Rev. Lalhmingchhuanga Zongte (L) Sermon hnuhnung ber

 Rev. Lalhmingchhuanga Zongte Sermon hnuhnung ber

- Vanlalthansânga

“Full time-a rawngbawl tura a inpek hnua Rev. Lalhmingchhuanga Zongte rawngbawlna hmasa ber chu non-denominational Kohhran - Pune Mizo Christian Fellowship (PMCF) a ni a. Thuchah a sawina hnuhnung ber pawh non-denominational Kohhran PMCF-ah tho niin he leia a rawngbawlna chu a lo khar fel ta a ni.” Rev. Khiangnunfima Chaplain, Bangalore Mizo Christian Fellowship (BMCF).

Rev. Lalhmingchhuanga Zongte leh Pune

Zofate tan mi hlu kan chan tak Rev. Lalhmingchhuanga Zongte kha Union Biblical Seminary (UBS), Pune ah kum 1996-2000 chhung khan Bachelor of Divinity (BD) a lo zir tawh a. Pune ah hian sulhnu hlu tak tak a hnutchhiaha. Pune Mizo Christian Fellowship (PMCF) Chairman te pawh alo ni tawh a ni. A ruang an thlah ruala an tlangzarh tak a lehkhabu ‘Mizo Buanpuite’ ah pawh khan “Zakzum – Mizote Min Thukrutu” tiin Pune-a an awmlaia PMCF-a Rev. Dr. G. Isaiah thusawi tura an sawm thu te pawh a thailang tel a ni. Tin a lehkhabu pakhat “Hmasang Kohhran Chanchin” a ziah pawh Union Biblical Seminary (UBS), Pune-a BD a zirlaia a buatsaih a ni nghe nghe a ni.  

Engtin nge a sermon hnuhnung chu Pune-ah daih a sawi theih?

Hripui leng avangin Pune Mizo Christian Fellowship (PMCF) pawhin Youtube kaltlangin online inkhawm a kalpui ve reng a, chutah chuan Guest Speaker te pawh kan sawm chang a awm thin a ni. Chutichuan PMCF Executive Committee chuan Rev. Lalhmingchhuanga Zongte pawh online inkhawma thusawi tura sawm ve nise kan ti a. Tichuan kan Secretary te nen inbia in kan sawmna chu a pawma. Mahse Sermon a record hma hian Covid-19 chuan an chhungkua a tihbuai thu kan hre ta tlat mai. Amaherawh chu sermon chu a inbuatsaih zawh tawh thu leh recording ala hmabak thu kan secretary a rawn hriattir a ni. Tichuan Sermon te tha taka a sawi theih nan kan tawngtai puia, a hnua kan hriatdanah phei chuan sermon a sawi lai pawh hian alo damlo tawh reng maia, natchhawkna eiin Sermon a sawi zawhah a mu leh a ni awm e. Sermon sawi tura min tiam tawhna chu tihpuitlin loh a duh loh avangin a rawn sawi hram niin kei phei chuan ka ngai hial a ni. April 25 Pathianni kan online inkhawmah chuan Rev. Lalhmingchhuanga Zongte Sermon chu a Sermon hnuhnung ber a ni dawn a ni tih hre miah lovin kan ngaithla a ni. 

Rev. Lalhmingchhuanga Zongte Sermon hnuhnung ber hi kan ngaihlu em ema, Zofate hmun hrang hranga awm ten ngaihthla vek thei ila tiin a Sermon khaikhawmna hetiang hian kan han dah a ni.

Thupui: Thinlung

Bible: Sam 51:10 Rom 12:1-2

Thinlung chu Rilru nen a thliar hrang lutuk lova, Sermon-ah ngei pawh hian a sawi pawlh deuh a ni. Zofaten Rilru thar leh thinlung thar nei theuh ila a duh thu thahnem ngai takin a sawi a ni.

Rilru dik neih hlutna leh hlawkna

1). Nundan dik min neihtir theitu a ni

2). Nun nuam leh nun hahdamna min nun tir theitu a ni 

3). Rilru dik chu tawngtaina a ni nghal a ni

Engtin nge rilru dik chu kan neih theih ang?

1). Rilru dik chu duhthlanna hmanga thlan ve ngat a ngai.

2). A tha zawnga rilru hruai thei lamah kan inhawng tur a ni.

3). Pathian hnenah thinlung dik chu dil mawlh mawlh tur a ni.

Piangthar nunah hian activity aiin thinlung a pawimawh a ti a. Infrastructural development nei tur chuan chuan Rilru developed hmasak a pawimawh, rilru sang, rilru changkang neih phawt angai. Development chungchangah chuan Rev. Hminga chuan Lei dawh tawrh ai chuan Rilru tih changkan phawt a duh a ni.

Rawtna pakhat a neia moral-ethical development department siam nise, chu chu sawrkarin chak hma takin hma la se a duh thu a sawi a ni. Value system awmzia a sawi bawka, value system chu judgment kuang pui a ti a. Kan rilru puthmang dik leh diklo, tha leh tha lo, hlu leh hlulo, mawi leh mawilo bukna chhungrila kan neih hi ani a ti a ni. Khawvel standard hi hmantlak a ni lova, Isua Krista standard hi hman zawk tur a ni tiin a sawi bawk.

Pathian Ram leh Zofate tana hlawk taka thawktu Rev. Lalhmingchhuanga Zongte chu tunah kan zingah awm tawh lo mahse, a thuziak leh a Sermon te hian Zofate te thinlungah hnathawkin thu sawi chhunzawm zel rawh se.