Kohhran, Party leh NGO joint meeting nei; Hri do nan chak taka test kalpui leh all party meeting ko turin sawrkar rawn

 CYMA huaihawt Joint Meeting Resolution

Aizawl | June 24, 2021: Vawiin khan Central YMA Committe Room-ah Mizoram Kohhran Hruaitute Committee, Political Party-te (BJP, INC, MNF, PC, ZNP) leh NGO hrang hrangte Joint Meeting chuan, hripui leng mek, do letna kawnga hmalakho dan tur chungchang an sawihova, hri dona atan test chak zawka kalpui an rawt a, Sawrkarin all party meeting ko se an ti bawk.

Meeting chuan hri do nana sawrkar hmalak dan turah a hnuaia mite hi an rawt:

1. Hripui dona kawngah pheikhai rual zawka tan lak a nih theih nan, Sawrkar-in All Party Meeting koh se.   

2. Covid-19 hripui laka kan him tlan theih nan, Vaccince a chak thei anga pek zui zel ni rawh se. Mipuite pawhin kan him tlan theih nan Covid-19 inkaihhruaina dan SoP leh CAB (Covid Appropriate Behaviour) te zawm that nise.

3. Covid-19 hri kai rang taka hriat chhuah zung zung a nih theih nan, Test chak taka kalpui ni rawh se.

4. Kuthnathawktu ten an thlai tharte awmze neia an tihral theih dan tur, Sawrkar-in ruahmanna siam rawh se.

5. Covid-19 hrileng mek do nan hriselna kawnga kan mamawhte tha leh changtlung zawk kan neih theih nan, Sawrkar-in hma la rawh se.

6. Hrileng vanga kan harsatna tawh mek te inchhawk zangkhai a nih theih nan, in/dawr luah man inngaihnathiam ni se. Tin, BPL leh AAY chhungkuate Sawrkar Bill hrang hrangte Sawrkar-in ngaihnathiam rawh se.

7. Covid-19 hrileng do hnathawktute inpekna leh Aizawl khawpui pawn atanga an thlai thar tam tak an rawn pe thin hi a lawmawm kan ti hle.