PASTOR KAWR NGHAWNG VAR HI

Tun țum chu Pastor te hian eng vangin nge kawr nghawng var an hak țhin tih hi tlem in luhchilh leh teh ang hmiang. Sap țawng chuan clerical collar, clergy collar, Roman collar, dog collar te an ti.

Kum 1840 ațang daih tawh khan Anglican Minister te (Kohhran țawng bik Puithiam tihna) chuan  kawrchung dum hain leh necktie var an awr țhin. A chhan chu mi dangte (secular world) laka awlsam taka hriat hran theihna turin a ni.

Necktie varin a entir:

Rawng var hian hmangaihna, thatna, ngilneihna leh zaidamna a entir bakah thianghlimna a entir a, hetiang thinlung hi Kohhran mipuite chungah ka pu ang tih a entir.

Kawrchung dumin a entir:

Kawrchung dum hian inhlanna leh inpekna a entir a, sakhaw puithiamin kawrchung dum a hak hian Pathian hnenah a intulut, inhlan tih a entir. Hetiang bawk hian dan hremi (ukil) hoten kâwr chung dum an hak chhan hi, dan hnuaia intulut thlap tih leh dan hmaah chuan mi  in ang vekin a en a ni tih entirna a ni bawk.

Church of England Centre (Glasgow Herald: December 6, 1894) in a ziak danin Pastor kawr nghawng kan tih mai CLERICAL COLLAR hi kum 1865 khan Church of Scotland (Presbyterian Minister) Rev. Donald Mcleod, Glasgow khawpuia minister rawngbawlna chelhtuin a hmuhchhuah a ni.

He Clerical collar hi 1865 kuma hmuh chhuah ni mahse, a nawlpuiin Pastor/Puithiam kawr nghawng atan an hman chu kum 1880  chho ațang khan a ni.

Presbyterian Kohhran ațanga hmuh chhuah a ni chung hian Kristian sakhaw pawl dang te : Catholic Church, Anglican Church, Methodist Church, Eastern Orthodox Church, Baptist Church, Lutheran Church te pawhin an pawm vek.

II Vatican Council (1962-65) hma chuan Clerical collar hi Catholic Church tlem zawkna ramah khawlaia hak țhin (street dress) atan an lo hmang țhin bawk. USA ah thung chuan kum 1880 ațang tawh khan Catholic Church Puithiamte chuan clerical collar hak hi tih ngei ngei tur (mandatory) an lo ti daih tawh.

A hmu chhuaktu Presbyterian Church in Khawvel puma inang tlang taka an chin dan erawhchu, sakhaw serh leh sang pawimawh leh puithu bik : Pastor induction, sacrament, inneih, mitthi vui, ah te  a ni.

Source:

shumcokc.org

28062020

=========

- Huna Kawlvawm