MIZORAM STATE DAY PUAL | Statehood hi tu thawhrah nge?

- K Remruatfela

Vawiin hi Mizoram State day a ni a. He ni a lo thlena kan hriatreng tur pawimawh tak chu, IPS hmingtha tak, Prime Minsiter Indira Gandhi Special Guard pawh lo ni hial thei, Pu Lalduhoma chu Mizorama remna leh muanna a awm theihna turin kum 1984 khan IPS hna bansanin Mizoramah a lo haw a.  A hova remna leh muanna awm theih nana rei tak beih a nih hnuah ramhnuaia awm mek, Pu Laldenga hote pawh chu kum 1986, June ni 30 khan an silai lo tungin India Sawrkar nen remna thuthlung (Memorandum of Settlement) an ziak ta a.

Chu an inremna thuthlung ‘Memorandum of Settlement’ an tihah chuan India Danpui hnuaia inbiakrem theih remtih a nih vangin Mizote chu ‘Union Territory’ atangin kum 1987, February ni 20 khan State puitlingah hlankai kan lo ni ta a. India danpui pawh a vawi 53-na atan siamthat niin ‘The Mizoram State Act, 1986’ (Act no 34 of 1986) tih chu a lo piang ta a. Chumi chang 4-na  ang chuan Mizoram dinhmun thar pawh India Danpui Art. 371G ah dahluh a lo ni ta zel a.

Tin, The North Eastern Areas (Re-Organisation) Act 1971, chang 6-na angin U.T. kan nih laia ramri chu state ramri atana rin nghal a ni ta bawk a. India danpui First Schedule - 11, entry 8-naa awm thin Mizoram pawh khimi Schedule tho 1-na, entry 23-naah dah a lo ni ta bawk a. Chutichuan, kum 15 lai mai lungsi taka kan lo awm tawhna ‘Union Territory’ dinhmun chu kan lo vuiliam leh ta bawk a ni.

Mizoram Chief Minister hmasa ber, Pu Ch.Chhunga`n Mizo Union Party ten State aia Union Territory hnuaia awm phawt an thlan zawk thu a sawina tawngkam hmang hian tlang ka`n kawm ang e:-

State hi zawng kan naute rammu-in an rawn hawn atan i khek ang u. Independence hi chu an hmu dawn lo tih a chiang a. Nakinah rawn haw chhan tur an neih loh hlauh chuan hnam pumpui tan a tlawm thlak dawn em mai a. Pasaltha sairam chhuak an hlawhchham a, mahse haw kawngah Sazuk Sakhi an rawn kap haw a, kutbeng em lova an lo haw ang hian an Sazuk Sakhi rawn kah haw atan i zuahsak ang u.

.