* Ease of Business leh Maritime Logistics lama hmalakna hi Sorkar chuan a ngai pawimawh a ni: PM
* Andaman & Nicobar Islands hi lawngchawlhna hmanga hmasawnna thlenna hmunpui a ni dawn: PM
* International maritime trade atana lawngchawlhna hmunpuiah Andaman & Nicobar Islands hi kan siam ang: PM
August 10, 2020: Prime Minister Pu Narendra Modi chuan vawiin khan Andaman & Nicobar Islands leh India ram hmundangte thlunzawmtu tur submarine Optical Fibre Cable (OFC) chu video conferencing kaltlangin a hawng a. He project atan a lungphum hi PM hian December ni 30, 2018 khan Port Blair ah a lo phum tawh a ni.
Prime Minister Pu Narendra Modi chuan he connectivity hian thliarkar tan kawng thar tam tak a hawn sak dawn a ni tih thusawiin Km 2300 a thui submarine cable hi hun tiam aia hma a zawhfel a ni thei chu mawhphurtute fakawm a tih thu a sawi a ni.
Prime Minister chuan thliarkar hmun tam zawk tuamin chennai leh Port Blair inkar, Port Blair leh Little Andaman inkar leh Port Blair leh Swaraj Island inkarah te service hi vawiin atang a tan nghal anih tur thu a sawi a ni.
Prime Minister chuan cable kilometer 2300 vel a thui tuihnuai a zam chu thil namailo leh ropui tak anih thusawiin tuihnuai thuk taka survey tihte, cable quality maintain-te leh specialised vessel-te hmanga cable phum chu hna awlsam tak a nilo a ti a. He project hian harsatna hrang hrang a hmachhawn thusawilangin tuifawn natakte, ruah leh thlipuite leh fur natakte leh Corona Hripui leng vanga harsatna te a paltlang a ni a ti.
Prime Minister chuan Andaman & Nicobar Islands hian kum tam tak chhung chu he connectivity hi an mamawh tih hriain an lo awm tawh a mahse a tihlawhtling turin hmalakna engmah siam a nilo a ni a ti a. Pu Modi chuan harsatna liantham lutuk awmlova project tihpuitlin a ni thei chu lawmawm a tih thu a sawi a ni.
Prime Minister chuan Andaman & Nicobar Islands mipuite tana connectivity tha leh man tlawm zawk ruahmansak hi ram mawhphurhna a ni a ti a. Project a tha thawhtute leh a kaihhnawih zawng zawngte chu lawmpuina hlanin Pu Modi chuan Submarine Cable hmalakna hi Delhi leh ramchhung hmun laili zawkte nen A&N Islands hi an inhlatlo a ni tih tichiangtu a ni a ti.
Khua leh tui zawng zawngte tana khawsak awlsamna siamsak
Pu Modi chuan mitin khawsak a lo awlsan zawkna atan khua leh tui leh sector zawng zawngte hnena facility tunlai zawk pek hi Sorkarin a ngaih pawimawh thusawiin A&N Islands leh ramchhung hmundangte thlun zawmtu Optical Fibre Project hi mipui tana khawsak awlsam zawkna Sorkarin a ngaih pawimawh zia entirtu a ni a ti a. Sorkar chuan nation security lam atan a pawimawh ramrite leh Island state a chak taka hmasawnna hnathawh kalpui hi a ngai pawimawh hle a ni a ti.
Digital India hmanga kawng thar inhawn belhte
Prime Minister chuan Submarine Cable hian A&N tan inbiakpawhna man tlawm zawk leh tha zawk a pe dawn tih thusawiin digital India atang a hlawkna awm.thei zawng zawng, a bik takin online education tihchangtlunte, tele-medicine-te, banking system-te, online trading te leh tourism tih hmasawn kawngahte a chhawr tangkai dawn a ni a ti.
PM chuan Indian Ocean hi kum sang tam tak chhung chu India ram tana sumdawnna hmunpui leh ralrelna hmun pawimawh a lo ni tawh thin tih thusawiin Andaman & Nicobar hi India ram tana Economic-Strategic Cooperation hmun pawimawh tak a ni a ti.
India ram thliar karte chuan India ramin Indo-Pacific region a sumdawnna kalphung thar a ruahmanah mawhphurhna pawimawh tak an nei dawn a ni a ti.
Pu Modi chuan Act-East policy hnuaiah tuifinriat/tuipuiin a tlawhpawh East Asia ramte leh ramdangte nena inlaichinna nghet India in a siam kawngah Andaman & Nicobar hian mawhphurhna sang tak a nei a, a neih chhunzawm zel bawk dawn a ni a ti.
Hemi kawng a hmalakna tichak tur hian Island Development Agency chu kum 3 kalta khan din anih thusawiin Andaman & Nicobar a kum tam tak chhung project tihhlawhtlin loh a lo awm tawhte chu chak taka tihhlawhtlin chho mek a ni a ti.
PM chuan Andaman & Nicobar a thliarkar 12-ah project pawimawh tak tak kalpui mek a nih thusawiin internet & mobile connectivity tha zawk pek annih bakah hian lei, boruak leh tui atanga inkalpawhna lam pawh tihchangtlun tuma hmalak chhoh anih tur thu a sawi a ni.
Prime Minister chuan lei (bridge) lian tham tak pahnih siam mek leh NH-4 a North leh Middle Andaman te tlawhpawhna kawng (road) tichangtlung tura hmalakna chungchang pawh a sawi lang a ni.
Port Blair Airport chu tihtlangtlun mek anih thusawiin khualzin/passenger 1200 dawl zo tura siam a ni dawn tih sawiin hemi bakah hian Diglipur, Car Nicobar leh Campbell Bay-ahte airport hawn an ni tawh a ni a ti.
Pu Modi chuan Swaraj Dweep, Shaheed Dweep leh Long Island-a Passenger Terminal te bakah Floating Jetty lam chi Water Aerodrom Infrastructure te chu thla rei vaklo chhung a peihfel anih tur thu a sawi a ni.
Kochi Shipyard a lawng pali sak mekte chu thliarkar inkar leh thliarkar leh ramchhung hmundangte tui hmanga an inkalpawhna tichangtlung tura dah an nih thuai tur thu pawh a sawi a ni.
Andaman & Nicobar chu lawngchawlhna hmanga hmasawnna hmunpui a siam anih tur thusawiin khawvel ramdangte lawngchawlhna nen a inelpha tur tawk chauh a inhlat an ni a ti.
Prime Minister chuan lawngchawlhna hmun nei tha leh tuipui atanga tlawhpawh neitha ramte chuan kum zabi 21 ah hian an sumdawnna tihchangtlunna hmanrua atan an hmang thei dawn a ni a ti.
Tundinhmunah hian India ram chuan intodelh tumin hma a la mek a, khawvel supply leh value chain-ah dinhmun pawimawh tak luah tumin tan a la mek a ni tiin hemi kawngah hian kan waterways network leh kan lawngchawlhnate hi tihchangtlun a pawimawh hle a ni a ti a. Pu Modi chuan Port Infrastructure tihhmasawnna atana dan lama harsatna awmte pawh tihbo mek zel a nih thu a sawi a ni.
PM chuan tuipui kaltlang a ease of Business leh Maritime Logistics tihawlsam chu Sorkarin a ngaih pawimawh thusawiin deep draft inner harbor chak taka sak leh Great Nicobar a cheng vaibelchhe singkhat seng a TransShipment Port sa tura ruahmanna te a sawilang a. Pu Modi chuan he hmalakna avang hian lawngliante an chawlh theih dawn bakah hnathar siambelhin maritime trade a India share pawh a tipung dawn a ni a ti.
Tui lam hausakna hmang a ei leh bar zawnna (blue economy) kaihhnawih thliarkara eizawnna - sangha man, Aquaculture leh SeaWeed farming-te chu Andaman & Nicobar a infrastructure tunlai zawk din mekte chuan hmasawnna a thlen sak dawn tihsawiin Sorkar hmalaknate chu Andaman & Nicobar tan hian facility thar ni mailova khawvel tourist map-a phochhuaktu a nih ngei a beisei thu a sawi a ni.
- PIB Aizawl
(A hnuaia fakna hi lo hmet ve rawh.)
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: