Ticker

10/recent/ticker-posts

Mizoram Police-in Mizoram Home Guards & Civil Defence hnenah silai leh a mu hlan


Aizawl, 23rd August, 2022: Mizoram Police chuan vawiin khan Mizoram Home Guards & Civil Defence (MRHG&CD) hnenah silai leh a mu thahnem tak an hlan a, silai hlan zat hi SLR (Self-Loading Rifle) 200 leh INSAS (Indian Small Arms System) 100, avaiin 300 a ni a. silai pakhat hian magazine 4 (magazine pakhatah hian silaimu 20 zel awm) a chhawm tel theuh a ni.


Silai leh a mu hlanna inkhawm hi Home Minister Pu Lalchamliana’n a telpui a, a hriatpuinain inhlanna certificate ziah a ni a, Mizoram Police aiawhin Pu John Neihlaia. IPS, IGP (Hqrs), in hminga ziak a, Mizoram Home Guards & Civil Defence (MRHG&CD) aiawhin Maj. Zosangliana Hualngo, Commandant General-cum-Director, MRHG&CD in hming a ziak thung a ni.

Silai inhlanna inkhawm GS Arya Mess, PHG, Aizawl-a neihah khuallian Pu Lalchamliana chuan Mizoram Police in MRHG&CD hnena silai an hman lai reng, la tha tak tak an pe chu thil lawmawm tak leh chhinchhiahtlak tak a ni, a ti a. Hun engemawchen atang tawh khan MRHG&CD hnena silai hlan hi a tul tihna a awm tawh a, amaherawhchu sawrkar kalphung dan leh hrai zawm a ngaih thin avangin kan beisei aiin hun a duh rei a ni, a ti a. An hman lai aia tha zawk silai an neih chuan MRHG&CD te pawhin inrintawkna, phurna leh tha thona a pek ngei a beisei thu a sawi bawk a ni.

Home Minister chuan kan phak tawkah ralthuam leh hmanraw tha kan neih hi a pawimawh a, Mizoram Police pawh hian silai leh ralthuam a tha thei ang ber nei se tih hi ka duhthusam a ni a, a theih chin chinah hma kan la zel bawk a ni, a ti a. MRHG ah hian a ngheta thawk 200 an awm tling lova, volunteers te nen 1000 bawr vel an awm a, India ram State tinah an dinhmun hian duhthu a la sam lo hle a, tunah pawh hian MRHG volunteers tur mi 11 chuang zet lak belh kan dil mek a ni, a ti.

Civil Defence lam tihchak tumin MRHG Directorate-in hma a lak mek thu leh reiloteah Mizoram chhung hmun hrang hrangah phuisui zawka din theih beisei a nih thu khuallian hian a sawi bawk a ni.

Maj. Zosangliana Hualngo, Commandant General-cum-Director, MRHG&CD pawhin silai an mamawhna leh a tul zia an hriatthiampui avangin Home Minister leh Mizoram police chungah lawmthu a sawi a. Tuna silai an hman lai mek .303 rifle leh sten gun te chu Mizoram Police ten an lo pek tawh tho a nih thu leh a hlui deuh tawh avanga silai tha zawk an mamawhna a nasat lai taka hetianga pek an ni ta chuan MRHG & CD te pawh inrintawkna a pek belh bakah, tun aia tha leh awmze nei zawka an duty theih phah a beisei thu a sawi bawk a ni.

Silai leh a mu inhlanna inkhawm hi Pu John Neihlaia. IPS, IGP (Hqrs), in a kaihruai a, Pu Lalbiakthanga Khiangte, IPS, DIGP (Hqrs) in lawmthu sawina in a khar a ni.


- DIPR
Post i hmuh dan

Post a Comment

0 Comments