Rubber & Allied Crops Development Board vice chairman-in Bilkhawthlir-a Block Horticulture Office hawng

Kolasib | July 15, 2021: Vawiin chawhma khan Block Horticulture Office, Bilkhawthlir hawnna hun hman niin Pu Lalrinsanga Ralte, MLA, Vice Chairman, Rubber & Allied Crops Development Board ni bawk chu khuallian a ni a. Pu C.Lalremsiama, DHO, Kolasib district chuan hun kaihruaiin DHO, Kolasiba thawktute leh Bilkhawthlir khawtlang hruaitute an tel a ni.

Khuallian Pu Lalrinsanga Ralte, Serlui bialtu MLA, Vice Chairman, Rubber & Allied Crops Development Board ni bawk chuan Bilkhawthlir leh a chhehvel ram te chu thlai leh thei chi hrang hrang hlawkpui tham a chin theihna hmun a nih thu sawiin mi thiam ten a hmun an thutchilh theih nan Block Horticulture Office hawn a ni ta chu Serlui bial a kut hnathawktute tan hmasawnna leh hlawhtlinna tam tak a thlen ngei a beisei thu a sawi. Sawrkarin hrileng avanga hmasawnna hna tam tak a nihna tur anga a kalpui theih loh lai a ramri dep a khua awmten tangkai tak a an chhawr tur a Block Horticulture Office hawn theih a a awm ta chu lawmawm a tih thu sawiin a nihna tur ang tak a hmasawnna a thlen theih nan thawktute inpekna a pawimawh thu leh mipuite tan a indawrna hmun nuam tak ni tur a siam a tul thu a sawi a. Chutiang ni tur chuan mipuite pawhin pan nachang an hriat a, tangkai tak a Block Horticulture Office chu chhawr thiam turin a fuih bawk a ni. District chhung khaw hrang hrangah hmasawnna inkhairual tak a awm theih nan District chhunga office hrang hrangte an pawimawh hle thu sawiin Block Horticulture Office, Bilkhawthir pawh hi hmasawnna inkhuairualna thlentu hmanraw pawimawh tak ni turin duhsakna a hlan nghal bawk a ni.

Hun kaihruaitu Pu C.Lalremsiama, DHO chuan Horticultute Department hnuaia kalphung thar duan angin Kolasib district chhungah pawh Block Horticulture Office, Bilkhawthlir bakah Thingdawl block ah pawh Block Office hi hawn thuai beisei a nih thu a tarlang a. DHO chuan Bilkhawthlir chu kuhva chinna hmunpui a nih mek rualin Thingfanghma pawh hlawhtling tak a enchhinna kalpui a nih tawh thu a sawi a. Sawrkar laipui ruahmanna a 'One Crop, One District' tur a hmalak mek tum a nih thu sawiin Kolasib district chu Dragonfruit chinna hmunpui ni turin ruahmanna kalpui mek a nih thu a sawi bawk a ni. Dr. Vanlalremruati Hnamte, MHS chuan report pein Bilkhawthlir Joint Village Council hruaitute atangin thusawi ngaihthlak a ni a Pu P.C.Zahmingthanga, BHO, Bilkhawthir chuan lawmthu sawina hun a hmang bawk a ni.

Block Horticulture Office, Bilkhawthlir hi Bilkhawthlir North VC-te ram pek a sak niin Office building, BHO Quarter leh Staff Quarter 1 a awm a. Office building-ah hian Godown a awm tel bawk a ni. A sak nan hian cheng nuai 48 sen niin heng sum te hi NABARD leh MIDH atanga hmuh a ni.

Vawiin vek hian Serlui bialtu MLA hian Bilkhawthlir Joint YMA hnenah Lawngleng Engine hmang leh Search Light tui tla leh mi bo awm palh a hman tur a hlan bawk a ni.

- DIPR