Assembly House-a hemi issue discuss hunlai kha ka thesis thilah ka buai lai tak a nih avangin ka lo ngaihven ve vak hman lova. Tlai khawhnuah a hlawmin Assembly debate leh post/comment zawng zawng ka rawn chhiar chhuak vek a. Chuta ka comment chu hei hi a ni.
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
1. SVAMITVA scheme hnuaia tempopary pass te Property card pek a nih tur hi chu rural area tana PMO launch a ni a. Nimahsela, kan ruling MLA te tawngkamah kha chuan hemi Mizoram Revenue Ammendement Bill in ram neitute hamthatna tana a telh thar ang lek lek khan an sawi deuh a. Hei hi eng nge awmzia? Kan ruling MLA te tawngkam anga hemi bill in a ken tel thar a nih si chuan Pu TBC-a zawhna ang deuhin sawrkarin ama ram, a duh hun huna compensation pek pawh ngai lova a acquire theih thin chu, bill pass a nih atang chuan temporary pass holder ten land ownership an nei tawh ang a, chumi atangin 15% share a chang leh chhawng ringawt ang a. A tul lovah mimal vur nan 85% zet sawrkar sum chu a luan ral phah zel dawn tihna a ni mai ang em? Chuti ni lova, hemi Bill in a ken tel vang ni lova, SVAMITVA scheme in a tih vang zawka temporapy pass holder ten land value atanga compensation an dawng thei ve tawh dawn a lo nih zawk chuan sawrkarin ram neitute chan atangin 15% cess a lo lâk heu sak tihna a zawk dawn a. Ram neitu, mi rethei zawkte hamthatna zawk tur anga an sawi kha chu a dik thei lo ang.
2. Kan hriat theuh angin Mizoram Land Revenue Act pass lo nih tawh kha hman theih loh tiin Court in a lo hnawl tawh a ni a. Hnawl a nihna ground hi Act-a awm lo, Rule-a a awm si vang tih kha ruling lam sawi dan a niin a. Tin, court in a hnawl lova, hemi Central Act hi Mizorama an lo enforce ringawt hi Art.371G kalh a nih vanga Supreme Court-a Appeal mek a ni a. Chumi vanga hnawl ni lovin sub-judice zawk kha a ni tiin Pu Riachho leh ruling lamte sawi dan kha a ni deuh bawk a. Land law kaihhnawih Central Act reng reng te hi Mizoram Legislative Assembly te remtihna lo chuan hman theih a ni lo tih ang zawnga Art.371G interpret hi a dik chiah em tih hi ngaihtuah chian ngai tak a ni bawk. Art.371G of the Indian Constitution hi a nihna takah chuan kan chanvo sa, Con-current list thual nawnna mai mai a ni a. Hemi Act hnuaia No. iv in a sawi tak anga lang hi chu a nihna takah chuan tribal area-a tribal ramte hi Central in a duh duhin neitu nihna (absolute ownership) a inbel tawp tawp thei lovang tihna ang deuh chauh a ni a. Chuvangin, Union list nghawng thilah hi chuan State sawrkar hian Central Law hi a ngaihthah tawp pawp thiang bik hauh lo! Chu chu Unitary in spirit a nihna tak pawh a ni.
3. Political thinker lar, Jean Jacque Rosseau chuan, sawrkar hian mimal aiin state a dah pawimawh hmasa zawk tur a ni a. Individual interest aiin state interest hi a lal zel zawk tur a ni a ti a. Hetiang zawng zawng ngaihtuah hi chuan mimal invur lam hi ram hmasawnna zel atan chuan a tha ber lovin ka hria. Ram neitu ni lo na na, ram hlutna compensate lo pek ve ringawt hi chu good governance kalphung tur niin ka hre thei lo. Sawrkar a hausak phawt chuan mipuite pawh hi kan nuamsa ve nghal a ni mai a. Sawrkar aia mimal hausa an awm hian sawrkar tha ti-a sawi a ni ngai lo. Chuvangin tuna kan bill pass tâk hi Central lam hian an pawm kher ang em tih hriatthiam har ka ti!
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
Post a Comment
He post chungchanga i ngaihdan lo sawi ve rawh: