TÛN KÂR CHHÛNGA MIZORAMA THIL THLENG LANGSÂR ZUALTE

Buatsaihtu: V Kungtea

Email: kungteavandiau0785@gmail.com

June 21, 2020: Khawvêl hmun dangte rualin Mizoramah khawvêl huap Yoga Ni (vawi 6-na) hman a ni.

• Âwkin nî a lem a, Mizoram ațang chuan chawhma dâr 11 ațang khân a hmuh theih a, chhûn dâr 12:59 kha a thim zual lai ber a ni.

• Tlai lam dâr 4:10 khân richter magnitude scale 5.1-a nâin lîr a nghîng a; he lîrnghîng hi Ngopa, Mizoram ațanga ințan niin lei hnuai KM 9-a thûk ațanga ințan a ni.

• Zân dâr 7 leh a chanve khân khawvêl puma hripui lêng pualin Mizoram pumah chaw ngheia țawngțai rualna hun hman niin he chaw nghei țawngțai rual hi Mizoram Kohhran Hruaitute Committee (MKHC) huaihawt a ni a, kohhran mipuite’n an lo zawm ve theih nân TV (LPS & Zonet) leh youtube ațangin live a ni bawk.

• ZMC-a sample 562 en dikah hri kai 1 hmuh chhuah a ni.

June 22, 2020:  Khawvâr hma dâr 4:11 khân richter scale 5.8 (Magnitude)-a nâin lîr a nghîng a, khawchhak lam tlângdung na takin a sâwi a, chênna in RCC building a khi nual a; bang chim leh lei min tênau a awm a, mihring thi leh hliam erawh an awm hriat a ni lo.

• Pu Robert Hrângdâwla, IAS (Retd.) chu zîng dâr 4:25 khân Ebenezar hospital-ah a boral a, a nupui leh a fate 4 a kalsan. Kum 76 mi a ni.

• Chawhnu dâr 1 vêl khân Aizâwl Hlimen leh Sâmtlâng inrînaah mimal enkawl quarry a chim a; hnathawktu pakhat, Lalhruaizela, kum 23; Sâmtlâng Vêngthar chu a chhilh a, a hmunah a boral.

• Zân dâr 7 bâwr vêl khân Mizote’n Bassist leh Recording Engineer kan neih țhat berte zînga mi, Pu Lalthansiama (Siama), Aizâwl Saron Vêng chu a boral.

• ZMC-a Covid - 19 damlo enkawl dam, mi pathum chhuah an ni.

June 23, 2020: Chawhnu lam khân Covid - 19 hri kai enkawl dam mi 7 - Aizâwl mi 5 leh Saitual leh Kolasib mi 1 ve ve dam takin ZMC ațanga chhuahtîr an ni.

• ZMC-a Covid - 19 thisen test result chhuakah 3 an positive belh.

• Mizoram hmun țhenkhatah hemi dârkârahte hian lîr a nghîng: Chawhnu dâr 3:03, zân dâr 7:17, zân dâr 11:04 leh a hnu rei lo tê dâr 11:29-ahte.

June 24, 2020: Zanlai pelh dâr 12:02-ah lîr a nghîng leh a; khawvâr hma, zîng dâr 4 pelh hretah leh chawhma dâr 8:10 leh dâr 9:27-ah a nghîng bawk.

• Champhaia Covid - 19 hri kai mi 4 leh ZMC-a enkawl hmeichhe pakhat hri laka fihlîm leh tawh tih finfiahte chu chhuahtîr an ni.

• Siaha District Doctors Welfare chuan Mara Students Organisation (MSO) Jt. Hqrs. hruaitute lakah Siaha police station-ah FIR an thehlût.

• District a nih hnûa Khawzâwlin District Agriculture Officer a neih hmasak ber, Pu Vanlalthlamuana chuan a pisa a luah țan.

June 25, 2020: Chawhnu dâr 2 vêl khân Pu Lalchanglova (78), June 23, 2020 (Thawhlehni) chawhnu lam ațanga chin hriat lohva bo chu khaw lû maiah dam taka hmuh a ni a; an hmuhna hmun hi Kânghmun khaw lû, khûa ațanga metre 200 vêla hla a ni.

• Pu Zothantluanga, MLA, Aizâwl West 1 bialtu chuan Sairânga mitthi hâlna hmun ‘gas based crematorium’ a hawng.

• Chhûn lam khân Covid - 19 vei enkawl dam hmeichhe parukte chuan dam takin damdâwi in an chhuahsan.

• ZMC-a sample en fiah zîngah Covid - 19 hri kai 2 an awm.

June 26, 2020: Khawvêl pum huap ruihhlo hman sual dona nî, ‘International Day against Drug Abuse & Illicit Trafficking’ a ni a, kum tina an tih țhin angin Excise & Narcotics Department (Mizoram) chuan an ruihhlo man sa chêng nuai 928 hu an hâl ral.

• Covid - 19 enkawl dam 9-in ZMC an chhuahsan.

• ZMC-a thisen en fiahte zîngah Covid - 19 hri kai thar 1 hmuh a ni.

June 27, 2020: Covid-19 hri kai thar en dikna kal zêlah a kai 3 hmuh chhuah belh a ni.