Aizawl | June 27, 2020: Nationalist Congress Party (NCP) President Sharad Pawar chuan vawiin khan ram himna chungchang hi politics thila hlawkna hmuh tuma inbeihna atan hman tur a nih loh thu a sawi a, 1962 a thil thleng kha hriat reng tur a ni, China in kan ram zau tak min hneh chhuh tih hriat reng tur a ni a ti.
Sharad Pawar hian he thu hi Congress hruaitu Rahul Gandhi-an Prime Minister Narendra Modi chu China sipaite leh India sipai te inkara buaina avang khan China hnenah ram zau tak a hlan a ni, tia a puhna chhanna atan a sawi a ni.
Congress party hian President hlui Rahul Gandhi ho hian June 15 a India leh China sipaite Eastern Ladakh, Galwan a an intihbuai hnu khan Central Sorkar demna leh elsenna thu an nei deuh reng a, hemi chungchang hi Pawar hian sawi chhuakin Rahul Gandhi chu na takin a khak a, "1962 kha hre reng rawh" a ti.
PM Modi chu China in Ladakh a India ram chinah a lo lut em, tih sawi fiah ngei turin a phut a ni.
NCP President chuan 1962 indona avang khan China chuan India ram chin zau tak a awp lui tak thu a sawi.
“1962 a thil thleng kha kan theihnghilh thei lo, China in kan ram 45,000 square kilometres lai min awp luih sak hi. Chuvangin politics thila hamțhatna zawnga hetianga inpuhmawh tumtute hian hmana thil thleng te pawh kha an theihnghilh tur a ni lo. Hei hi ram hnuk leh ram himna chungchang a ni a, hetiang thilah tumahin politics rawn keng lut suh se," tih thu Defence Minister hlui chuan Satara hmunah reporter te hmaah a sawi.
Sharad Pawar party Nationalist Congress Party (NCP) leh Congress hi thawkho an ni a, Maharashtra state a Sorkar siam tura inzawmkhawm pawl 'Vikas Aghadi' ah pawh an thawkho a, Shiv Sena kaihhruai Sorkar ah an awmho a ni.
Senior politician hian Aksai Chin area-a ram buai China in 1962 indo hnua a awp beh tak leh hetiang hi ni mahse, India chuan helai bial zawng hi a ramah a la chhiar reng a ni.
India leh China hian ram ri buai 3,488 km Line of Actual Control (LAC) an nei a,China hian Arunachal Pradesh pumpui leh Southern Tibet hi a ramah ngaiin rambuai niin a ngai a, India pawhin 1962 Indo țuma India ram a chhuhsak tak Aksai Chin ram zau tak hi a ramah a la ngai a, ram buai a ni a la ti reng bawk.
Hemi avang hian India map official ah reng reng China awp Aksai Chin leh Pakistan awp Kashmir pumpui Azad Kasmir hi India ram angin a la lan tir reng a ni. (Huna)
NCP hotupa hian Galwan a sipaite intihbuai chungchangah hian Central Sorkar demna chhan tur ngawt a awm loh thu a sawi bawk.
“Kan sipaite khan China sipaite ram ria hma rawn sawn zel tum te kha an lo dang a, chu chuan tha rum thawhna a thlen ta a ni mai. Hei hi tu emaw thiam loh emaw Defence Minister thiam loh emawa puh leh burbun tum tlat hi a dik lo hul hual a ni. Kan sipaite kha ram ri-ah khan beng chhi lo khan awm mai mai ta se, China in ram ri kanin an lo lut tih pawh an hre kher lo ang, " Defence Minister hlui chuan a ti.
“Kha buaina kha a awmzia chu ram ri kan vil uluk tih a entir a, chuvang chuan hetiang pawng inpuh ringawt hi a puitling lo a, dik ka ti thei lo", a ti.
Pawar hian a sawi lan bawk chu India leh China te hian ram ri vengtu sipai ten ram ri (LAC) ah silai hmang lo tura inremna an siam tawh thu a ni.
June 15 ni a India leh China sipaite inpheksualnaah khan India sipai 16, Bihar Regiment ten nunna an chan a, an zingah hian commanding officer pawh Chinese sipai kut tuara thi zingah hian a tel a, China sipai lam pawh thi an awm ngei a, China hian eng zat nge thi leh hliam tuar hi a sawi lo thung.
Source :
Hindustan Times
June 27, 2020
@ 17:15 IST
====27==06==20==
- Huna Kawlvawm
Post a Comment
He post chungchanga i ngaihdan lo sawi ve rawh: