Mizo tlangval a rualpui zinga Mathematics thiam ber?

Pakhat leh pakhat belh chu a harsa lo, pung awma belh leh kalpui neia paih a ngaih tawh chinah chuan mi tam tak kan buai. Mathematics chu mi nazawng tan a awlsam lo a, thiam fal bik phei chu mi tlemte chauh an awm.

Saitual tlangval, mahni khua atanga class 10 zirzo Lalsanglura hi tun dinhmunah chuan, a rualpui Mizo zinga Chhiarkawp thiam ber tia sawi ngam a ni. Class 10, Class 12 leh BSc a exam tawh chinah chuan Maths subject bikah Mizorama pakhatna a ni fai vek!


BSc final year a zir laiin zirna sang zawk zir turin entrance exam a nei a, Chutah chuan inziak tling nghalin tunah hian IIT Madras-ah a zirna a chhunzawm. Zirlai sing tam takin an zir chakna hmuna zir thei turin a thiam tawk tihna a ni.

India sawrkar laipui hnuaia awm, zirna in tha zirchiangtu National Institutional Ranking Framework (NIRF) chuan June 2020 khan India rama zirna in tha a tarlang a, chung zingah chuan Sanglura luhna IIT Madras hi number 1 a ni.


Saitual fa hrin
H. Lalremvela leh Fimlawikimi te fa pasarih zinga a naupang ber dawt a ni a, 29 October 1999 khan Saitualah a piang. Lo neia ei zawng an ni a, an chhungkuaah sawrkar hnathawk an awm loh avangin khawsak awlsam leh nuamsa tak an ni hran lo.

Mahse, an taima a, thawh hreh an nei lo. An fapain lehkha a zir theihna tur a nih chuan Pu Remvela te hian theihtawp an chhuah tak meuh. 'Chhanna The Answer' chuan Lalsanglura hi kan be pawp a. Sanglura chuan, "Harsatna tam tak chu kan tawk ve.

"A bik takin kan in sak lai phei kha chuan lehkha zir pawh a harsa thei hle, mahse Pathian zarah zir theihna tur hun tha chu ka nei ve thei zel," tiin The Answer Page a hrilh. Lehkha zir duh tlat tan chuan harsatna karah pawh a zir theih tih a chiang.

Sawrkar sikul
Sanglura hian High School thleng chu Saitualah a zir. Primary School IV, Presbyterian English School Saitual leh Middle Schhol III a zawh hnuah, Govt High School Saitual atangin matric a pass a, class 10-ah hian Maths bikah Mizoram pumah pakhatna a ni tan.

The Answer Page zawhna chhangin Sanglura chuan, "Class 7 kan nih lai atangin Maths hi ka tui zual, school-ah kan zir vek lo a, mahse kan zir loh pawh kha keimahin ka zir vek zel, ka chawk hnem tial tial a, nuam ka ti tawlh tawlh.

"Class 10 result a chhuah khan mark 89 hmu angin an rawn ti chhuak a, mahse ka awih loh avangin ka complain," a ti. Result hi an ennawn leh chuan mark 99 a lo hmu reng a, MBSE hnuai exam zingah amah tluktu an awm lo.

Hello Madras
Class 10 result a chhuah meuh chuan zir zawmna tur a haihchham tawh lo. Aizawla private school tha tak takin an hnena zir turin an sawm - sawmna duhawm tak tak karah Mount Carmel-ah a zir zawm a, class 12-ah hian Maths bikah mark 99 bawk hmuin Mizorama pakhatna a ni.

Pachhunga University College-ah zir zawm zelin a thiam a la chhawmnung zel bawk. BSc (Maths) ah pawh hian 8.98 GPA nei chungin Mizorama chungnung ber a ni leh a, tunah chuan India rama zirna in tha filawr bik IIT Madras lamah a zir chhunzawm ta.

Covid-19 vangin IIT Madras hian Online hmangin class an la rih a, mahni in atangin class an kal rih tihna a ni. Sanglura hian Phone hmangin class a kal thin. Zirlai a tam tham tawh avangin a awlsam lo hle ang tih a chiang, kum tharah erawh a hmunah zirna an chhunzawm tawh a rinawm.

Duhsakna
Zirlai mai a la ni a, hmachhawp leh hmabak tam tak a la nei. Chumi hlen chhuak tur chuan kawng thui tak zawh tur a la nei bawk. Sanglura chuan, "Professor nih ka chak," tiin zirtirna lam a tui thu a sawi.

Chutih rualin khawvelah hian thil inthup leh hmuhchhuah tur tam tak a la awm, chung hmu chhuak tura zir bingna neih a chak em em bawk - zir bingnaa nei thei turin theihna a nei a, a thiamna in a tlin bawk.

Mizo tlangval Mathematics thiam chungchuang bik hian hlawhtlinna sang zawk chang se, Mizoram mai ni lo India tana fa hrin manhla leh chhuanawm bik a nih ngei theih nan duhsakna sang ber kan hlan.

Post a Comment

0 Comments