August 19, 2020: India chuan coronavirus invenna vaccine a siam chu mihring laka enchhin thawh thumna (Phase 3 human trials of COVID-19) a nei ta tih NITI Aayog thu chhuah chuan a sawi.
Hetianga vaccine peih hnai anih tak avang hian Central Sorkar chuan vaccine siamtu company te chu an vaccine man ni thei awm a zawt tawh tih, NITI Aayog member V.K. Paul chuan a sawi .
Hetih lai hian, Chinese vaccine Sinopharm company siam pawh December 2020 ah chuan hman theihin an peih fel hman ang. A man hi vawi hnih chiu Rs 10,000 a nih tur thu Chinese Communist Party Chanchinbu Global Times report chuan a tar lang.
Australia Prime Minister chuan COVID19 vaccine siam peih anih chuan an ram mipui zawng zawng tan a thlawna pek vek an nih tur thu a sawi thung. Sorkar laipui hian he ruahmanna ang hi kalpui thei tak maw?
NITI Aayog member V.K. Paul chuan India ram chhungah COVID-19 vaccine hi siam mek company 3 an awm a, an thlen thui chin a inang lo vek a, “ vaccine pakhat chu mihring chunga enchhinna ( phase-3 trials) tih mek a ni a, a dang pahnihte pawhin hma an sawn țha hle a, tunah hianphase 1-2 clinical trials an ti mek a ni.” Amaherawhchu, VK Paul hian COVID19 vaccine siamtu company leh an nihna te erawh a sawi lang lem lo thung.
Central Sorkar chuan heng coronavirus vaccine siamtute dinhmun chipchiar tak leh an thlen chin chu a en thli thlai reng a, vaccines siamtute hmasawnna pawh a țha hle a ni, tih thu a sawi. Vaccine siam zawha hman theih anih hunah rang taka sem chhuah dan tur ruahmanna pawh peih fel vek a nih tawh thu a sawi.
*COVID19 vaccine price*
Central Sorkar chuan coronavirus vaccine siamtu company te nen vaccine man chungchang hi an sawiho tawh a, Sorkar chuan vaccine man tur awm zat vel hi Company hnehah bithliah thuai turin an ngen tawh a ni.
India ram chhungah hian ram dang thiamna tel lo, India tual chhung kut chhuak vaccines siamtu pahnih an awm a, chung te chu mihring hnena enchhin mek a ni. Chung te chu COVXIN leh ZyCoV-D te an ni. Covaxin hi Bharat Biotech, Indian Council of Medical Research (ICMR), leh National Institute of Virology, Pune țang khawm ten an siam a ni. COVAXIN hian mihring hnena enchhin thawh khatna thla khat chhungin a paltlang tawh a, mihring chunga enchhin thawh hnihna ( Phase 2 human trials) pawh tih zawh a ni leh tawh bawk. Mihring hnena COVAXIN enchhinna hi India ram hmun thlan chhuah bik (medical college) 12 an kalpui a ni. Vaccine dang leh chu Zydus Cadila -- Ahmedabad te siam mek ZyCoV-D a ni thung.
Hetiang anih mek lai hian Pune- khawpuia awm hmun khuar Serum Institute of India pawhin mihringa enchhin thawh thumna (phase 3 human trials) chu an ti zo tawh a, an ni hi Oxford-AstraZeneca’s nen thawkho an ni.
Tunah hian Khawvel pumah COVID-19 vaccine peih hnai zual candidate 8 an awm a, hengho hian mihring chunga enchhin (phase 3 trials) an hma chhawn mek hlawm a ni. Chung te chu :
1. Oxford-Astra Zeneca, 2. Moderna,
3. Pfizer-BioNtech,
4. Beijing Institute of Biological Products Sinopharm.
5. Wuhan Institute of Biological Products-Sinopharm,
6. Sinovac,
7.Cansino,
8. Russia’s Sputnik-V.
Hetiang anih mek lai hian Russia siam Sputnik-V chu conditional registration tih tawh a ni a, China siam Cansino a thiamna thuruk vawn țhat (patent) a ni tawh a, sipai tan hman theih tura pawm a ni tawh bawk.
University of Oxford leh AstraZenca Plc, te COVID-19 vaccine siam hi hi phase 3 trial India ram Medical College thlan chhuah 17 ah kalpui mek a ni bawk. A hlawm lian thama siam chhuah theih anih hunah Serum Institute of India in a siam chhuak ang. SERUM hi khawvel puma vaccine siamtu lian ber a ni.
Bill & Melinda Gates foundation ruahmannain Serum Institute of India hian vaccine mi pakhat chiu (one dose) chu Rs. 240/- manin a siam chhuak ang. He inremna ang hian COVID-19 vaccine hi 100 million dose a siam chhuak ang a, ram rethei a sem tur a ni ang, heng zinga 50% hi India ram state/district rethei zual te chan tur a ni phak hial ang.
Bloomberg chuan COVID-19 vaccine țha ber India siam Khawvelin a beisei hle tih a ziak ve mek bawk a ni.
Prime Minister Narendra Modi chuan Independence day thu chah a sawiah ram chhungah COVID-19 vaccine mihring tana him tualchhung scientist ten an bei mek a, mipui tan hman theih anih veleh rang taka sem dan tur pawh ruahman sa vek a nih tawh thu a sawi bawk.
*HRI KAI DINHMUN*
Nimin August 18, 2020 darkar 24 chhung khan India ram chhungah hri kai thar, 64,531 an awm a, hri kai tawh zat hi 27,67,273 an tling tawh a, thi pawh 1,092 awm belhin 52,889 an tling ta. Thi zat hi 1.91% an ni.
Enkawl dam 20,37,870 an awm a, 73.64% an tling tawh a, nimin lama dam zat hi 60,091 an ni.
Hei vei enkawl mek hi 6,76,514 = 24.45% an ni thung.
Source :
Financial Express
August 19, 2020
@ 09:32 IST
Indian Express
August 19, 2020
@ 12:29 IST
Ministry of Health and Family Welfare Report
===19==08==20==
Huna Kawlvawm
Post a Comment
He post chungchanga i ngaihdan lo sawi ve rawh: