71st Junior National Basketball Championships, 2022 atan Mizoram mipa team fehchhuak

Aizawl | January 1, 2022: Basketball Federation of India (BFI) buatsaih 71st Junior National Basketball Championships khel turin Mizoram team te'n vawiin chawhma khan Mizoram chhuahsanin Indore an pan.


Basketball Federation of India (BFI) buatsaih 71st Junior National Basketball Championships chu January 4 – 10, 2022 hian Indore, Madhya Pradesh ah neih a ni dawn a. Mizoram Basketball Association (MBBA) chuan Mipa team Mizoram aiawh tur te January 1, 2022 hian a tir chhuak a ni.


Tournament Kalphung:
Senior National anga zone panga inthen kha awm tawhlo in India ram puma state hrang hrang te an fuankhawm dawn a ni. Mizoram team hi Level 2 ah awmin bul an tan dawn a ni.



Inpuahchahna:
November 13, 2021 a Selection neih a nih zawh hnu atang khan inpuahchah tanin tum 35  aia tam mah chu an practice ho hman a ni.


Head Coach Vanlalnunsanga chuan, “Kan theihtawpa kan inbuatsaih ve na te tihlawhtling ngei turin kan thawkchhuak dawn a ni. Hnamdang lakah kan zam dawnlo bakah Speed, Accuracy leh Fitness ah min tluklo hial zawk maithei a ni. Tun hma aiin san zawngah hma kan sawn deuh bawk avangin kan theihna a tam phah bawk a. Tun North East Senior lama kan U te ho champion hian nasa takin min pui bawkin ka ring. Engpawh nise Pathian kutah kan innghat tawp a ni” tiin team dinhmun a sawi a ni.


Team Bihchianna:
Kum naupang tak la ni hlawm mahse Mizoram leh National level lama tawnhriat lo nei tawhte an ni hlawm a. 2019 Sub-Junior National Basketball Championship a Mizoram team champion pui tu te zing a mite awmin, a tam zawk hian Mizoram Super League lamah club hrang hrang aiawhte a lo in lan tawh te anni hlawm bawk a ni. College leh School level lama an team champion pui tawh tute leh ti hmingtha tu te anni bawk.


Coaching Staff lam:
Head Coach hi MSL Club Khatla TBL Coach ni lai leh player ang pawha National Sub-Junior Championship leh MSL lo champion pui tawh tu a ni a. Coaching line lamah FIBA leh WABC Level 1 chhuak leh 4 Weeks Certificates Course in Basketball (CT University & Ballnest Basketball Academy, Ludhiana) nei lai mek a ni.

Asst. Coach hi MSL Club Tuikual South Basketball Club Coach ni lai mek niin FIBA Level 1 leh MBBA Coaching Certificates nei a ni bawk a ni.




Lawmthu:
MBBA chuan Sponsor tu- MOTUL (Leo Enterprise, Tuikhuahtlang), Fenesta (Eldorado Agency, Bawngkawn Sairang Road), Samoo Dawrpui, Mount Carmel School, Chaltlang, St. Joseph Hr. Secondary School, Ramhlun North, Mualhawih Picnic Spot, Khatla TBL Basketball Club, Champhai District Basketball leh Mizoram State Sports Council (MSSC) te chungah lawmthu an sawi.



Mizoram Basketball Association (MBBA) chuan Mizoram aiawha zinchhuak turte tha taka an khelh theihnan leh hlawhtlinna an neih theih ngeina turin duhsakna a hlan a, Mizoram mipui ten lo hre reng tur leh tawngtaina lama lo dilpui turin an sawm.

Team List:
Lalruatkima (C)              - Zarkawt
Vanlaltluanga (VC)              - Saron Veng
Emmanuel VL Awmpuia - Nursery Veng
K. Lalrinhlua - Mission Veng
Lalhmangaihzuala - Khatla East
Lallianmawia - Chawnpui
Lalrinhlua - Khatla
Lawmsangzuala - Ramhlun North
Moses Lalmuanzova - Chanmari/Bawngkawn
Nicholas Lalmuanpuia - Vaivakawn
Rinmuanpuia Chhangte - Salem Veng, Lunglei
R. Laldinliana - Ramhlun Sports Complex

Coaching Staff:
Manager - Michael Zohmingsanga – Khatla
Coach - Vanlalnunsanga – Khatla East
Asst. Coach - Ricky Lallawmkima – Ramthar Veng

Post a Comment

0 Comments