Hrileng kara HSLC Examination 2021 leh result buatsaih a ni chu thawktute thahnemngaihna leh inpekna a ni a, a chhuanawm hle - School edu minister

Aizawl | June 3, 2021: School Education Minister Pu Lalchhandama Ralte chuan hrileng kara HSLC Examination 2021 leh result buatsaih a ni chu thawktute thahnemngaihna leh inpekna a ni a, a chhuanawm hle a ni a ti.

Minister chuan Mizo mipuiten an ngaihhlut leh nghahhlelh HSLC (Matric) result a chhuak thei ta chu lawmawm a tih thu a sawi a. Hripui leng avangin India ram State dangah HSLC Exam pawh an nei hlei thei lova. Result siam dan turah an buaiin zirlaite an chiai nasat thu news-ah kan hmuh hnem viau laiin Result tihchhuah theih a ni ta a, MBSE leh School Education Department-a thawktute thahnemngaihna leh inpekna a chhuanawmin fak an phu tak zet a ni a ti. Hripui leng karah Exam him leh felfai tha neih theihna tura ruahmanna siampuitu State Executive Authority, LLTF/ VLTF te leh Mizo mipuite tawngtaina chungah lawmthu ka sawi a ni a ti. Pu Lalchhandama Ralte chuan HSLC Result chhuaka hlawhtlinna changtu zawng zawngte, nu leh pa leh an zirtirtute a lawmpui thu a sawi a. Zirlai hlawhtling ve ta hrih lote pawh beidawng mai lova, tumruhna leh huaisenna thar neia beidawng lova hmalam thlir tlat turin a fuih nghal bawk a ni.
HSLC Result 2021 vawiina tihchhuah takah hian Centre 116 a awm a, school 679 atangin candidate 18,738 an awm a, chung zinga 18012-in exam an bei a ni. Distinction-ah 2904 an awm a, First Division-ah 5218, Second Division-ah 4863, Third Division-ah 1862 an pass a. Pass percentage chu 82.43 (nikum aiin 14.1 in an tam) a ni. Nikum result nena khaikhinin Distinction-a pass hi nikum aiin 2053-in an tam a, First Division-a pass hi nikum aiin 2355-in an tam zawk a, Second Division-a pass hi 347-in an tam zawk bawk a, Third Division-a pass hi nikum aiin 2232-in an tlem zawk thung.
A pumpuiah zirlai exam-ah mipa aiin hmeichhia 1186 in an tam zawk a, pass zatah pawh hmeichhia 1201-in an tam zawk bawk. Management wise-ah Deficit School-in an titha ber a, 96.947% in an pass a, 'purely private candidate' pass percentage a hniam ber a, 85.52% a ni. Subject malah Mathematics-a fail an tam ber a, 2400-in an fail a. Candidate zawng zawng pass thei vek school hi 175 an awm a, candidate zawng zawng fail vekna school hi 7 a awm thung a ni.

Post a Comment

0 Comments