Tuirial By election-ah MNF candidate K Laldawngliana thlang tling

Aizawl | November 3, 2021: Ni 30, October 2021-a 4-Tuirial (ST) Assembly Constituency Bye-election neih tak a vote tlak dan chu nimin chawhma dar 8:00 AM atang khan Govt. Kolasib College-ah chhiar a ni a, MNF Official Candidate Pu K.Laldawngliana chuan vote 5,820 hmuin hnehna a chang a ni.

Vote 17,911 awmna 4-Tuirial (ST) Assembly Constituency Bye-election ah hian vote 14,561 tla in za zelah 81.92 a tla a. Vote tla zawng zawng atanga 39.89% hi Pu K.Laldawngliana, MNF Candidate in a la a, 31.09% hi Pu Laltlanmawia, ZPM candidate in a la a, 26.92% hi INC Candidate Pu Chalrosanga Ralte in lain BJP Candidate Pu K.Laldinthara chuan vote tla zawng zawng atanga 01.69% a la bawk a ni. NOTA hi 61 awm bawk in hei hi vote tla zawng zawng atanga za zelah 0.42% a ni.

Pu K.Laldawngliana hnaih bertu hi Pu Laltlanmawia, ZPM candidate a ni a, a ni hian Vote 4,536 a hmu a, a phak lohna hi vote 1,284 a ni a, Pu Chalrosanga Ralte, INC Candidate hian vote 3,927 a hmu bawk a ni.

4-Tuirial (ST) Assembly Constituency Bye-Election result puan fel a nih hnu hian Dr.H.Lalthlangliana, District Election Officer chuan thutharlakhawmtute kawmin inthlanna felfai kalpui a nih theih nana inbuatsaih dan tlangpui a tarlang a, inthlan kaihhnawih a DEO Office-a thawktute leh Department hrang hrang atanga thawktu pawh chawpte bakah MPF leh YMA-te hmalaknaah lawmthu a sawi a ni.