh nawlh thin a. Tangka sum ngainat hi sual tinreng bul a ni tih kan infah uar nasat lehzual a pawimawh hle. A pung awma mi pawisa pûk tir theitu chu Section 4 of "Money Lenders and Accredited Loan Providers Act, 2010" (Act No. XXIII of 2010) in a sawi anga license neite chauh an ni a. Chung anga license nei ve lêm lo ten a pung awma mi pawisa kan puk tir ve ringawtte thin hi chu a nihna takah chuan dân bawhchhiatna a ni tih pawh kan in zirtir thar a pawimawh hle. Mi tin i fimkhur tlâng ang u. 

Tangka sum ngainat hi kan Pathian lehkhabu pawhin sual tinreng bul a ni a lo ti si a.

.

Share it with your friends!

 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]

EXPLORE MIZORAM

https://www.exploremizoram.com

email: admin@exploremizoram.com

Telegram channel:

https://t.me/exploremizoramchannel

FB page: https://www.facebook.com/exploremizoramportal

FB Group: https://www.facebook.com/groups/exploremizoram

Twitter: https://twitter.com/exploremizoram

Instagram: https://www.instagram.com/explore.mizoram

Youtube Channel: https://www.youtube.com/channel/UCyNrX06aSZ26HkIB25eo1YQ

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

(He website kal zel theih nan hian fakna lo langte hi i lo hmet ve thin dawn nia.)