Naktukah Union Home Minister lo zin dawn; Aizawl bawrhsap-in mipuite hnena ngenna a tichhuak

Aizawl | March 31, 2023: Union Home Minister Pu Amit Shah chuan Ni 1.4.2023 (Inrinni) hian Mizoram a rawn tlawh dawn a. He hun hi Mizoram mipuite tana hun pawimawh leh hun rei tak atang tawha kan lo thlir a ni a. Hemi ni hian Mizoram tana mellung pawimawh tak tak Infrastructure Project leh Assam Rifles te awmna tur Zokhawsang hmun biak-hmuh theihna kaltlangin a hawng dawn bawk a ni. Hemi hunah hian Aizawl mipui zawng zawngte Union Home Minister zahawm tak hi mahni remchan dan angin lo lawma lo hmuak turin Aizawl DC chuan a sawm a ni.

Union Home Minister hi ruahmanna lawkna ang chuan dar 1 PM ah Lengpui Airport a lo thleng anga, dar 1:30 PM - 2:30 PM-ah AR Battallion Headquarters Complex Zokhawsang lungphum bakah Infrastructure Projects pakaw (9) dang a hawng tel anga, tlai dar 4:20 PM-ah Mizoram a chhuahsan leh ang.

DC chuan dan leh thupek kengkawhtu ten thupek an chhuahte tha tak a zawm turin mipuite a ngen a. Bazarpui ni a nih avangin Bazar kalte pawhin Hon'ble Union Home Minister carcade a kaltlang laiin a theih danin lo lawm turin mipuite a sawm bawk. Carcade in a rawn tlan tlang chhung hian Bazar leh a chhehvelah thuneituten kawng an khar a nih pawhin mipuite hrethiam turin DC chuan a ngen a, kawng kama in sa lai te pawhin an insakna bungrua senghawi tur leh lo chawlsan turin a ngen bawk. VVIP-te leh a thuihruaite tana nungchang mawi tak lantir tur te, mikhualte dawngsawng thiam tak kan nih thin angin thuawih leh mawi tak a lo dawngsawng turin a ngen a ni.

Hemi ni hian ruahsur palh thei a nih avangin he Programme-a tel turte chu nihliap emaw Raincoat emaw keng tel turin ngen an ni a, hei bakah hian an nihna tichiang thei tur Identity Card a remchang ang kengtel turin hriattir an ni bawk. Rawlkhawlhna avanga AR Lammual a hman theihloh a nih chuan Vanapa Hall hi ruahman tel a ni a. Mipui ten thuneitute thuchhuak lo ngaichang tur leh media kaltlanga thupuante lo ngaichang turin Aizawl DC chuan mipuite ngen a ni.

Aizawl District Bawrhsap Dr Lalhriatzuali Ralte chuan a hnuaia tarlan ang hian Union Home Minister Amit Shah in Aizawl khawpui a rawn tlawh huna  mipui ten Kan zawm tur thupek a chhuah.

Dt 1.4.2023 (Saturday) hian Union Home Minister, Govt. of India chuan Aizawl a rawn tlawh dawn a. Venhimna tha taka kalpui a nih theih nan leh Aizawl a rawn tlawh chhunga harsatna a thlen loh nan a hnuaia thupek hi chhuah a tul  a.

Chuvangin, Dt. 1.4.2023 atan mipuite zawm turin hetiang hian thupêk a chhuah e:-

1. Heng hmun-Head Post Office, Treasury Square, Aizawl atanga Raj Bhavan chhimlam gate inkarah leh Tennis Court atanga Treasury Bazar inkarah hian vantlang, politics, sakhuana leh thil dang vangin mi 5 (panga) aia tam punkhawm leh bengchheng siam te khap tlat a ni.

2. VVIP kalna tur kawng Thuampui Helipad leh Raj Bhavan inkarah mi tumahin kawngpui hrulah insak hna an thawk tur a ni lova. Insakna bungrua eng chi pawh an chhawp hnawk tur a ni lo.

3. Assam Rifle Ground (Lammual) leh Raj Bhavan ah leh VVIP Route i.e Thuampui Helipad to Raj Bhavan inkar ah Remote Control hmang Drone/Aerial Camera leh hetiang lam chi reng reng thlawh tir khap a ni. He thupek bawhchhia an awm a nih chuan an Drone/Aerial Camera te man/kahthlak sak a ni ang a, an chungah dân angin hremna lek a ni ang. Hei hian Police thuneitute leh venhimna lam thawktute a huam lo ang.

4. Bungbangla leh a chheh vela quarry nei ten lung an hal tur a ni lo.

5. Bazar Ni anih avangin bazar leh a chhehvelah bazartute leh bazar kaihhnawiha chetvelna ah tumahin dan leh thupek kengkawhtute tan harsatna an siam tur ani lo.

Competent Authority in phalna a pek bik te erawh he thupek hian a huam lovang. Thupek bawhchhia te chu IPC Sec. 188 hmangin an chungah action lak a ni ang.

..