Leipui vatin mihring ruhro leh thawmhnaw vat chhuak!

Aizawl | December 9, 2020: vawiin chhun khan N. Vanlaiphai atanga 4 km vela hla, Thingsai road thlang lawkah Pu Zorampana N. Vanlaiphai Damdawi veng te leipui tur vat chuan, mihring ruhro leh thawmhnaw hmun hrang hranga darh nuai mai chu an vat chhuak niin thu dawn a ni.



Mihring ruh ni ngeia hriat an hmuhte hi; malpui ruh, ngal ruh, khel ruh, kawng ruh leh luruh te a ni a. Heng ruhte hi ramsa ten an lo pu darh niin rin a ni. Metre 20 bial chhung velah heng ruh leh thawmhnawte hi hmuh a ni.



Mihring ruang ruh ni ngeia hriat an hmuhna hi Hrangturzo tlang pang kawngpui thlang, black top atanga metre 10 vel a ni a, ruhro te hian uih rim an nei tawh lo. Khua atanga km 4 vel leka hla, kawngpui atanga metre 10 velah heng mihring ruhro leh thil chi hrang hrang hmuh a ni hi a ngaihna hriatthiam a har hle. A thih hlim atangin helai hmunah hian a ruang awm ni ta se, a rim hi hriat ngei awm tak a ni a, vawiinah ruang ruhro hmuh a nih hian uih rim engmah a awm tawh si lo a ni.




Mihring ruhro hmuhna bulah hian Rucksack bag hmuh a ni a. A chhungah chuan Mizoram Baptist Kohhran baptisma certificate, hair oil, tooth brush, ball pen 2, chemte tha vak lo, samkhuih, sign pen (nawihnawk rawng), rawmawl hlai angreng tak, ha siamchawp, darthlalang (mirror) keh them pahnih, pheikhawk hrui tel that, thelretpuan, satha ip thleh that, jacket chhung thuahna niawm tak feet khat vela hlai uluk taka thleh (hei hi rubber band-a tawn niin blade a in tawn bet tel bawk). Rubber band hi a la fan thei. Bag chhung leh pawn lamah pawisa hmuh a ni lo.
Ruskshack atanga apiah lam deuh feet 10 velah mihring ngal ruh, khel ruh leh kawng ruh nia hriat te chhar a ni bawk a. Chumi thlang lam feet 20 velah mihring luruh chhar a ni. Luruh hi a filh vek tawh a, hriamhrei hnuhma awm ang a awm lo.

Ruhro hmuhna bul velah hian bible pathum hmuh a ni a, pakhat chu mitthi thu-in a bawh hneh deuh avang a nih hmel a, enchian hleihtheih a ni ta lova, a dang pahnih te hi hindi leh english bible a ni.

- Vana.lps

Post a Comment

0 Comments