Hun rei tak chhûng chu a nun ațanga a mangțha tawh, a kalsan tâk leh a ngaihsak tawh loh chu, a nunah chuan hriatchhuah leh châng a nei fo țhin a. Sûl tam takin a chhilh tawh, thar thawh leh tumna chuan a rilru a luah tlat mai a ni. An nunhlui a dâwn kîra inthiamlohna nasa tak a nei bawk. A kalsan tâk nula chuan, a hun leh nun pum atân a hmang țhin a, ani erawhin natna bâk a thlen si lo. Chu chuan a tinâ lehzual a, hun liam tawh hnu chu koh kir leh theih nise, tiin duhthu a sam vawng vawng țhin. Siamțhat ngâi tam tak a neih a hlen chuan, ngâiawh leh thei tûrah riâk a in ruat a. Chuti ang chauh chuan, nitin a ngaihtuah țhin.
‘‘After some time I’ve finally made up my mind,
She is the girl and I really want to make her mine,’’
Thinlung a lo hliam sak tawh hnêna kir leh chauh chu a rilrua riâk a nih miau avângin, hmangaihna awmze dik tak chu hrethiam ve ta hialin a in hria a. A mitdelna khua chu a lo sei hle a ni tih a thinlung mit lo vâr hnu chuan a hrethiam ta. Hun liam tawha a sûlhnu pawr tak tak te chu siamțha leh túrin a rilru a siam fel hial a ni.
Phûrna namên lovin a thinlung chu a khat a, a mitthlaah chuan ani nêna an hlimlai ni te a han hmu a, a hlimna chuan a tawng sâng hle. Chutihrual chuan, a kalsan lâia a hmêl kha a han hrechhuak leh a, a bianga mittui luâng ngiâi te, râwl chhuah túr alawi pawh nei lo khawpa châu hnâpa a țah lâi te leh a lam hawia bân phara a koh zui lawm lawm lâite chu chiang zetin a la hria a, hreawm a tiin a inthiam lo takzet a ni.
Ani chuan a hmangaih em em a ni tih a hre chiang em em a, a lam hawia a kîr leh a nih ngat chuan, hmangaih takin lo pawm leh thlap túrin a ring tlat a. Tin, amah pawhin a hmangaih ve a ni tih a inhrechhuak tawh bawk a, hlim takin hun leh ni te chu âm takin an chhiar dun tawh ang a, kâwlah ni chhuak leh tlâi ni tla túr te chu thlîr dûnin, rilru hmunkhat pû-in hringnun kawng an zawh dûn tawh dâwn a ni. An khawvel chu a tharin an duang ang a, damchhûng ni te chu hlim taka chhiâr dunin, hlim takin damlaipâr chu an chên tawh dâwn a ni.
Chuti ang khawvel thar leh awhawm tak din tur chuan, a hnuchhawn tawh lamah chuan kîr leh a ngai a. Mahse, a rilru puthmang dik tak a hriatchhuah tawh avângin phûrna in a khat tawh zâwk si!
‘‘I’m searching everywhere to find her again,
To tell her I love her;
And I’m sorry ‘bout the things I’ve done.’’
A pheichheh chu a zâng vah a, chhêmdam thlifîm kâra lêng delh delh ang hi a ni ber! A mitin a hmuh apiâng mai chu thar sârh hian a hria a; boruakah te chuan rimtui lêng vêl chem chem in a hre bawk a. Phûrna namên lo takin a chhûngril ațangin a țham er er a, suangtuahna lipuiah a inchhek per phar phar a, helhkham leh engto dang rêng a nei lo.
Hun rei tak chhûng a hmuh tawh loh vâng pawh a ni pakhat ang, a phûr dân chu sawifiah thiam rual loh a ni. Beiseina sâng tak hmachhuanin, nun bul țan țhat leh chu a duhthusam ber a ni a. A hringnun kal tawha a lungrualpui țhin ngei chu, a tâna khuanu ruat ngei niin a hre ta bawk a, a hnêna kîr leh chu atâna hringnun bul țan țhat lehna túr atâna rahbi pawimawh ber a ni rêng a. A tel lo chuan a nunah hmunruak zâu tak a awm a, chu a nunruak leh khawhar tak hnêm zo tu ber hnêna kir leh chu a tih túr dik tak a ni bawk a ni.
A nunhlui a mangțha tawhna hmunah ngei chuan hmun hla tak ațangin a kîr leh a ni a, a zinkawng pawh a thui tham viau na a; châu hmêl erawh a pu hauh lo. Hmanhmawh takin a nunhluia nula ngei chu zawng chhuak túrin a thawk chhuak nghal a.
An sûlhnu zawng zawngte chu chhui kirin; hmun tin, hmun tang chu a dap kual vêl vek a. Ni, a kalsan tâk, amah hmangaih êm êm țhin tu chu a ni; a mi zawn ngêi chu. Thlêr tin chu a zawh a, kâwi tinah a kal bawk. A awmna âwm tura a rinah chuan a zawng kim vek tawh a, mahse, a hmu thei chuang si lo. A inah lah hmuh túr rêng a awm hek lo va. Khawiah tak chuan țuan dâwn chu ni maw?
‘‘I find her standing in front of the church,
The only place in town where I didn’t search.’’
Hun rei tak kal tawhah khân a kalsan tawh kha a ni a, hun inher danglamin a khawsak a ti danglam zo tawh a nih te pawh a ring leh rum rum a. Mahse, he khuaah ngei hian a la khawsa a ni tih chu a hre bawk si. Khaw lian tak a nih lêm loh avângin vêng tin chu a tlawh chhuak vek tawh a, sakhmêl tawn túr erawh a awm chuang hauh si lo. A beidawn tâwp lamah chuan a beisei lohna hmun leh a zawn lohna hmun ber kherah chuan, a kalsan tâk amah hmangaih êm êm țhin tu ngei chu a tawng ta hlauh mai le.
Ni, mo thuam famkim nên Biâkin kawtah ngei a ni a hmuh ni.
A hamhaih hle a, a thil hmuh chuan a țhâwng bawk si! Ngâwi rengin a thlir tlawk tlawk ringawt a, sawi túr rêng a hre lo.
‘‘She looks so happy in her weddingdress,
But she’s crying while she’s saying this.’’
Mo thuam mâwi tak hatu, nula hmêlțha zet chuan a lo hmu ve thuâi a, a hmêlah chuan hlimna a lo lang chhuâk nghâl a, a nui sen sen a, a lam pan chuan a lo tlân nghâl thuai bawk a. Inhmatawnin Biâkin kawtah chuan an ding dun ta ngei mai le!
Țawng hmasak rêng inchuh a awm lova, rei ngial an ngawih hnuin; tlangval chuan, hun kal tawha a thiam lohna zawng zawngah chuan tih tak zetin ngaihdam a dîl ta a, inlamlêta lo kir a nih thu leh nunthara bul țan pui leh túrin a sâwm bawk a, a hmangaih takzet a ni tih chu, a hrilh mawlh mawlh bawk a ni.
Mahse.
Mo thuam mâwi taka inbel; nula hmêla hlimna lo lang chu a inthlâk ta daih mai le! A nuihmêl nung sârh chu chuâiin a mit ata mittui a lo hâw zung zung a, zuâi raihin, ‘‘Ka ngâi țhin takzet che asin. Ka hmangaihna che pawh a la pângngâi reng. I lo kîr leh hun hi ka lo nghâk reng țhin a. Mahse, tûnah chuan a rem tawh si lo! Ka tân i rawn kîr leh a, i kawng zawh pawh a thui tham khawpin ka ring, mahse, minute 25 in i tlâi hman tawh si,’’ ti’a țap zawih zawihin, pasal a neih ni túr a nih thu leh, minute 25 hma lamah tal lo thleng hman nisela, inneihna hial pawh chu țhulh a huam thu leh, a kianga hringnun hman chu a duhthusam ber a nih thu chu, lungchhe tak chungin a hrilh bawk a. Mahse, minute 25 lek avâng chuan, phengphehlepa khua a tlâi zo ta si.
‘‘Against the wind I’m going home again,
Wishing me back to the time when we were more than friends.’’
Tlangval chu a bing mup a, sawi túr pawh hre lovin a ding tlâw reng a. A lungphû te chu rang takin a inthûm rawn tlut tlut a, a khaw hmuh chu thim hmuk maiin a hre bawk a. Zawi hnakin a lehhawi a, pan lam túr pawh hre lovin a ke chu a pên satliah ve ringawt a, an nunhlui chauh chu a ni a suangtuahna luahtu chu. A thinlung hmunruak hnawhkhattu mamawh em em chu a chavái zo va, chhûngrila a nâ tawrh awm chu sawithiam theih pawh a ni lo. A bengah chuan, nula thusawi chu châmin a riâk reng a.
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: