Save Our Planet

(World Environment Day pualin)
- Vanlalthansanga


Kum tinin World Environment Day hi June ni 5 apianga hman thin turin UN chuang a puang a. Kumin atana thupuia an thlan chu “Ecosystem Restoration” tih hi a ni. UN chuan sawrkar te, sumdawng leh thilsiam chhuak tu te leh mipui zawng zawng te hnenah he kan leilung chhiattawhna hi siamtha a, dinthar leh turin min sawm a ni. He ni pual hian environment lamah thiamna chu neilo mah ila. Mitin te tana tul leh pawimawh anih avangin tlem azawng thu han tarlan kha tul ve in ka hria a ni.


Environment chu eng nge?
Mihring tumah hi mahni chauhin a awm ngawt theih loh a, tu te nen emaw chenho angaia, mihring chu amah chauhin fianrial takah lo khawsa pawh nise chhehvel (environment) awmlo chuan a awm dawnlo tih kha alang chiang reng mai. Mihring te hi he khawvelah hian chen chhunzawm zel kan duh chuan min hual veltu – sik leh sa kawng hrang hranga thlak danglam theitu te hi kan enkawla kan ngaih pawimawh angai a ni. Keimahni mihringte khawsak zelna tur piahlam mai baka Pathian thilsiam dangte annih avang hrim hrim pawh hian kan environment hi kan enkawla kan humhalh angai a ni.



   
Ecosystem Restoration: Engtin nge?
Hmanni deuh mai khan chhim lamah leh Zoram hmun hrang hrangah ram kang a nasa hle maia. Kha ramkang kha a pawi em em a. Thing leh mau leh nungchate tih chereuna nasa tak a ni kan ti thei ang. Kha thil thleng avang khan engtin sawrkarin hmalak a tum? Tlawmngai pawlin hmalak tumna an nei em? Kohhranin engtin nge a tih, a en liam mai dawn em ni? Mahni veng leh khua tinah a tul anga kan environment humhalhna kawnga hma kan lak a tul hle mai. 
Ecosystem Restoration siam tura kan tih theih thenkhat te chu:  
Thingphun a than tir
Green Village/Town siam tura hmalak
Tui lakna/Lui hnar humhalh
Lui lian leh te te venhim
Ramsa humhalh
Ramngaw humhalh
Development hian chhiatna a keng tel



Tunlaiin Mizoramah Indian Act East Policy avang leh National Highway siamna kawngah te kawngpui siam leh laih mek a ni a. Development pakhat a ni a, a lawmawm hle a ni. Chutih rual chaun environment thlirna atang chuan heng kawngpui siamna avang hian environment chu tihchhiatin a awm mek a ni. Khaw thenkhatah chuan kawng laih thar avangin an tuihna te a chata, an tuikhur tlan lai ngawih ngawih te pawh tih chhiatin a awm a ni. Chu chu siamthatna emaw rulh let tumna hawi zawnga hmalak tumna pawh awmin a langlo a ni. Chutiang zelin Mizoram hmun hrang hrangah tui harsatna a thleng nasa hle bawk a nih kha. Hmasawn kan tumna kawngah hian keimahni leh keimahni hi kan intichhe tel thei a ni tih hi kan hriat thar a ngai hle mai.









  
Thingphun Campaign
Kum tinin saving tree planting campaign hi khawvel hmun hrang hrangah kalpui a ni a. Thing kung pakhat hian kum khatah Oxygen kg 117 a pechhuak thei a. Chutiang a nih chuan thingkung puitling pahnih chuan chhungkaw pali a chawm thei reng tihna anih chu. Acre 1 a zau a awm thing te chuan carbon dioxide lo chhuak tur chu ton 2 chuangin a ti tlem thei bawk a nih chu. Thing hian tangkaina tam tak a neia, boruak thianghlim, lei tha, tuihna thlenga tangkaina a neih avangin thingphun kan uar leh deuh deuh atula, enkawl puitlin ngei pawh tum thin ila atha hle ang.

Post a Comment

0 Comments