Ticker

10/recent/ticker-posts

KA COVID-19 POSITIVE ZINKAWNG


Hri vangin mi zawng zawng kan buai a fimkhur tur pawhin kan in chah nasa a, mahni thiam leh phak leh tlin ang tawk chuan kan fimkhur theuh in ka hria.


Kei chuan Pathian hi kan ring bur tur a ni mahse engpawh tawk thei kan ni a, kan thiam ang in kan fimkhur anga mahse Pathian chauh hi rin tur, amah hi kan rin luih tlat chuan kan him thei, hri kai thei reng kan ni a, mahse amah kan rin avangin kan kai lo ang tih chu rin tlang lui tlat ila. Kan lo kai anih pawn vui tur ani chuang lo tih chu ka chhungte bulah ka sawi nasa em em a.

Chutianga Pathian kan rin tlat chuan min veng thei tih ka sawi uar em em lai chuan ka dam lo ta vak mai a, ka rilru ah chuan zamna a lo awm a, ka ngaihtuahna te chuan Pathian rin tur tih ka sawi vak vak a, mahse keimah ber ka damlo leh si a. Natna chuan mahni thil sawi ang pawh a awm thei lo angin min ngaih tir a, tuma hriat loh in ka zak ru hle. 


Mahse chutia khumbet a ka nat lai chuan Joba chanchin chu ka rilru ah a rawn lang thut mai a. Joba 1:6-11 kha chhiar ila, tah chuan Joba kha Pathian in a chhuang em em a, a chhan chu amah tihmi a nih vang a ni. Chutiang chuan keipawh hi “Pathian ka rin tang tang vangin Pathian hi a lo lawm ve aniang” tiin ka ngaihtuah a. Joba 1-ah tho khan Pathian fapate rualin Setana pawh kha Lalpa hmaah a in lan ve tih kan hmu a. Lalpa Lalpa Pathian chuan Setana hmaah ngei mai Joba chu Setana chuan Pathian hnenah amah a ring tak tak nge tak tak lo natna leh a neih zawng zawng hmanga fiah a dil a nih kha. Chutiang chiah chuan natna hmanga fiah in ka awm ani tih hriattir in ka awm a, eng ang pawn n amah ila Pathian ka rind an hi ngai reng turin ka rilru ka ti huai deuh deuh a. Lalpa hming leh ropuina a dam ka tum ruh hle. He fiahna hmunah hian Setana chu champion tir ka duh lo hrim hrim. 


Beisei ang erawh in ka dam chho lo, ka tawngtaina ang pawn chhan in ka awm mai lo, mahse thil dang tel lovin Pathian chu rin luih ka zir a, chu natna positive nih in ringhlel chung chuan. Pathian kan rin phawt chuan min veng ang ti thin tu chu ka positive anih si chuan tiin ka zak ru hle a. Miin min nuihzat rinna te ka nei a, chung hun fiahna ka tawn mek lai chuan keimah leh keimah ka rinna chu fiah ngai ka ti ta tlat a, rinna chu ka practice a, a tak ngei in ka zir zel a. Hun a lo kal zel ka nu a positive ta a… ka nu chuan damlohna a neilo, kei chu ka damlohna a la kaltluangin symptoms chu kim tak main a rawn lang chho ta a, ka positive chu la ring bur, ka nu pawh keima kai a nih ka ring. Lalpa Pathian hnenah ka lo positive anih pawn rinna in tumah kai chhawng lo turin Lalpa hmaah chuan ka kun si a, ringhlel lova ka tawngtaina chu ka duh dan in chhan in a awm ta miah lo a. Chutah pawh chuan Joba chanchin ang tho khan “Pathian in ka tawngtaina a chhan loh vang maiin Setana hian Pathian min rinhlelh tir a tum anih hi” ka ti leh a. Ka nu chu a positive ta! Mahse ka nu a positive chu Pathian hian remruat dang a lo nei zawk a lo nia. Kan tawngtaina te hi chu a chhang vek zel a, a hre vek bawk. Kan duh dan vekin a chhang lo mai zawk ani, kan tana tha tur hi keini ai pawn Pathian hian a lo hre zawk si a.

Hun rei taka kan rilru hah tawhna lockdown vanga dawr luah man kan pek theih loh Rs 10,000 chuang chu ka nu a positive ani tih dawr neitu ten an hriat chuan min rawn ngaidam vek mai a. Positive karah Lalpa thatna kan hmu leh ta. Keipawh chu rim hriatna te a bo vek takah chuan in test turin in report zai ka rel ve ta a, positive chu in ring sa viau ma hila, ka rilru pawh huaisen viau mahse, negative chu ka duhthusam chu a ni. A chhan chu sum senna a thuahhnih dawn em a, in test dawn hma zanah chuan Pathian hmaah tawngtaiin hnehna ka puang a, ka chhunga hri awm ni a ka hriat ngei chu Isua hmingin ka hau a, ka taksa pum chetzia zawng zawng nen chuan ka hau a ni.



Isua hming chu ramhuai pawn an hlau a, chutiang chiah chuan hri chu ka hau a. Thinlung mai bakah kan ka ngeia kan puanchhuah hian damna a awm thin tih sermon ka ngaihthlak atang ten ka hria a, chu chu a tak nei chuan ka practice leh ta a. Test hun chu a lo thleng a, symptoms ka neih nasat tehreng nen ka negative hlauh mai, ka damloh dan hria chuan ka positive an ring vek. Ka negative chhan chu in test hma zana Isua hminga Covid-19 hri ka hauh vang kha a ni tih hi ka pawm hmiah mai a ni. Lalpa chu a ropui a, A chungah chuan ka lawm em em bawk a. 

Tichuan ka dam zel a, ka nu positive vangin ka u an test a, a positive leh hlauh mai, mahse symptoms a neilo a kan lawm tho. Chuta ka rilru a rawn lang leh chu positive te dinhmun Lalpan min hriattir a duh tih hi a ni. Thil reng reng hi chu luhchilh leh tawn loh chuan mite dinhmun leh rilru turte hi hraitthiam a har thin. Hri hlauh vangin mi rilru te kan tina a, kan tawngkam te fimkhur lovin mi thinlung kan lo tina fo thin. Sawtna leh that phahna tur awm si lova midang lo va tawngchhuah mai te hi a awl a. Ka hriat leh hmuh phak ngei ah pawh tiang chu a thleng a ni. Chutiang chuan midang chunga kan tih ve loh nan, kan chhungkua in Positive kan lo hmelhriat ve ta chu a tha zawk e tiin thil tha zir chhuah nan hmang tur tiin ka chhungte pawh ka fuih a. Ka u chu positive mahse midangte dinhmun kan hriatthiam theih nan kan experience a, lawm ka zir leh a.


“Chutiang bawkin lei pawh taksa peng te tak te a ni a, nasa takin a uang thin. Ngai teh u, mei te tak tein thing a va tikang nasa em. Tin lei hi mei a ni, kan taksa pengte zinga khawlohna hlawm chu lei hi a ni, chu chuan taksa a pumin a tibawlhhlawh a, pianpui tawilailir chu a tikang a, amah chu hremhmun tihkan a ni.” Jakoba 3:5-6 Kan lei hian pawi alo khawih nasa thin em em a, chuvang chuan mi rilru tur dawn chung zelin kan tawngkam te pawh khawngaihna tel ni se. Midangte diriam/tina tu ni lovin thlamuan tu nih tum theuh ang u. Mi tin engtia chhan theuh tur nge ni tih in hriat theih nan in tawngka chhuak chu, chi a al, khawngaihna tel ni fo rawh se. Kolossa 4:6 Ka thil tawn reng reng hi awmze neilo a lo thleng ani ngailo, kan hun tawn mek te hi uluk taka kan ngaihtuah chian chuan Pathian min zirtir tum chu kan hmu zawk thin a ni. Chutiang chuan ka u result tha vak lo karah chuan thil lawmwam loh kan tawn te pawh hi a lawmawm thin tih chu ka thlirdan a ni. 

Ka u positive vang chuan keipawh test leh ka lo ngai ta a. Kei chu ka dam tawh lutuk, hnehna ka puan hnuah khan symptoms te pawh a reh vek tawh a, ka positive pawh ka ring tawh lo. Mahse chutia ka dam em em tak hnu ah chuan result lawmawm loh chi ka nei ta tlat mai a. Zing ka harh chian hma hian ka positive thu min rawn hrilh a, rilru chuan engpawh tawk turin inpeih sa mah ila ka result hriat chuan min thawng a, ka thin hi a phu rang khawp mai, a dan a lo dang a ni. Result Covid-19 positive neih chu intihtheihna chi rual ni hek lo, ka zak bawk a, a mak khawp mai, in kiltawihna ka nei nghal a, ka inthlahrung duk mai, rilru pawh heng hun lai hian a no duh dawn hle tih ka hrethiam thei. Positive te kan va biak dan ah pawh fimkhur angai tih ka hre thar, a chhan chu hetiang hri vei te hi chu rilru lam thlenga nghawng anih vangin rilru te pawh a no duh dawn riau anih hi ka ti a. Tichuan ka damloh lain Lalpa tihdamna changing ka negative a, tunah ka dam ta maw tih ah ka positive leh chu mak ka ti em em a. Pathian remruat ah chuan ka vui lo a, mahse a remruat dan vel chu mak ka ti. “Tuna positive leh tur tho si tinge min tihdam niang le?” ka ti rilru a. A chhan leh vang chu ka hre thei lo a, Pathian remruat hi a chang chuan kan hrethiam vek nghal ngailo al, hun in min rawn hriattir mai ang ka ti ta a. 

Mahni chauh chuan inkhung hrang turin ka chhungte ka bye bye a, motor ah chuan tumah chuang an awm ve lo, “mi pakhat tal chuan pui tur awm ve tal se” ka ti rilru a, mahni chuan a zamawm lek lek, chhun khaw en lai ania motor lah a lang tlang vek chi a la ni zui. Min hmu tute chuan min lo bye bye zel a, zak tak chung si chuan nui sang chungin bye bye chu ka sem chho char char a. Kan pastor nupui hian min lo hmu a, motor chu tihdin tirin an varanda atang min rawn tawngtai sak a. Nupui tha tak ani, Pastor nupui ni awm reng a ni.


Hmeichhe naupang lam kawi tur kan nei ta hlauh mai a, kum 12 mi a ni a, a chhungte chu an lo mangang ru em em bawk a. Han ngaihtuah ve chin ma hula, in nau, in fanu emaw kha amah chauh a inkhung hrang turin han dah chin ula in ngai ngam lovang. Han in awmpui chi lah a ni si lo. Naupang kan lam dawn tih ka hre lo a, naupang lah in awmpui tur a nei dawn nge dawn lo a hre lawk hek lo. Motor ah chuan kei chu ka lo awm a, a chhungte chuan ka kutah naupang chu an dah ta tawp mai a. Kan luh zan chuan room ruak/in ruak ah kan pahnih chuan kan awm ta a, “keimah hi awmlo ta ila naupang chu amah ciahin a awm dawn” tih ka ngaihtuah leh a. Chutah chuan Pathian remruat ka hriatthiam theih loh, mak ka tih em em chhan chu chhanna ka hmu ta. Chhungkaw pakhat an fanu Covid-19 positive inkhung hran ngai bawk si, an awmpui theih loh vanga lo mangang ru em em tawngtai chhanna ka ni tih hi a ni. Chhungkaw pakhat tawngtai chhanna atan kei hi ka positive ngei ngei a ngai tih ka hre ta a. 

Midang hnen atang a ka hriat danin an fanu chu ka bulah a awm dawn ani tih an hriat chuan an thla hi a lo muang em em mai a lo nia.Chu veleh “kei kher maw Lalpa” tiin midang tawngtai chhanna atan min hmang ve duh a, ka positive vang chuan ka lawm e, lawman mittui a tla ta zawk a ni. Naupang enkawl turin ka positive ngei ngei a ngai si a, ka positive vang chuan ka lawm a, chu chu Pathian remruat a ni si a.


A remruat fel sa vekah chuan hun hlimawm leh khawhar thlak loh tak kan hmang a. Dam tak chung si a hri vei ka nih vangin, midang te tan malsawmna ni turin Lalpan hri min vei tir tih hi ka rilru ah a lian ber a. kan awmna hmun ah pawh dam tha ber ka nih vangin che tha peih lo te chet pui chu ka tih tur ber ah ka ngai. Naupang pawh chu ‘damdawi ei rawh’ tih loh chuan ei nachang hre lo rual lek anih vang chuan kan invil ngun hle mai a. A nih tum leh chak zawng te ka zawt a, Designer nih chu a duh thu min hrilh a, kei hi designer chu ka lo ni sa reng bawk a, kan inmil chho vel khawp mai. ‘Ruat lawk a intawng kan ni’ ka ti.

A mak khawp mai, ka luh dawn khan ka awmpui tur hre lawk ang hrimin ka ken tur ka pack vel naah chuan colour te, drawing book etc, naupang lawm zawng hi ka pack tel vek a, chung chu ka keng  lut a. Lalpa chu rorel felna Pathian a ni si a, amah nghak tute zawng zawng chu an eng a tha e. Isaia 30:18. Kan awm chhungin naupang nen chuan nachhawkna ei ngai miah lovin kan awm a, kan chhuah hun turah dam takin kan pahnih in kan chhuak thei a ni. 


Chung zawng zawnga ka zir chhuah chu kan nuna thil thleng apiang hi chhan neia thleng thin a ni a, Pathian hian enge maw min zirtir/hriattir a tum thin. Ka nuna thil thleng te, kan lo hrethiam nghal lo anih pawn a remruatna ah chuan vui lovin a hruai dan ang ang a mawl taka lo awm tawp mai hi a ni. Siamtu rupui zia hi ngaihtuah chiang ila vui thei pawh kan ni reng em ni. Chutah chuan Pathian hmel hi fiah leh chiang zawkin kan hmu thei ang tih hi a ni. Vuina hian mi a a tihlum thei a, itsiknain mi mawl a that thei. Joba 5:2

Ka thil tawn apiang hian awmzia a lo nei zel a, a awmzia hrethiam tur leh chu kan thil tawn meka kan zirchhuah tur dik tak kan zir theih nan, Pathianah lawman kan neih theih nan hian kan ngaihtuah na uluk zawka kan hman hi a lo pawimawh em em a, Pathian in mihring rilru a ngaihtuahna tha tak a dah a, kan ngaihtuahna ten Pathian tum a hriat theih nan, ngaihtuah dik kan neih theih nan te tawngtaia lo dil thin hi a lo pawimawh takzet tih ka hre thar bawk a ni. Mihring rilru chu Lalpa khawnvar a ni a, pumpui chhungril lam zawng zawng pawh a enchhuak thin. Thufingte 20:27

4c ka awm chhunga ka hriat hnem ber pakhat chu “vaccine a lo la hlauh a, hri a la na lo” tih te. “Vaccine la lo se chu a damchhuak lo ang” tih te a ni hlawm a, Vaccine la miah lo pawh hri la na miah lo an awm tho asin. Kan damna ah hian Vaccine nge Pathian kan chet tir. Kan nunna hi Pathian venna tel lo chuan Vaccine la full pap mah ila a tawp thei reng a sin. Vaccine hi kan la a, hri kan lo kai ta lo emaw kan lo hneh ta anih pawn, Pathian chetna sawi uar deuh deuh thei zawk ila ka van ti tak em. Vaccine zawk chu Pathian hming kan lamna tur aia kan sawi lian a nih chuan kan ngaihtuahna chu tihngawngin a awm tihna a ni.

Kan ngaihtuahna te hi uluk lehzual zawka ngaihtuah a van ngai tak em. Ringlo mite ngaihdan leh ringtu te ngaihdan hi a danglam a ngai thin a. Ringtu te kan danglamna tur a tawp nan Bible chang kan rilru a alo thar nawn leh nan ka'n tarlang ang e.


Thenkhatin tawlailirte an ring a, thenkhatin sakawrte an ring. Keini erawh chuan Lalpa kan Pathian hming chu kan lawm zawk ang. Sam 20:7

Amah chawimawiin hla sa ula, amah fakin zai rawh u. A thilmak tih zawng zawng thu chu ti ti rawh u. Sam 105:2

Lalpan in a sak loh chuan, a satute chu an thawkrim thlawn mai a ni. Lalpan khawpui a vawn that loh chuan, a vengtu chu a meng thlawn mai a ni. 
Sam 127:1

Nimahsela a chhuang apiangin Lalpa chhuang rawh se. 2 Korinth 10:17




(Zothanmawii hi Miss Mizoram 2017 finalsit niin, Model a ni a, chu mai bakah Designer ni bawkin thlalak lamah a tui hle a, heng a tuina leh a thil tih zawng zawng bakah hian thawhhreh nei lo a ni a, a tul chuan chawhmeh pawh a zuar lawp lawp mai thin a ni. A thuziak hlu tak, ama tawn ngei a rawn thawh hi kan lawm tak zet a ni. ~ Editor)
Post i hmuh dan

Post a Comment

0 Comments