Aizawl | June 10, 2020: India leh China sipai te, boruak țang tak hnuaia Ladakh chhak lam line of control an inepna hmun pali ațanga pathumah chuan "tlemin" an tawlh kir ve ve.
Nilaini leh Ningani hian sipai hotute an inbe chhunzawm leh dawn a, hei hi boruak tih daihna tur leh inrintawnna hmanrua a ni. Mahse Pangong Tso lam boruak erawhin ziaawm lam a la pan thei chuang lo, helai hi an inep nasatna lai hmun zawk a ni. Chinese sipaiten tlangram zingzum 8 km vela thui “Finger-4 to 8", May thla bul lam ațang tawh khan India sipaite patrol chet velna chu an la dang chat reng tho a ni.
Thawhlehnia official in a sawi dan chuan "inhrethiam chunga sipai hnuhkir hretna" a la ni deuh mai a, hei pawh hi ni hnih khat ațanga Galwan Valley region (patrolling points 14, 15) leh Gogra-Hot Springs area-ah te a la ni rih mai, Himalayan region lama inepna chu, a lian zawk chu a la nih cheu avangin helaia inngurna boruak leh puak mai thei tih ziaawm hi hmabak chu a la ni.
India leh Chinese sipaite hian an awm hmun khuarna lam ve veah chuan ralthuam chi hrang leh sipai an chhek tawn nasa hle a, hengte hi " 1 - 2 km vel ve ve" chauhin an inepna ațangin an hnuk kir chauh a la ni.“ People’s Liberation Army (PLA) te hian an sipai motor 20 vel chauh helai ațang hian an tawlh kir tir a. Hei hi a tawk lo hle a, a aia tam zawk fe kir tur an ni a, boruak ti țang tura helaia an awm hmun rawn tawlh sawn hi an ni,” tih thu dawnna chuan a sawi.
PLA sipaite hian May thla bul lamah khan ram ri LAC ah 3 km laiin an awmna hmun pangngai aia thuiin hma an rawn sawn a, sipai 5,000-7,000 vel an dah belh bakah tanks leh artillery guns te an awp chin hma lamah an dah bawk a.
India, hian hetiang boruakah hian ngawi dawh ringawt leh haider mai a tum bik tawh lo, China sipaite tam hneh hle tur leh ralthuam te pawh China ho lo inchhekna lamah a dah ve nghal a ni. Indo thlawhna pawh helai rang taka tuam nghal mai thei turin a chhawp hnaih tawh bakah lei sipai lam pawh helam pui nghal vat thei tur hian an awm bawk.
Kar hmasa Inrinnia sipai hotu pahnih Lt. General level inbiakna khan tlem zawngin inepna hi ti dai deuh mahse, hmabak ko tak chu an inbiak lehna turah hian an la nei tih chu a chiang reng mai. China hian a țhenawm ramte khawmualah leh tuipuiah tun hnai kum engemaw zat liam ta ațang tawh khan kil tinah nek loh a hleih a nei lo a ni ber a, India nena an inkar thu hi India ram indan hlim ațangin engtik lai mahin a țha tak tak thei ngai lo. India nen an inkar ramri hi a tir ațanga kham fel a nih loh avang hian India ram chhung hlep thla țhen zawnga hma lam rawn sawn zel hi a tum a, kum 2013 Manmohan Singh Sorkar tawp dawn hnaih lama India awp chin 640 sq km lai hma a rawn sawn kha India hian a pai dam thei bik lo a, tun țuma hma rawn sawn thar a tum lehna hi chu a hma lama maimichhing san mai ang kha a ni dawn lo tih an hrethiam tawh ngei ang.
Source :
Times of India
June 09, 2020 @ 21:22 IST
====10==06=20==
- Huna Kawlvawm
Post a Comment
He post chungchanga i ngaihdan lo sawi ve rawh: