Aizawl | July 29, 2020: Mizo Zirlai Pawl (MZP) Sub-Hqrs Bairabi hruaituten Bairabi-a Health Worker, aiawh pawh dah loa sawrkarin a transfer chungchangah Kolasib Bialtu MLA, Minister of State Pu K.Lalrinliana hmuin thu an thlen.
MZP Sub-Hqrs hruaitute chuan, Covid-19 hrileng avangin Health Department te'n theihtawp chhuaha, indaih lo em ema hun an hman lai leh; Asha te thlenga duty tura an inhuikhawm laiin aiawh pawh dah lo va Health Worker transfer a ni hi an hriatthiam loh thu leh aiawh dah leh thuai turin an ngen.
Bialtu MLA Pu K.Lalrinliana chuan, MZP hruaitute hnenah hian; rang takin Health Worker post ruak hi dahkhah thuai a nih tur thu te, Health Worker Training chhuak Bairabi khaw mi an awm chuan a MLA fund hmanga chhawr a tum thu a chhanna a lo pek chu MZP chuan lawmawm an ti a, thleng ngei se an duh hle bawk a ni.
Pu Rintea chuan sawizawm zelin, "tuna Health Worker transfer tâk hian transfer hi a rawn dil hrim hrim a ni" a ti a. Amaherawh chu, MZP chuan kum 2017 daih tawha Health Worker-in transfer a lo dil tawh a hun laia an remtihsak tawh loh covid-19 hrileng buaipuia Health Department lam an buai em em lai a, transfer thut a ni ta mai hi tun hnaia party worker tu emaw nen thu inbah deuh an neih avanga thleng a nih loh hram an beisei a, tun hmaa Rulling Party mi leh sa nih avanga inluling taka invei vung vel ang kha MZP Sub-Hqrs Bairabi chuan Bairabi-ah hian awm ve lo se an duh tih an sawi.
MZP chuan, Bialtu MLA hnenah hian Forest Department Bairabi Range thawktu indaih loh thu leh thawktu dah belhsak thuai turin an lo ngen bawk.
Tun dinhmunah, Bairabi Forest Range-ah hian thawktu; Range Officer, Forester (A ni hi damlohna avangin damdawi inah a awm mek a, hna pawh a thawk hlei thei hrih lo lehnghal) leh Forest Guard te an vaiin thawktu -3 chiah an awm a. Bairabi Forest Range hian Mizoram puma Forest Revenue hi 30℅ vel kum tin an hmu chhuak ṭhin nia an hriat thu leh, Mizoram Forest product tam zawk thawn chhuahna kawng tawp a nih avangin thawktu awm tam an ngai hle a, ngaihsak an ngai hle a ni tia MZP Sub-Hqrs hruaituten an thlen chu bialtu MLA Pu K.Lalrinliana chuan chak taka bawh zuisak a tiam a; Forest Minister lo sawipui a, a hmuna a tlawh theihnan hma a lak tur thu te MZP hruaitute bula a sawi chu MZP Sub-Hqrs, Bairabi chuan lawmawm a ti hle a ni.
MZP Sub-Hqrs Bairabi chuan, HSSLC Compartment exam result chhuah veleh 2019-2020 session-a HSLC & HSSLC first division china pass-te chawimawina hun hman an tum thu an sawi bawk.
(A hnuaia fakna hi lo hmet ve rawh.)
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: