MZU B.Com Gold Medalist 2020 Rohluzuali

Mizoram University (MZU) Bachelor of Commerce (B.Com) Gold Medalist 2020 Rohluzuali kan belchiang.



CGPA 8.43 hmu a, B.Com gold medalist Rohluzuali hi 'Zuali' emaw 'Zualtei' emaw tia koh thin niin, Lalhuzami leh Vanlalchama te fa pakua zinga a naupang ber  a ni.

An unau hi pakua niin Mipa pahnih leh Hmeichhia pasarih a ni a, Lungleng veng, Hnahthial-ah chengin an khawsa a, BCM Lungleng Hnahthial-ah an lawi bawk.

Rohluzuali  hi May 24,  1999 khan a piang a, a ni hian phirpui neiin, MZU B.Com top ten list a 10-na  Zarzoliani hi a phirpui a ni nghe nghe a ni.

Zirna lam:
1. Pawl 1 atanga pawl 10 khawiah nge i kal? eng zatna nge i nih thin, pawl 10 pass kum ?
- Mantawni Memorial English School, Hnahthial ah Pawl 8 thleng ka zir a, pawl 9 leh pawl 10 hi Government High School, Hnahthial atangin ka zo leh a ni.
    Pawl 5 vel thleng kha chu ka ti tha em em ngai lo a, top 3-ah han lan ve leh hlawl chang te chu ka nei ve a. Pawl 6 atang khan Pathian khawngaihna zarah 1na ka nih loh pawhin 2na ka ni chho ve char char a ni. Pawl 10 hi 2015 khan First Div-ah ka pass.

2. Pawl 12 hi khawi atangin nge i pass? chuan, engah nge, a kum nen ?
Pawl 12 (Commerce) hi 2017 ah St.Paul's  Higher Secondary School, Aizawl atangin First Div-ah ka pass a ni. 
  
3. Zirna sang zawk i zir leh i zirna hmun leh kum? 
Bachelor of Commerce (B.com) hi Higher And Technical Institute of Mizoram (HATIM), Kawmzawl Lunglei ah kum 2017-2020 thleng ka zir a ni.

 

# I lehkha zir dan? 
- A hmasa berah chuan ka lehkha zir hma hian tawngtainain ka zir tur leh keimah ka inhlan hmasa ziah thin. Class a lecture min pek hi ka ngaithla ngun thei hle a, class kal loh mai mai hi ka ti ngai lo a, ka damlo nasa lutuk te a nih loh chuan class hi ka hmaih ngai lo a ni. HATIM hi Residential College a nih angin, Study hour min pe a nikhat-ah darkar 5 (zingah darkar 2 leh zan lamah dar 3), hetah hi chuan kan duh emaw duh lo emaw kan study table ah hian thut ngei ngei tur a ni a, kan zir leh zir loh chu kan thu thu. Mi dang anga vawi hnih vawi thum chhiar a hre thei nghal vek ka nih loh avang hian, he hun hi ka theih ang tawka hman tangkai ka tum ve thin, chhun lama kan zir hi zan lamah a theih chuan ka ennawn ziah a, hei hian thiam a tichiang hle in ka hria, a tam berah study hour min pekah hi chuan darkar thum vel ka hmang thin, zan lamah ka muthlu ve nasa thin a😀 a bikin study hour lai hian chuvang chuan, dar 10 hnuah hian ka zir leh thin a ni. Accounting hi ka thiam lo ve em em a chuvang chuan ka chawk nasa. Hun awl kan neih hian kan thianho in kan chawk thin bawk a, hei hian nasa takin min pui bawk a ni. A theory-ah hian dan leh dun (laws) hrang hrangte a awm thin avang hian hetiang subject bik hi chu ka hrethiam phawt a, chuan a theih ang ang hi ka vawng ve leh thin, a dangah hi chuan ka chhiar a, khata tanga ka hriat ang ang kha ka ziak chhuak a, thiam a chiang bikin ka hre thin mahse ka ti vek seng lo a, tih vek theih a tha khawp mai. 


#Harsatna I hmachhawn dan?
- Pathian khawngaihna a zarah, ka hriselna ah hian harsatna ka tawk zeuh zeuh tih loh chu han sawi em em tur ka nei lo a, 3rd semester kan nih lai hian ka ke ka titliak a, in lam atangin thla 1 leh a chanve vel ka kal thin a, he thil ka tawn lai pawh hian Pathian min hmangaihzia a tharin ka hriat leh phah a, ni hnih chiah class ka kal lo a, Continuous Assessment Test-ah pawh 2na dinhmun ka luah thei hial a ni. 5th semester kan nih khan pum lam ka sawisel tana, ka hmai a ron bawl vak bawk a, ka ruh hi a na vak zel bok a hei hian ka rilru ngaihtuahna a tibuai hle a, ka zirna a nghawng bawk a, mahse ka chhungte leh ka thiante min tawngtaisakna a zarah, he ka natna tawh atang hian thlarau lamah nasa takin hma ka sawn a, harh tharna min petu leh ka vanneihzia min hriatchiantir tu a lo ni ta zawk a, ka lawm hle a. Tun kan exam zawh khan ka inentira result tha lo sawitur engmah awm loin, rilru hahdam takin ka awm leh tawk a ni.

Gold medalist i nihna (Subject) leh CGPA?
- Commerce ah niin 8.43 ka score a ni

Gold medalist ni tura i beih dan?
- Gold medalist hi ka in ring ngai em em lo a, han sawi kur duah em em tur pawh ka hre lo. Keima tawkah hian ka zir nasa ve em em a, ti tauh tauh peihna hi ka ngai pawimawh hle bawk, mut chhuak chung chung pawha han tihluih tlat te hi keimahah chuan a hlawk hle a ni. Thiam loh ka neih chuan kan zirtirtute leh hi ka pan a, an nin ka hriatthiam hma min hrilh thin a, an chungah poh ka lawm hle a ni. Pathian hi han in kawl tir vek mai ila, a ni chuan kan beih tauh tauhna te hi a hmu reng a ni tih hria ila, chuti chuan kan dil loh thleng tleng hian malsawmna hi mi lo pe thin a lo ni zawk a lo ni.

Gold medalist ni tura i beihnaah faculty lamin an ṭawiawm/pui tha chein i hria em?
- Tehreng mai, an ni hian lehkha min zirtir mai ni loin tawngtaina nen an fa ang chiahin min enkawla, min fuih a, min tiphur thiam em em a. Engkimah approach an nuam em em vek a, an mahni vanga hetiang dinhmun thleng thei liau liau hi ka ni.


I zirna atana i chhungte pawimawhna:
- ka chhungte hian min support tha em em a, bang lovin kan tan an tawngtai renga, ka tichhia emaw tha emaw min fuih phur thiam em em reng a ni. Tuna ka ti theih tawk chu ka thil tih engkimah theihtawp chuah a, an mahni chawimawi hi a ni a, hlawh neih a an mahni tana thil tha tak tih hi ka chak ve tawk hle a ni.

I zirna atana i thiante pawimawhna:
- HATIM ka luh dawn hian Pathian hnenah ka dil pakhat chu, 'thian tha tak' hi a ni. Ka dilna chu chhanin a awm chiang hle a, kan class 22 niin kan in kawm vek a, Pathian atang chhuak thian inhmangaihna hi ka hmu chiang hle in ka hria, ka lu chunga kut khat meuha min tawngtaisak thin tute an ni. Thiamlo bik an awm ang tihhi kan hlauh ber ani thin, keimah bikah hi chuan Accounts ah hian min pui nasa khawp mai a, dawhthei takin min zirtir bawrh bawrh thin a, he ka hlawhtlinnaah pawh hian dinhmun pawimawh tak an chelh a ni.
 
A duhzawng leh ngainat zawngte:
Rawng - A sen (Red)
Chawhmeh  - Alu leh Bawngsa
Incheina - Simple tak, kawr fual leh flats.
Rimawi – Classic
Mizo Ziaktu zingah - Mafaa Hauhnar 
Hla- Rich Mullins a phuah All the way my savior leads me
Hla phuahtu - Zarmawia
Teacher - Ka Nu (High School-ah min zirtir thin)
Leader - Abraham Lincoln leh APJ Abdul Kalam 

Mize ngainat zawng:
- mi inngaitlawm tak, a hun leh a hmun hria, mirel hmang lo, fiamthu duh ve tak.

Mize ngai nat loh zawng:
- mi chapo leh mi an chhiatna hre thei em em mai.

Hobby- Ei siam 

Relationship status - Single

Kawppui atan duhzawng:
- Pathian tih tak leh taima tal, mi puitling tak.


Zawhna dang:::
1. A tel lova i awm theih loh: Pathian

2. I nun kaihruaitu: Tawngtaina

3. Hringnuna i hlauh ber: Midangte tana mi hnawksak nih. 

4. I tih ngai miah loh tur: Ka theih hram chuan midangte tana harsatna siamtu nih hi ka duh lo ber a ni.  

5. Mizo Tualzal nuna tha i tih: Chhiat that nikhuaa kan inpuih tawn dial dial thinna hi. 

6.  Quote i duh ber:
"Ani chu ka inhumhimna leh ka kulhpui a ni a; Ka Pathian, ka rina chu a ni" 
- Sam 91:2


7. Mizoram leh Mizo tualzal nuna Mizo hmeichhiate dinhmun:
- Mizo hmeichhia te hi taima tak, theihna leh thiamna sang tak nei niin ka hria a. Tun dinhmun ah enin Sumdawngna in lian tak tak te, zirna In a zirtirtu tam zawk leh sawrkar Pisa a din hmun pawimawh tak tak chelhtute kan ti ta fur ta mai a. Mizo hmeichhiate dinhmun chawisan a la ngaihzia kan sawi reng lai hian, mahni inrintawkna kan neih chuan kan dinhmun hi tuma min chawisan sak ngai lovin sang tak kan thleng thei a ni.

8. Hnam hmingṭthat leh hmingchhiat kawngah Hmeichhiate'n mawhphurhna:
- Hmeichhiate hi mizo hman timawitu kan ni a, mizo nula hmeltha tak, mithiam, mize mawi tak nei pakhat ringawt pawhin hman a chawimawi theih zia te kan hmu fo thin. Kan hnam nena inzawm tlat kristianna nena inrem tak siin kan incheina, kan hun leh kan nun te hi i hmang ila, engkimah mipa zawkte zai ngaih thiam hi a tha hle mai.

9. Hnam ziarang chawinun kawnga Hmeichhiate mawhphurna:
- Hmeichhiate hi mipa te aiin incheina huang chhungah ringawt pawh hman ziariang pholan kawngah remchanna kan nghak hle a, puan chi hrang hrang mizoin a kan neihte hi bih uar thar sauh sauh ila, thangthar ten a an thiam loh em em nia ka hria buhthlei te, em phurh te hi tih vak ni tawh lo mahse aia naupang zirtir thiam zel hi kan mawhpurhna liantak zinga mite an niin ka hria.

10. Mizote tan 'Fa neih tlem' inzirtir hi a ṭtulin i hria em?
- Kan hnam hi kan la te em em a, hman boral mai thei dinhmuna ding ka ni chuvang chuan 'fa neih tlem' inzirtirna hi chu tulin ka hre lo.

11. Mizo hnamṭthanmawh bawk nia i hriat?
- Changkanna hian min chiah hneh lutuk a, tawhhreh leh tawhzah nei, inti changkan satliah nu leh pa te chawm hlawm ni si kan tam lutuk ta hi a pawi ka ti hle a, hei hi kan thanmawh bawk te zinga mi niin k hria.

12. Mizo hnam damna atana  kawng awm nia i hriatte?
- Keimahni hnama kan chian thar leh na leh Pathian kan belh tlat hi a pawimawh hle in ka hria.

13. Hnam chhan nana Hmeichhiate ṭtangkaina leh mawhphurna?
- Chhungkua ah hian nu ber hian mawhphurhna sang tak a nei a, engkim hi inchhunga inzirtirna atanga intan a ni. Ka nu in a sawi fo chu, sap ram ah poh awm ula infate hian mizo tawng, mizo nun dan an thiamin an hre nal em em tur a ni tih hi. Kan pianna ram Mizoram bak hi ka ram tia sawi tur kan nei lo a,a boral hi i hlau ang u. Kan tih theih ang tawk te hi thahnem ngai takin hlen chhuah i tum theuh ang u.

14. Zirna, Khawtlang leh Kohhran hi? 
- Zirna hian kan khawtlang leh kohhranah hmasawnna tam tak a neih theihna turin a pui nasa hle a, zirna in a thlensan poh leh khawtlang a changkang a, kohhran a nuam thin a. Thil in ang lo tak tak kal kawp tlat si niin ka hria.

15. Khawtlang, Kohhran leh nangmah:
- Kan khua hi kum 2015 atang khan mumal taka ka awm tawh loh avang hian kohhran leh khawtlangah ka inhmang em em lo a, han ho chang hi chuan theih ang angin ka i hmang ve a, chanvo min pe te anih chuan hlenchhuah ngei ka tum thin.

16. Social Media leh Nangmah:
HATIM-ah khan Phone kawl phal kan ni lo a, Social Media hi ka khawih nasa em em lo a, amaherawhchu, ina haw chang hi chuan ka khawih nasa ve thin.

17. Mizoram thalai tam tak tlakchham:Taimakna

18. Mizo ṭhalaite hian ngaihsan tur dik an ngaisangin i hria em?
- Hei hi chu a mimal tinah a inang awm lo e, Western culture in min chiah piah nasa tawk em em a, tawhchhuah nei mang silovin ka incheina a sang em em a, heihi pawi hle in ka hria. Hetianga inchei thei tura an tawhrimna, hlawhtling tura an beih nasat zia te hi i zir zawk ila a tha hle ang.

19. Ngaihsan tur dik nia i hriat: Lal Isua

20. Hlawhtlinna tura pawimawh: Taimakna

21. hloh i hlauh ber: ka inrintawkna

22. Hnam dang nupui pasal neih hi:
- Mizote hi hnam tlemte kan la ni lo a, ral mai thei dinhmunah kan ding a ni tih kan hre vek a, chuvang chuan mizo chuan atheih hram chuan mizo vek hi nupui pasalah neih hi a pawimawhin ka hria.


I thalaipuite tan fuihna--
- I zirnaah a ni emaw, i hnathawhnaah a ni  emaw  taimakna nen thawk la, miin an theih chu i thei lo bik turah in dah ngai suh. Chuan, hei hi hre reng la hna eng pawh thawk la, hna hniam bik a awm lo a ni tih hi.

EXPLOREMIZORAM.COM i hmuh dan:
- In fakawm ka ti hle mai, Mizoram chhunga chanchinthar ber ber te in chhawpchhuakin, mi hlawhtlinna in lawmpui thiam hle in ka hria, in kal zelna turah Pathianin malsawm mawlh mawlh che u rawh se.


Founder/Editor
Explore Mizoram



(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Post a Comment

0 Comments