ZOFATE JERUSALEM

byAdmin — 0
- Manga Thomte
Ph. 8974418804
Email: mpthomte@gmail.com

Politician, NGO hruaitute leh Hnam vei deuhte chuan Zofate Jerusalem tih tawngkam hi an hmang rim hle a. Chutiang hmangtute chuan an hman dan leh an sawi tum pawh a inang lo hle ang a. An hman dan pawh a inperhsan hle ang. 

Jerusalem hi eng ang taka pawimawh leh tangkai nge tih, Pathianthu zir leh a hmuna chenchilh kan nih loh avangin kan hre thuk lo hle a. Chutih laiin; "Mi ramahte chuan Lalpa hla engtin nge kan sak theih ang? Aw Jerusalem, ka theihnghilh che chuan, Ka kut ding lam hian a thil thiam hi theihnghilh ve rawh se. Ka hriat reng loh che chuan, Ka lei hi ka dangah bet tlat rawh se; Ka hlimna ber aia Jerusalem ka duh zâwk loh chuan." Sam 137:4‭-‬6 atang hian Juda hoin an khawpui ber Jerusalem an ngaih hlut zia a lang chiang hle a ni. Tin. Bible chang hmun dangah pawh Jerusalem pawimawh zia leh a tangkaina hmuh tur tam tak a awm. 


Jerusalem hi Juda hnam tan a pawimawh em em a, an sakhua in tanna leh innghahnaah an ngai a, an hnam nen inzawmna thuk tak neiah an ngai bawk. Kum 1948 a Israel ram a pian dawn pawh khan hmun pawimawh tak a ni ta zel a. Tun hun thlengin Arab te nen inchuhin, khawvel ngaihven a ni ta reng a. Kum 2017 khan khatih hun laia US President Donald Trump-an Israel khawpui atan Jerusalem an pawm thu a puang a nih kha. Juda ho tan chauh ni lo, Christian leh Muslim sakhaw vuantute tan pawh hmun pawimawh a ni ta zel bawk.

Heti taka Juda te tana khawpui hlu, an ram leh hnam leh sakhaw hmun pawimawh Jerusalem hming chu hawhin; Mizoram khawpui Aizawl chu Zofate Jerusalem hming kan put tir a, a thenin Mizoram State pumpui sawi nan Zofate Jerusalem an ti ve bawk. Mizoram hi Zofate zawng zawng lenna, khawsak hona, inhumhimna leh an inpui a ni tih sawifiah nan an hmang bawk. 

Ni e, Mizoram hi eng ang taka Zofate tana tangkai nge ni ang? Mizoram-ah Zofa hnam hrang hrang an him tawk em? Mizoram hi Zofa zawng zawngte tan Jerusalem a ni meuh em? Belh tlak a ni em. Nge Jerusalem ni turin kan inhawng tawk lo? Nge ni a, tuna kan awm dan hi kan lungawi tawk. Kan unaute tihbuai leh chim buai loh hian kan lawm tawk viau em? tih hi ngaihtuah ngun ngai tak a ni. 

Mizoram hian kum sawmhnih zet mai zalenna sualin, hnam pasalthate nunna tam tak a luangral a. Mi nawlpui pawhin a tuar hle a, chung hun lai chuan kan thenawm ram Zofate chenna hmun chu a thei theiin in humhim nan an bel hlawm a. A then khaw chhak lamah, a then khaw thlang lamah, a then chhim leh hmar lamah an tlanchhia a. Mahni remchan ang angin kan chhehvel a kan unaute kan bel hlawm a ni. Chu hmuna cheng zuita leh awm nghet ta pawh an awm nual nghe nghe. Chu Mizo hnam Movement chu kan chhehvel a kan unaute hian an tuipuiin, beiseina nen a thenin an lo tawiawm ve bawk a. Khatih laia E Pakistan (tuna Bangladesh) a Zofate pawhin hnam pasalthate tha takin an lo dawngsawng a. Unaute tiin an theih tawkin a lo mikhual a, an duat ve bawk a ni. 

1986-ah Mizoram chu India hnuaia State pakhat niin, remna leh muanna a lo awm ta a. Mizoram chhunga Zofate hlim leh lawm taka kan awm laiin, kan chhehvel a Hnam Movement in a tihbuai, beiseina nena lo thlirtute tan chuan beidawnna a ni thung a. A thente phei chuan phatsanah an in ngai hial a ni. 

Hun a lo kal zel a, kan chehvel a kan unaute chuan hun hrang hrang an hmachhawn ve zel a. Hnam lian leh chak zawk kara khawsa an nih avangin an din khawchhuah nan an bei ve hlawm a, an thiam ang angin hma an la ve a. Manipurah kan unaute anmahni leh anmahni karah harsatna a awmin, Mizoram-ah an lo zualko a. Ban pharin remna a awm theih nan hma kan la a. Hnam dangte nen harsatna an neihin kan pui bawk thin. Chumi nghawng avang chuan Mizoram-ah tam takin himna an rawn zawng a. Ngiahban tlangdung (Haflong, Assam) a kan unauten hnam lian zawkte nen buaina an tawh avangin, himna zawngin tam takin Mizoram an rawn bel leh a. Buaina a reh hnuah pawh awmzui ta tam tak an awm bawk. 

Tripura lama kan unauten harsatna an tawhin, an vauchher leh thlamuanna awmchhun chu Mizoram a lo ni leh a. Zampui tlangdunga kan unaute thlavang hauh nan Mizoram Chief Minister hlui Pu Hawla'n ".....Kan unaute chunga harsatna siamtu apiang chu pialral thlengin kan umzui zel ang" a tihte pawh a lar em kha maw! A thu mai ni mahse kan unaute tan chuan a thlamuanthlak hle ang.   

Tun hnai kum hnih khat kalta leh vawiin chauh pawh han thlir ila; Assam awp chhunga Zofate hlang taka an khawsakna, Thangram (Cachar tlangram 180 Sq. Miles) chhunga cheng ten an awptu sawrkar atanga ngaihsakna leh enkawlna an dawn loh avangin leh nektu hnam dangte laka an damkhawchhuah nan Movement an kalpui a. "Kan unaute (Mizoram) lamah kan bet tawh mai ang e" tiin theih ang angin ke an pen a. Assam sawrkar ngaihtuahna pawh an tibuai hle a, an chep phah hle. He an movement-ah hian an rinchhan leh an innghahna ber chu Mizoram hi a ni. 

Chu mai a ni lo, Myanmar a kan unauten harsatna leh buaina nasa tak an tawk mek a, an himna leh thlamuanna awmchhun chu Mizoram chauh hi a ni a. Zep thu a cheng lo, nunau atanga an ram that laia mi pawimawh tak tak thlengin thahnem tak kan mikhual mek a. Kan unaute tiin kan lo kuangkuah mek a ni. Tunah Bangladesh a kan unauten an dinhmun leh chanvo humhim tumin silai keng meuhin chet an la leh ta a. He movement avang hian nunau leh mipuiten an tuar lo thei lova. Mizoram lam panin an rawn tlanlut leh mek a, a intan dawn chauh ni pawhin a lang.  

Heng Zoram hmun hrang hranga thil thlengte hi a tuartu tan hreawmin na viau mahse, Zofate Jerusalem (Mizoram) hlutna leh pawimawhna lantirtu a ni a. Juda ten Jerusalem an ngai ang hian, Zofa hnam hrang hrangte'n Mizoram hi inhumhimna kulhbing sang a ni tih an hmufiah a. An rawn pankhawm mek zel a ni. Siam chawp ramriin a daidan Zofate kan inpawh lehzual theih nan te, harsatna phena kan in hmangaih tawn theih nan leh inpumkhatna tha zawk kan neih theih nan, heng harsatna te hi hmang thei hlauh ila a duhawm hle. 

Heng kan unau, kan sutpui vuana lo tlanlutte himna leh dinhmunah hian mawh kan phur a. Lo kuangkuah a, lo tuamhlawm hi kan kuta awm a ni. Mizoram-ah tu pawh sawrkarin, tu pawh Chief Minister se kan chhehvela kan unauten an Chief Minister leh an sawrkar ang maiin an lo en ve zel a. A sawrkar ang pawhin heng kan unaute tuamhlawm kawngah hian mawhphurhna lian tak kan nei a ni. Nakinah eng nge lo thleng zel dawn kan hre lova, kan unauten min mamawh hun apianga chhanna tha tak pe zel thei turin kan lo inruahman lawk pawh a tul hle ang. 

Israelfa ten an ram an pankhawm ruih ruih angin, Zofate Jerusalem hi kan unauten harsatna an tawhin beiseina sang tak nen an rawn pankhawm thin a. Malsawmna tam tak dawnga awm mek leh thlamuang taka inpui nghaktu keini hian kan unaute kan lo kuangkuah a. An harsatna leh mangannate atanga chhanchhuah hi kan mawhphurhna lian tak a ni a, chu chu kan unaute min beiseina pawh a ni. Sawrkar chauh a ni lo, mipui mimirte pawh hian Zofate Jerusalem/ Zofate inpui kan nihna hi kan chian lehzual a ngai a. Unaute pankhawm leh belh kan nihna hi chhuang tak chungin, rilru zau tak kan put a tul a. Kan unaute kuangkuahtu nih theuh kan tum tur a ni ang. 

Tunah hian Mizoram bela awm kan unaute hian kan inpawh lehzual nan tiin Lusei/ Duhlian tawngte hi an zir mek zel a, kan tawng hian nasa takin hma a sawn phah ve mek bawk. Chutih laiin Zofa tawng hrang hrangte luangkhawmin Zotawng, kan zavai luankhawmna tawng a siam dawn avangin kan in pawm tawn sak vek rih hi a pawimawh hle a. Hei hian hnam lian leh ropui takah min siam ngei a rinawm. 

Chutih laiin, Zofate Jerusalem kan tih chhungah hian Zofa ni miah lo Tuikuk leh Chakma-te nasa takin an pung mek zel a. Electoral Roll revision neih apiangin a za tel, a sang telin an pung thur thur reng a. Piang pung an nih hi a buaipuitute ngei pawhin an ringhlel thin. Hetiang a nih mek lai hian, chhan hrang hrang avanga Zofate Jerusalem lo bel, Zofa dik tak ten kum tam tak hnuah pawh Mizoram Electoral Roll an lut hlei thei lo leh, dan an ni fo thin hi a pawi hle a. Ram leh hnam leh khawtlang hmangaiha inchhal, thahnemngai tak takte kan in enfiah a tul hle a ni. Mahni thisen zawmpui unaute laka in la fekfawn em em a, hnamdang- nakin lawka kan tana hling ni mai turte pawmzam thiam tak kan nih chuan kan tihsual mawh kan phur zo lo mai ang tih a hlauhawm hle.

Zofate Jerusalem, Mizoram hi tunhma zawng aiin kan unaute hian an ngai a. An rawn in ti neitu tulh tulh tih a chiang a, an harsatnaa puih mai bakah heng an mamawhna apianga an hmaa ding ngam turin kan rilru siam ila. Heng buaina hrang hrang tena a ken tel, khawtlang leh ram duh loh thil a lo awm palh a nih pawhin dan anga chinfel mai hi kan tih tur a ni ang.


(He thu ziaktu Manga Thomte hi MZP General Headquarters-ah Assistant General Secretary dinhmun chelh lai mek a ni.)







(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post