Presbyterian Church of India, Mizoram Synod-in Mission Vêngthlanga Pi Lalremsiem ram, in sak lai nên, Rs. 5,00,00,000.00 (chêng vaibêlchhe nga)-a a lei, Rs. 3,00,00,000.00 (chêng vaibelchhe thum) lai a pêk tawh chu, tûn hnaiah a hmanna tûrah hman tuma hma an han lâk chuan, Bank lam aṭangin (Bank tâna thawk ukil kal tlangin) legal notice an dawng ta a. Chu ram leh in chu Pi Lalremsiemi’n loan lâk nâna a dahkham a nih thu leh, lei theih a nih loh thu te, lei tuma hma lâk luih a nih chuan Lalremsiem nên dâwta inthurual leh mi dang bum tuma thawk dûna ngaih an nih tûr thute an dawng ta a ni tih kan lo hre ve a.
Hei hi a zahthlâkin a pawi tak zet a ni. Synod hian a chhe berah a sum sên zât tal hi a bo a bâng awm lovin rang takin hmu lêt leh ngei se la. Chuti pawh chuan, pung tam tak nei tham sum hetia tih khawtlai kual hi hlohna nasa tak a nih bâkah, ram lei tûra buaipuina hun leh tha zozai te, thil buai a lo awm tâk avânga a chinfel lehna atâna Committee hun sên leh a ngaihtuahtute rilru hahna zawng zawngte chu sumah chantîr dâwn ta ila, a tam tham hle ang. Chu bâkah he ram behchhana hmalâkna tûr ruahmanna lo sukuk tate hi lu tihai tham fê a ni.
Savun Kawrfualah khân ram neih dân leh record lamte a fel loh nasat thu leh, nakinah chuan ram inchuh avânga thisen a la luan hial a hlauhawm thu kha kan han tlângaupui kha a ni a. Keini thu mai maite chu tu tâna han bengkhawn tlâk phei zawng a ni hauh lo va. Kan pamham leh depde lutuk avâng te, kan system fel lo lutuk avâng te, system fel lo siam ṭha duh ram hruaitu kan neih loh avâng te hian, kan la tuar nasa telh telh dâwn niin a lang.
Thuthang kan lo hriat dân chuan, Synod-in Pi Lalremsiem ram leh in a lei dâwn hian, Revenue Department lamah en fiah vek niin, Revenue Department lama thawktuten engkim a fel vek an tih avânga lei ni âwmin sawi a ni a. Revenue Department lam aṭangin ram dinhmun fel leh fel loh hriat theih dân a awm lo niin a lang a. Hei tak hi kan buaina chhahzia leh nakin zêla kan la buai nasat tûrzia lan chianna a ni.
Sawi dân pakhat lehah chuan, Pi Lalremsiem hian a LSC ti bo anga insawiin a thar a dîl a. An lo pe leh mai ni âwmin sawi a ni bawk. Zêldin theih dân pakhat lo awm ta chu, Pi Lalremsiem hian Bank-a sum a pûk dâwnin he ram hi a dahkham a. Ram dahkham han tih lêmah Fort Mumbai-a UCO Bank-ah Mission Vêngthlanga a ram tak tak kha chawi thlâk vu vu a, zuk dahkham thu a awm lo va, LSC a dahkham tihna a ni. Chutia a dahkham hnu chuan, chu ram vêka LSC dang a la neih chu Synod hnênah hian a hralh tihna a ni thei ang. LSC pahnih emaw, a aia tam emaw nei lo sela chuan hetiang hi thil awm thei ni âwm lo tak zawng a ni ngei mai. Hei hi mi mâwl ber pawhin kan zêldin theih dân a ni.
Tichuan a kaikuang ni ta ber chu, miin ram pakhat atâna LSC pakhat aia tam a neih theihna system hi a ni a. LSC tam tak nei tûr hian sum engzâtnge sên ngai ang a, chu sum chu tuin nge têl ṭhîn ang a, chutiang thil bawlhhlawh avâng chuan buaina engzât nge Zoram hian a la hmachhawn dâwn tihte chu inrinsiak mai loh chu tih theih a vâng khawp mai.
Mizorama kan awm laiin ni tin chanchinbu ka chhiar ve zeuh zeuh ṭhîn a. A phêk tâwp lama fakna tam tak tlar pêt pût kârah khân, “Thanga/Liana/Siami hian a LSC No. xxxx chu ti bova insawiin, a thar a rawn dîl a. A rem lohna hria chuan sawi tûr...” tih ang lam hawi hi ka hmu fo va. Khatiang thu a lo awm apianga mahni LSC Number nêna lo en mil zat zat chu sawi loh, khatiang thu hmaih miah lova lo chhiar zat zat tûr khân kan hman hlawm em? Kan mawhphurh a ni chiah em? A rem lohna rawn sawi an awm loh chhûng chu pêk zêl mai tûr em ni? Thanga/Liana/Siami khân a LSC chu a tibo tak tak chiah em? Lo tibo tak tak pawh chu ni se, LSC thar a neih hnuah a hlui chu hmu leh ta se tih zawng zawng nên. Engpawhnise, ram pakhat ngau ngau hi mi hrang hrang hnênah a hralh theih a, Loan lak nâna dahkham chung pawhin a la hralh zêl theih bawk si chu ni âwm tak a ni a. Buai loh zia a ni lo ve.
Mimâwl nih manah, mâwl taka sawi theihna license pawh neiah inngai ta ila. Bank lamte nên pawh hian indâwrna mumal neih a, Mizoram Sorkar-a Revenue Department certification/clearance thil tel loh chuan ram hralhna leh dahkhamna LSC pawm theih a ni lo tih policy-te hi a siam theih ang em? Miin a ram dahkham tûra Revenue Dept. aṭanga clearance a lâk tawh chuan, file lamah chu ram chu dahkham mêk a ni tih finfiah theih a lo ni ang a. Tuna Synod vânduaina ang chi hi chu pumpelh theih âwm tak a ni.
Post a Comment
He post chungchanga i ngaihdan lo sawi ve rawh: