Ticker

10/recent/ticker-posts

NABARD sum hmanga sikul thawmthat hna thawk mekah - "a nih tur ang ni lo mai ni lovin, a hna hrim hrim thawh mumal loh leh chhe tak tak hmuh tur a awm nual," - MZP

Aizawl | Feb 3, 2022: MZP General Headquarters president Lalnunmawia Pautu chuan vawiin khan press club ah thuthar thehdarhtute kawmin, NABARD sum hmanga sikul thawmthat hna thawk meka hna chhiat thu sawiin, "a nih tur ang ni lo mai ni lovin, a hna hrim hrim thawh mumal loh leh chhe tak tak hmuh tur a awm nual," a ti.



Video:



MZP President press statement kimchangin:

Mizoram sawrkar chuan NABARD sum cheng nuai 3,500 a puk hmangin, sikul thahnem tak chei that leh sak that hna Mizoram chhung hmun hrang hrangah a thawk mek a. He thil hi Mizoram leh a bik takin zirna (education) tihhmasawn kawnga Mizoram sawrkar hmalakna ropui tak a ni a, MZP pawh he hmalaknaah hian kan lawm em em a. Chutih rual chuan he thil hi a nih dan tur ni phak silovin, tuten emaw hlawkna nasa tak an neihna hmanrua mai a ni ang tih kan hlauin, a nih dan tur ang a ni pha lo ang tih MZP chuan a hlau em em a ni. Chuvangin, MZP chuan theih ang angin he thil hi a enzui bakah a zirchiang a. Thil lawmawm tam tak awm ve bawk mahse a nih tur ang ni phak lo leh siam that ngai a hmu nual a ni.
Sikul sak hna thawk tur hian Consultancy Firm pahnih; CB Engineering leh Allied Concern te thlan an ni a. CB Engineering hian reconstruction cheng nuai 2,500 an chang a, Allied Concern hian reparing cheng nuai 1,000 an chang thung. Reconstruction-ah hian sikul 65 leh Repairing-ah hian sikul 107 a awm a, a vaiin sikul 172 te thuam thatna tur a ni. 
MZP General Headquarters chuan heng NABARD- Rural Infrastructure Development Fund (RRIDF) -XXIV leh XXV sum hmanga sikul tih changtlunna tura hnathawhte hi a hmunah a theih chin chin a tlawh a. Sikul 25 tlawh niin, MZP Headquarters, Sub Headquarters leh Branch-te hnen atangin sikul 24 report dawn a ni a. Phone hmangin sikul 50 vel zawhfiah a ni bawk. Heng kan zirchianna atanga kan hmuhchhuah tlangpuite chu hetiang hi a ni.
1. MZP in a endikna atangin, hna tha leh lungawithlak engemaw zat hmuh a ni a. A project bakah sikul mamawh khawih tel a awm bawk. Tin, a project ang ni lo mahse sikul lam hotute leh khawtlang hruaitute nen sawihoa sikul mamawh sak nana siamrem pawh a awm a ni. (Entir nan- i) Govt. Bengkhuaia H.S (Adhoc Aided) 8 lakhs hi repair tur a ni a. Sikul thuneitute nen inbe rawnin Staff room tur building thar sak a ni. ii) Govt. Midland Comprehensive School (Serchhip) 10 lakhs pawh repair tur ni mahse class room an mamawh zawk avangin room-4 sak thar a ni.)
2. A tlangpui thuin a nihna tur ang taka kalpui hi a tlem hle a. Drawing leh a sanction amount nena en mil phei chuan a lungawi thlak loh hle. RTI Act  hmanga kan zawhna, Education Department-in min chhanna atanga a lan danin, repairing bikah repair tur hi detail taka inziak a awm lova. Contractor-in ama duh dan leh tha a tih ang angin a repair mai niin a lang. Sikul thuneitute nena inrawn a, project ang ni lo, an ngaimawh zawng siamthat sak pawh a awm. A chung thlak tura tih (Roofing) ni mahse, rawng hnawih thar tawp hi a tam em em a. (Entir nan- Govt. Mizo H/S Khawhai (8 Lakhs) repairing chu, a pawp lai chauh chepthla a, thawm that a ni).
3. Sikul repairing tam zawk hi, a langsar thei ang ber tura a chung leh bang rawng hnawih thar a ni tlangpui a. Labour Cess, GST leh Cut tur neuh neuh cut ngaite cut hnuah pawh, Estimate Amount atanga a lan danin 20% pawh hman lohna tur sulhnu a awm nual a ni.
4. Hna hi an inhlanchhawng nasa em em niin a hriat a. A hna thawk tak takte kutah pawisa a lut tlem hle a. Hna thawktu chuan a thawh hlawh a hmu tur a nih rualin, uchuak taka hlep tumna a awm em aw a tih theih.  (Entir nan- i) Govt. Pangzawl M.S-1 reconstruction estimate Rs. 30.49 lakhs hi a thawktu tak tak ten Rs. 20.1 lakhs in an thawk a. Hetiang hian hnathawk tak tak tute kuta pawisa thleng hi estimate atangin a tlem tawh thin hle. ii) Khawzawl H.S-ah pawh third party-in a thawk a, Rs. 21.33 lakhs estimate a nih laiin a thawktu tak takin hnathawh nan nuai 10 vel chiah a hmu a ni.
5. A nih tur ang ni lo mai ni lovin, a hna hrim hrim thawh mumal loh leh chhe tak tak hmuh tur a awm nual a. (Entir nan- Govt. Khamrang P.S. (18 lakhs), darthlalang fit kim loh, kawngkhar pawh kalh theih loh niin, cement plaster ni lalain rawng hnawih nghal a ni a, khawtlang pawh an lungawi lo hle. Chuti chungin SDEO in Completion Certificate a pe chhuak a, Contractor-in zirtirtute sawnah a vau bawk.)
6. Sikul repairing atana pawisa kal thenkhat chu a daih lo anga sawiin, School Fund thawh belha sak chhunzawmte pawh a awm a ni. Hna zawh mumal loh, laklawh deuha kalsan te pawh hmuh a ni. (Entir nan- Govt. Selluaii M.S (Kolasib) ah hian rawnghnawihna tur a daih loh avangin Sikul fund an thawh belh.) 
7. Consultancy firm-te hian work supervisor turin mimal leh pawl hrang hrangte hnenah an pe chhawng a. Chungho zingah chuan a tam zawkin hlep neiin an hralh chhawng ve leh a. Hetiang hi a nih avangin, a thawktu tak tak tam zawk ten project amount leh project nihphung (drawing) an hre lo hrim hrim a. Hei hi hna chhiat chhan bul ber niin a lang. Hetianga hna hralh chhawn hi Mizorama sorkar kan neih tawhte thil kalpui dan a nihna lai a awm a, siam that theih a chakawm tawh hle.
8. MZP in he thil hi nikum lam atangin a buaipui tawh a, hnathawhna hmuna endik a nih hnuah pawh Education Department leh Contractor-te chuan project nihphung chiang taka min hrilh theih loh avangin, RTI Act hmanga document hrang hrang dil a ni a. Hei hian kan hmalakna a tih muan phah hle a ni. Hmun pakhat kan tlawhnaah phei chuan, MZP hnenah engmah hrilh lo tura tih an ni.
MZP chuan he thil hi a la thutakin a ngaimawh takzet a, nimin lamah Education Minister zahawm tak leh official te nen pawh kan sawi ho tawh a. Kan zirchianna atang kan hriat tlangpui kan tarlan takte hi siam that a nih ngei hi kan duh takzet a. Zirlaite tana ding kan nih angin Mizo zirlaiten zirna in tha tak an neih ngei theih nan, NABARD sum hmanga zirna in sak tha lote hi a rang thei anga siam tha a, Education Minister zahawm takin hnathawh tha lote chu siam that an tum thu leh, siam that a nih hma chuan bill pek an tum loh thu a sawi angin, siam that a nih hnuah chauh bill pawh pe turin kan ngen nghal bawk a. Zirna in thuam thatte hi MZP chuan enzui zel pawh kan tum dawn a ni. 

Issued by: Mizo Zirlai Pawl, General Headquarters, Aizawl
Post i hmuh dan

Post a Comment

0 Comments