THLAMUANNA KA HNUTCHHIAH A CHE U

Johana 14:1-31
- Vanlalthansanga
 
 
Thuhmahruai
Mizoram lama lo haw chho tura kan inbuatsaih mek lai khan rilru ngaihtuahna a vak vel nasa hle maia, ‘kalkawngah Covid-19 hi kan kai ve palh mai angem?’ Anih loh pawhin haw dawna ‘RT-PCR test hunah kan lo positive palh ve mai ang a’ tih hlauthawnna te nen kan awma; Airport kan pan mek laiin result kan dawng chauh mai bawk si, result chu whatsapp ah a lo thlenga ka positive ang tih ka hlauthawng lutuk chu ka hawng ngam lawklo nghe nghe a ni. Chumai chu ni lovin chanchin thar han ngaihthlak lahin chanchin lawmawm ai chuan chanchin lawmawmloh lam zelin min denga. A thenin an duhlai ngawih ngawihte chanin hun an hmang mek bawk a ni. Kan khawvel boruak han thlir hian tu te pawh hian thlamuantu kan ngai tak zet a ni tih a hriat a ni. Chuvang chuan Isuan a sawi, “Thlamuanna ka hnutchhiah a che u” tih thu hi a hlu thar em em a, Johana 14:27-a Isuan a sawi hi kan zirho dawn a ni.



Isuan inthlahna thu a sawi
Johana 13:31-16 hi Isuan zirtirte a thlahna thu (Farewell message) a ni a. Isuan a hun hnuhnung lama zirtirte hnena thuchah a neih hi inthlahna thu (Farewell discourse) ti pawhin an sawi a ni. Isua pian hma pawh hian hruaitu ropui thenkhat chuan inthlahna thu hi an sawi ve thin bawk a, Bible ah leh lehkhabu dangah pawh kan hmu thei a ni. Thuthlung Hlui lamah Jakoban Genesis 49 ah a sawia, Mosian Deuteronomy 32 ah a sawi bawk a. Tin, Thuthlung Thar lamah Paulan Tirhkohte 20:18-35 ah a sawi a, Isua sawi hi Johana 13-17 bakah Luka 22:14-36 ah pawh kan hmu a ni.
 
Inthlahna thuchah in a ken tel tlangpui te
Thih tur thu emaw kalbo tur thupuanna (Johana 13:33, 14:2-3, 28)
Hunkal tawh thlirkirna (Johana 14:31; 17:4, 6, 8, 12, 14, 26)
Inlaichinna tihngheh zel a tulzia sawina (Johana 14:8-11, 20)
Hun khirh lo thleng tur sawilawkna (Johana 14:29; 15:18-25)
Insuihzawm zel tur leh inthendarh lo tura fuihna (Johana 14:10-11, 29; 15:1-11)
Hruaitu thar puanna (Johana 14:25-26; 15:25-26; 16:7-15)
Hruaitu thiltihte chawi nun zel (Johana 14:12-14)
Tawpna tawngai emaw malsawmna (Johana 17:1-26)
 
Engvangin nge Isuan thlamuanna thu a sawi?
Isuan eng vangin nge, “Thlamuanna ka hnutchiah a che u; keima thlamuanna ka pe a che u; khawvelin a pek angin ka pek loh che u hi. In thinlung mangang suh se, hlauh pawh hlau suh se” a tihna chhan hi ilo bel chiang teh ang. Isuan a hun hnuhnung a hmang mek a ni tih a hria a, reilote ah a ni chu mantirin a awm anga Kraws-ah khenbeh a ni dawn a ni tih pawh a hriat lawk avangin chutih huna a zirtirte awmdan tur leh an mangan tur zia te a hmu lawk niin alanga chuvang chuan zirtirte chu hun harsa leh hunkhirh taka lo thlen hunah pawh mangang lo leh hlaulo tura a fuih lawkna a ni.
 
Thlamuanna thu Isuan min hnutchhiah chu engnge ni?
Isuan, “Thlamuanna ka hnutchiah a che u; keima thlamuanna ka pe a che u” a ti a. ‘Thlamuanna min hnutchhiah’ chu engnge ni chiah? He laia ‘thlamuanna’ ti a kan hmuh hi ‘thutak,’ ‘eng,’ ‘nunna’ kan tih te nen pawh a intluk a ni. Isuan ‘thlamuanna ka hnutchhiah a che u’ a tih hi zirtirte tan a nih rual rualin keini tun huna ringtu mangang leh beidawng taka awm mek te tan tak hian a ni leh zual a ni. Isuan, “Keima thlamuanna ka pe a che u; khawvelin a pek angin ka pek loh che u hi” a tih kherna chhan pawh hi khawvel mite chuan an hnukchah dawnin thlamuanna an nei lova; hausakna te, sum leh pai leh an chhungkhat laina te an kalsan a tul pawhin thlamuanna an nei theilo a ni. Mahse Isuan, “Keima thlamuanna” a tih ve thung erawh hi chu chhandamna te, malsawmna te, Pathian duhsakna te a ni a. In leh lo, u leh nau leh chhungte kalsak vek hnu leh hnukchah dawn thleng pawha thlamuanna neihna hi a nih avangin, “Keima thlamuanna ka pe a che u; khawvelin a pek angin ka pek loh che u hi. In thinlung mangang suh se, hlauh pawh hlau suh se” a ti a ni.
 
Tlangkawmna
Tun hnai maia ka thianpa nena phone-a kan inbiaknaa a sawi chu, a nu kha a thih hma damdawiina a awm lai kha ka thianpa chuan a nu thlarau tan chuan a tawngtaia, a nu chu kal mai thei dinhmunah a awm a ni tih kha a hria a, chuvang chuan a nu thlarau chu kawlsak turin Pathian hnen ah a dil a ni. Tichuan a nu chu a hnu lawkah chuan he khawvel a lo chhuahsan ta a, ka thianpa chuan buai miah lovin engkim a buaipuiin a tifel thei ta zawk a, thlamuang takin amah ngei pawh chu a awm a ni, mi pawhin an fak hle zawk a ni. Chutiang zelin he khawvela kan awm chhung hian engpawh kan tawk thei, natna leh he hripui avang ngei pawh hian beidawng leh mangang takin kan awm mek pawh a ni thei, lusunna avanga khawhar leh lungleng taka awm te pawh kan ni thei. Nimahsela Isuan engtin nge a sawi, “Heng thu hi in hnenah ka sawi tawh hi, keimahah hian in thlamuanna turin. Khawvelah hian hrehawmin in awm thin; nimahsela thlamuang takin awm rawh u, keiin khawvel ka ngam ta,” a ti a ni. (Johana 16:33).

Post a Comment

0 Comments