Aizawl | July 30, 2020: Prime Minister Narendra Modi leh Mauritius Prime Minister Pravind Jugnauth te chuan vawiin khan Mauritius a Supreme Court building thar chu video conference kaltlangin an hawng dun a. He building hi infrastructure project lama India puihna hmang a an ram khawpui Port Louis a sak hmasak ber a ni a. Covid hripui leng reh hun a hman theih tura hawn a ni ang. He project chhinchiah tlak tak hi India sorkar atanga puihna USD maktaduai 28.12 hmang a sak a ni.
He hunah hian thusawiin Prime Minister Modi chuan mipui mamawh ngaipawimawh ber chung a hmalakna a pawimawh thu a sawi a. India ramin hmasawnna hna a thawhte chu mipui mamawhna a innghat annih thin thusawiin tuna mipui tana tangkai tur infrastructure project kalpui pawh hian India leh Mauritius ramte inlaichinna a tih ngheh a beisei thu a sawilang a. Prime Minister chuan Supreme Court building thar tunlai design a sak leh facility changkang ber ber hmang a thuam hi Mauritius judiciary in bunna atana a inhmeh thusawiin India leh Mauritius ramte thawhhona leh ngaihlut zawng entirtu a ni a ti a. Project hi a hun taka zawhfel anih thu leh a tira ruahman aia senso pawh a tlem zawk thu a sawi bawk a ni.
Prime Minister Modi chuan Mauritius nena hmasawnna hnathawh kawnga an thawhdunna chu India ramin hmasawnna hnathawh kawnga inlaichinna neih a duhdan nena inmil tak a nih thusawiin hetiang lama thawhdunnaah hian intiamkamna a awmloh thu leh politics emaw sumdawnna emaw lam kaihhnawih pawh anih loh thu a sawi a. Development cooperation ah hian India ram innghahna pui ber chu a thawhpuite ngaihhlutna leh India in hmasawnna lama a lo tawn hriattawh leh zirchhuah tawh hlanchhawn ve hi a ni a ti a. Tuna hmalakna hian India development cooperation in a ngaih pawimawh leh a innghahna 'inzahtawnna', 'Diversity', 'hmathlir' leh 'Hmasawnna tluantling' te a pholang a ni a ti a.
India ram chuan Mauritius ram mipuite hlawhtlinna chu chhuanawm a tih thu leh a lawmpui thusawilangin Prime Minister Modi chuan India-Mauritius inlaichinnah beiseina sang tak a neih thu leh hun lo kal zel turah pawh an inlaichinna chu tih ngheha a awm zel a beisei thu a sawi bawk a ni.
Prime Minister Jugnauth chuan project atan a India ramin chhawmdawlna a pek chu thinlung taka lawmawm a tih thusawiin ram pahnihte inthianthatna leh inlaichinna tichiangtu a ni a ti a. India puihna a Supreme Court Building sak chu Mauritius ramin infrastructure tichangtlung tura hmalakna a siam kawngah mellung pawimawh tak a nih thusawiin Mauritius justice system hmalakna thazawk, awlsam zawk leh huapzo zawk a kalpui kawngah a tangkai ngei a beisei thu a sawi a ni.
India ram hmathlir 'SAGAR Security and Growth for All in the Region' nen a inmil takin Supreme Court building thar saknaah hian India chuan chhawmdawlna a pe a. Mauritius hi Indian Ocean chhehvel ram zinga India thian rinawm a ni a, he hmalakna hi India ram tana hun lo kal zel tura inlaichinna sawhnghehna atana pawimawh a ni.
- PIB Aizawl
(A hnuaia fakna hi lo hmet ve rawh.)
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: