GOLD MEDALIST | MZU B.A Gold Medalist 2021 Nunpuia Renthlei kan belchiang

Mizoram University Bachelor of Arts Gold Medalist 2021 Lalnunpuia Renthlei kan belchiang.


Puia/Bawiha tia koh thin Lalnunpuia Renthlei hi HD Renthlei leh Lalhmingmawii fa panga zinga naupang ber niin, September 6-ah a piang a. Republic Veng, Aizawl-ah chengin an khawsa a, Presbyterian Kohhran-a lawi an ni.

Nunpuia Renthlei te unau hi panga niin mipa 1 leh hmeichhe 4 an ni a, ani hi a naupang ber leh mipa awm chhun a ni.



Nunpuia Renthlei-in Explore Mizoram zawhna a chhannate lo belchiang ve rawh le!

📌 Zirna lam:
 Pawl 1 atanga pawl 10:
- KG-I to Class - IV hi Holy Heart School, Upper Republic, Aizawl ah ka kal a. Class VI leh Class VII hi Gilgal School ah kal leh in Class VIII hi Mount Carmel School, Aizawl ah ka lut leh a. St. Thomas Higher Secondary School, Shillong atangin Class - X Distinction ah pass. School ka kal lai hian Top 10 ah chuan ka lang ve deuh ziah thin a, mahse, Class VI ka nih laiin Maths ah ka fail ve thuai tawh.

Nunpuia Renthlei 
- Pawl 12 hi Army Public School, Shillong atangin Distinction (95.6%) ah ka pass a. Pathian zarah, CBSE (North-East Region) ah Pakatna ka ni ve hram ani. 

 Zirna sang zawk:
- Pawl 12 ka zawh hian St. Stephen's College, University of Delhi ah English Honours ka zir phawt a, mahse, zir zo hman lovin, 2018 khan Pachhunga University College ah Geography Department ka zawm tha leh a, tichuan, 5th Semester ah Political Science ah ka inlet leh. Subject tuina tak zawnchhuah chhung hi a rei ve deuh a ni ang. Tichuan, Pathian zarah tha takin ka zo ta a ni.


📌 I lehkha zir dan?
- Pathian zarah ka vannei em em a. Lehkha chhiar/zir hi phurrit ah ka la ngai lo a, ka hobby pakhat ang maia ka en avangin hun ka neih apiangin lehkha ka chhiar mai thin. Zing tho thei lo ve deuh mai hi ka nia, zan lamah ka meng ve leh ker zawk thin.  Hriatthiam tumin, ka zir chhunah chuan rilru zawng zawng nen ka zir thin a. Exam dawn a zir leh tawk thin ai chuan nitin tlem te te hian zir thin ila, a lo hahdam deuh bik. Consistency hi ka dah pawimawh khawp mai. 

📌 Harsatna I hmachhawn dan? 
 - Harsatna ka neih chuan Pathian hnenah ka thlen thin.

📌 Gold medalist i nihna (Subject) leh CGPA?
B.A (Political Science) ah CGPA - 9.13

📌 Gold medalist ni tura i beih dan? 
- Gold Medalist ni tur ngawr ngawr in lehkha ka zir ngai loa, mahse thiam leh hre hnem ni turin lehkha ka zir thin. Prescribed text ho bakah value-added materials leh current affairs, ka exam answer a ka hman theih tur chi ka chhiar in, ka lakhawm nasa. Ka lehkha zir hma a ka lo tawngtai ve thin na rah ani ber. 


📌 Gold medalist ni tura i beihnaah faculty lamin an ṭawiawm/pui ṭha chein i hria em?
- Faculty te tawiawmna a zara hetiang dinhmun hi thleng thei ka ni a. An inhawngin, classroom mai piahlamah Whatsapp leh phone call thlengin banphak in an awm reng a.  Kan zirlai mai bakah min fuihna thu zawng zawng te kha a thlawn lo tih ka hre chiang em em. Inrintawkna min neih tir mai bakah an thiamna ka hmuh khan anni anga thiam ve chakna min neihtir a, ka zah a, ka ngaisang em em ani. 

📌 I zirna atana i chhungte pawimawhna:
- Ka chhungte hi ka engkim a engkim an ni a, lehkha ka zir theihna tur a nih phawt chuan kawng engkimah min awl thin. Bang lova min tawngtaipui thin avang liau liau a hetiang dinhmun hi ding thei ka ni. 

📌 I zirna atana i ṭhiante pawimawhna:
- Thiante hi chu moral support system tha ber an ni a. Thian tha te hi an lo hlu khawp mai, thiante nen zirlai te in share tawnin kan intichak tawn thin a, hei hian kan zirlaiah nasa takin min pui a, vawiinah hian ka thiante chungah pawh lawmthu ka sawi a ni.


📌 I duhzawng leh ngainat zawngte:
• Rawng - Black & Grey
• Chawhmeh  - Alu, Artui & Bai
• Incheina - A rem rem hi ka ha ve tawp mai. 
• Rimawi – Pop, Country, Hip-Hop, leh Rock thlengin ka ngaithla vel vek. Ka duh tunlai ve thin. 
• Mizo Ziaktu zingah - RK Lianzuala hi ka ngaisang em em. 
• Hla - Hla duh ber tih a sawi tur ka nei lo. Ka duh vek mai. 
• Hla phuahtu - Pi Lalsangzuala hla phuah hi a tha ka ti thei a, ka ngaisang a, la dam se ka ti ngawt mai. 
• Teacher - Zirtirtu te zawng zawng hi ka ngaisang vek. 
• Leader - Pu Laldenga. La dam se, titi pui a chakawm. 

📌 Mize ngainat zawng: Fiamthu duh, nui reng thin ho hi. 

📌 Mize ngai nat loh zawng - Mi rinawmlo. 

📌 Hobby - Lehkhabu chhiar, Movies leh Documentaries en. 

📌 Relationship status - Single leh thei hram. 

📌 Kawppui atan duhzawng - Mi rinawm a ni deuh tawp. 


Zawhna dang:::
1. A tel lova i awm theih loh: Ka lehkhabu te. 

2. I nun kaihruaitu: Pathian thu bakah nitin chhung inkhawm a ka chhungten min fuih thin na. 

3. Hringnuna i hlauh ber: Ka nih tur Pathian in a ruat nih phak loh. 

4. I tih ngai miah loh tur: Mi aia indahsan tlatna. 

5. Mizo Tualzal nuna ṭha i tih: A let leh beisei miah lova mi dangte tana thil tha tih hi. Kan COVID boruak ah hian a thatna kan hmu chho mek zel a nih hi. 

6.  Quote i duh ber: Rudyard Kipling-a Poem "IF" hi ka duh em em. Quote angah min ngaihsak mai rawh u. 

7. Mizote tan 'Fa neih tlem' inzirtir hi a ṭulin i hria em?
Mizote tan chuan fa neih tam hi Pathian malsawmna a ni a, Mizote kan la tam lo bawk a, nu leh pa ten harsa lutuk lova an chawm seilian thei dawn a an inngaih chuan, fa neih tlem in zirtir a tul na ka hre hran lo.


8. Mizo hnam ṭhanmawh bawk nia i hriat?
Kan thil tihna reng rengah kawng awlsam leh hahdam kan zawng fo thin a, hei hian tam takah min hlawhchham tir thin zawkin ka hria.

9. Mizo hnam damna atana  kawng awm nia i hriatte?
- Ram intodelh kan nih theihna tura mi tin ten taima taka hna kan thawh hi kan hnam damna tur pawimawh tak a niin ka hria.

10. Zirna, Khawtlang leh Kohhran hi?
- A kal kawp thei a, mahse zirlai nih chuan a tawk hriat a tha in ka hria.

11. Khawtlang, Kohhran leh nangmah:
- Ka phak ang tawkah chuan khawtlang leh Kohhran ah ka inhmang ve thin a, nun kaihruai tu tha ber an ni. Nimahsela, zirlai nih lai chuan a tawk chauhva in hman thiam hi a pawimawh hle. 

12. Social Media leh Nangmah:
Social media te hi chu ka khawih ve nasa thin a, mahse, a hun ah chuan ka bula a awm reng pawhin ka khawih lo mai. Mahni inthunun theihna neih hi a pawimawh em em, a harsa ti viau thin mah ila. 

13. Mizoram ṭhalai tam tak tlakchham:
- Taimakna leh teirei peihna. 

14. Mizo ṭhalaite hian ngaihsan tur dik an ngaisangin i hria em?
- Ngaihsan tur dik hi kan ngaisang tanin ka hria a, kawng dik kan zawh chho mek niin ka hria. 

15. Ngaihsan tur dik nia i hriat:
- Kan nuna a tha lamzawnga min kaihruai thei tur ngaihsan hi ngaihsan tur dik niin ka hria. 

16. Hlawhtlinna tura pawimawh:
- Keimahah chuan mahni inthunun theihna (self-discipline) hi a pawimawh ka ti ber.

17. Hloh i hlauh ber: Ka chhungte leh ka thiante. 

18. Hnam dang nupui pasal neih hi:
- He issue hi chu hriatthiam a har ka ti.

19. Nupui pasal inneih hmaa mipat hmeichhiatna hman hi?
- Pathian duhloh zawng anih avangin keini Christian te chuan kan tih loh tur a ni.

I thalaipuite tan fuihna:
- Mizo thalai te kawng engkim ah hma kan sawn tawh hle a, chutih rualin hei aia nasa zawk a tan lak kan la mamawh. A bik takin zirlai te chuan nawmsak leh nalh hmasak hi tum lo ila, pawr hrup hian lehkha han zirin han taima em em ila, nakinah kan la nalh in kan la nuamsa dawn a ni tih hria ang u. Taima ila, hnathawh hreh leh thawh zah nei lo ila. Serious reng si lovin, kan damchhung tawite hi chu nuam takin, Siamtu hre reng in i hmang ang u. 

EXPLOREMIZORAM.COM i hmuh dan:
- Explore Mizoram te Mizo mipui tan news mai bakah mi chhuanawm tak tak te in kawmna chhiar tur tam tak a awm hi, Mizo thalai te tan a hlu ka ti em em a. Chhunzawm zel turin ka duh che u a. In kal leh zelna turah duhsakna ka hlan che u.


Founder/Editor
Explore Mizoram

EXPLORE MIZORAM T shirt leh Hoodie hi a duh tan cheng 600 leh 1200 in order theih reng a ni+919402125273





(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Post a Comment

0 Comments