SINLUNG HILLS COUNCIL CEM THAR LALUT

Aizawl the 24th November, 2021 : Vawiin khan Dr. Lalhriatzuali Ralte, IAS, Deputy Commissioner, Aizawl District chuan Pu Biaknunga chu rinawmna thu tiamtirin Sinlung Hills Council Chief Executive Member thar atan a la lut.

Sinlung Hills Council Chief Executive Member ni lai Pu Lalthlamuana Hmar-in ni 10th November, 2021 a banna a thehluh avangin, ni 23rd November, 2021 a Sinlung Hills Council General Council Meeting -ah Pu Biaknunga, 12-Saiphai Council Constituency chu chuhtu awm lova tlinga puan a ni a. Sawrkar-in a pawm hnuin, vawiin ni 24th November, 2021 khan Sinlung Hills Council Chief Executive Member atan lakluh a ni. He lakluhna inkhawm hi Pu K.Vanlalthiana, Secretary, Sinlung Hills Council-in kaihruaiin, he inkhawm hi urhsun taka hman a ni.

Pu Biaknunga hi Saiphai khuaa piang leh seilian a ni a. Kum 1992 atangin HPC Underground a zawm a. Hmar Peoples' Convention (HPC) leh Mizoram sawrkarin kum 1994-a Inremna, Memorandum of Settlement (MoS) an neih hnua Hmar People’s Convention-Democratic (HPC-D) a rawn pian khan, Deputy Army Chief niin, 2018-a HPC (D) leh Mizoram sawrkarin inremna (MoS) nei a, Sinlung Hills Council (SHC) a rawn din thleng khan he mawhphurhna hi a chelh a ni. SHC Interim term Council-ah khan Deputy Chairman niin, Kum 2019-a SHC General Election-ah khan 12- Saiphai Constituency atangin Council Member atan thlan tlin a ni a. HPC leh MNF thawhhona Council-ah Deputy Chairman hna a chelh mek laiin, Chief Executive Member ni laiin banna a thehluh avangin, ni 23 November, 2021-a SHC General Council Meeting-ah CEM turin chuhtu awm lova tlinga puan a ni a. Ni 24th November, 2021 (Wednesday), 3:30 P.M. hian Aizawl Bawrhsap Dr. Lalhriatzuali Ralte, IAS chuan rinawmna thu tiamtirin Chief Executive Member atan lak luh a ni.

- DIPR