TUAI LEH PATIL

- Rev. Lalbiakhlira

1. "Tuai" leh "patil" i tihte hian nâ an tih ber tur chu "vuak hrep" a ni lo. A chipui, a țhenawm khawvêng, a thisen zawmpui, a Kristianpui, a hmangaih - "Nangma'n" i diriam hi nâ a ti ber ang! Tawrh hlelhawm, "tur tluk tluk" a awm tawh țhin! I vêl a, an țap! I cheibâwl dânah an nâ! An nihna (Mipa nge hmeichhia?)-ah an buai! An tâwt! Intheh thawven an mamawh; "an nasa!" i tih khawpin, Pathian hre chang lo lêkin an tâl hiar! Nang lah chuan, "Keimah vâng a lo ni!" tih i tum bau lo lehnghâl!

2. "Tuai" leh "Patil" hi tu siam nge? E le! Pathian hre lo mihring phuah chawp mai mai! Pathian siam "mihring" chu: (1) mipa; leh (2) hmeichhia; an ni a, a bâk a awm tawh lo (Gen 1:27). "Tuai" i tih kha mipa; "patil" i tih kha hmeichhia an ni a; "mihring chi dang daih" an ni hleinêm! Pathianin "mipa leh hmeichhia" a siam zînga, "țha a tih êm êm" (Gen 1:31) kan ni vek alâwm.

3. "An zia ațang rêngin 'mipa' leh 'hmeichhia' an ni thei lo" i la ti țalh em ni? Pathian siam mi zawng zawng hi "mi inang" kan awm em ni? I hmel leh pian țo, mit nâute, kut zia, DNA, lungphu etc. reng rengah i anpui zawng teh le, Adama te nupa ațanga piang hlim zîngah i hmu emaw chu? Pathianin 'i duh dân' ni loin 'a duh dân' zêlin min siam a ni zâwk!

4. Pathian siam "Mipa" hi han bêlchiang teh: (1) Sek phiar phek phan tlat, pâ rût mai, an nuih pawha "hmmmn!" ti hmuk, "nâk na urha nui ve tho" an awm. "Nang chu mipa piah lam i ni!" tiin i bân ngawt thei em ni? (2) Mipa chhûngah tho hian taksa ruangâm, țawngkam, cheziaah no leh nêm tak pawh an awm. "Nang chu mipa i ni ve lo, 'tuai' i ni" i ti ngawt tur a ni em ni? (3) Mipa kan sawi chi 2 inkâr ami vek, inang lo țhiau kan ni a, inbân bîk tur kan awm lo!

5. Pathian siam "Hmeichhia" pawh hi han bêl chiang teh: (1) Pianzia, ruang âm, chezia, țawngkam leh kawng tinrênga "nu zêm mai" an awm. "Nang chu i no lutuk; hmeichhia i ni ve lo" i ti ngawt thei lo. (2) Hmeichhe chhûngah tho hian mipa tam tak aia hrawmhraw leh fuat ngah, tihrâwl hlang emaw tih mai tura phiar khat tlat pawh an awm thei. "Nang chu 'hmeichhia' i ni ve lo, 'patil' ni rawh" tiin i bân ngawt tur a ni em ni? (3) Hmeichhia hi a chunga kan sawi chi 2 inkâra mi vek, danglam țhiau an ni a, tumah inbân thei an awm lo.

6. Buai nân hmang suh. Mipa zîngah, "Kei chu miin "tuai" min ti tho bawk a, hmeichhe angin awm ila, pasal ka nei mai teh ang!" i ti tûr a ni lo! Hmeichhe zîngah "Kei chu miten "Pâtil" ti ngatin min sawi bawk a, mipa angin awm ila, nupui ka nei mai teh ang!" i ti tur a ni hek lo. Pathian ruat inneihna hi, "mipa leh hmeichhe inkâr" a ni tih hre reng la, bawhchhe ngâi suh (Mk 10:6-9). Pathian siam dânah che lungawi la, inpawm la, in iai suh. Mi bîk, "chhan neia siam" i nih pawm thlap la, Pathian țih a tâwk.

7. Pathian siam dânah hmeichhia emaw mipa emaw, mahni nihna tlânsana inthuam, incheibâwl, anpui kawpa "țha lo taka ti" kan awm em? Eden huan rûl tûr, chatuan thihna pâipâwn nun, "Pathian hawisan nun" (Rom 1:24-28) a nih kha. Khatah khân tawm reng suh, lo chhuak la. 'Hnehtu' Isua ke bulah țhingțhi la, nun nuam leh nun dik a lo kawhhmuh ang che. I 'tisa thuam' hlîp la, Kristaah inthuam la, chatuan nun kawng zawh zâwk ang che. Paula angin, "Keini sual kawnga thi tawh sualin engtin nge kan la nun theih cheu vang?" (Rom 6:2) ti tlat ang che. Mihring mitmei vêng suh; Pathian bêl tlat la, a tichak ang che.

8. Pathian thu chuan heti hian a ti: "A nih leh, mi fel lote chuan Pathian ram an luah lo vang tih in hre lo em ni le? Bumin awm suh u; inngaih hmangte emaw, milem betute emaw, uirete emaw, mi hurte emaw, mawngkaw hurte emaw, ruk hmangte emaw, mi duhamte emaw, zu ruih hmangte emaw, mi hau hmangte emaw, hlêprute emawin Pathian ram an luah lo vang" (1Kor 6:9-10) tih min hrilh si a.

PATHIANIN IN CHHÛNGKUA COVID-19 LAKAH VÊNGHIM CHE U SE LA; A SIAM CHHAN NUNPUI TURIN TICHAK CHE RAWH SE.