Hnam ropuite u, tho r'u le XV

Lalhruaitluanga Chawngte


March thla a ni awm e, Zofate leh sap sipaite inkah țum, Zofate'n khawvel ram ropui, ram ni tla seng lova roreltute an hual beh țum kha; 1892 kha.

Chung lai chuan a hun laia khawvel awptu British sorkar khan min awp tawh a, mahse kan tlawm lo! Min awptute chuan hmar bial leh chhim bialah min țhen a, bawrhsap hran ve vein an țhutchilh. Chutih laia hmar lam bawrhsap McCabe-a hote chu Sesawngah Lalburha hote'n an kap a, chhim bial bawrhsap J Shakespear-a'n a hriat veleh a pui turin sipai hruaiin a thawkchhuak ve nghal. Chu chu chumi țuma an inkah chhan chu a ni.

Pic: #John_Chhana


'Tarmita' kan tih mai Shakespear-a hote chu hmanhmawh takin an kal a, mahse Chhinlung chhuak tlangvalte'n an duh duha chettir an tum lo; Chhipphir luh dawnah an lo inzar pharh a, sap sipaite chu an lo chang ta ran mai.

Silai a puak ta.

Nilengin an inkap a, khawvel ram ropui sipaite kaptu, A Aw B pawh la nei lo tlangval rualte khan uniform an nei lo a ni mai lo, silaimu pawh an nei ta lo. Chutia silaimu an tlakchham chhung chuan Tarmita hote chu khuaah an lut thei ta a, 'Vai kulh tlang' tih hming pu taah hian an inkulh ta mup mai a ni.

Kan tlangvalte chuan silaimu leh zen an han ngaihtuah chuk chuk a, an inlak ngah hnu chuan Vai kulh tlanga inkulhte chu an hual bet ta a.

Silai a puak leh ta.

Chuta an inkap chu a nasa awm khawp mai: "Kan han inkap a, sipai rual silai ri chu rial rum leh khawpui ri ang hian a ri hluah hluah a..." tiin Vanchhunga chuan a sawi.

Kha inkahnaa tel Suaka huaisenna leh inpekna kha: sap sipaiin an silaimu an kah zawh vat nan tiin kah turin a intarlang a, khawvel awptu British sipai, hlawh neia ralthuam țha nena thawkchhuakte hmaah chuan thinga siam silai lem puin an kah turin a ding a nih chu!

A hnampuite him nan sorkar ropui ralthuam hmaah tawktarhah a țang tihna a nih chu! Sap sikul naupangte hriatthiam theih turin han sawi ila- hmelma sipaite target atan a inpe tihna a nih chu - a chipuite him nan!

Kan thlahtute chanchin hi a va han ropui țhin - an thlahte chanchin pawh hi mawle! He hnamah hian an chipuite him nana tawktarh atana țang ngam an awm tih ka chiang a ni.

Post a Comment

He post chungchanga i ngaihdan lo sawi ve rawh:

Previous Post Next Post