Bungrua chuh hman lovin in kang ral

Aizawl | June 29, 2020: Tuikhurhlu-ah in luah lai pakhat chu bungrua engmah chuh hman lohin vawiin chawhma dar 10:30 vel khan a kang ral.

He in hi Pu Vanlalthlana in niin assam type building in mal din a ni. Pu Vanlalthlana leh a nupui Pi Liansangi te hian fa pathum mipa hlir an nei a, an fa u ber hi kum 19 mi niin vawiin khan inhlawhin hmun dangah hna a thawk a, an ni nupa hi an huanah hnathawkin an feh thung. An mi lai hi vohbik niin an te ber kum 11 mi nen an chhungte in lamah an leng a, in kan lai hian tumah inah an awm lo a ni.

Pu Vanlalthlana te chhungkua hian Tuirial kamah huan lo ram an neih avangin kum 2009 khan Thingsulthliah atangin tuna an awmna Tuikhurhluah hian an pem thla a, an huanah thlai tiak ursery te siamin tunlai hian teak an kui tiak a, vawiinah teak kui hna thawkin an feh a ni. 

Khawtlang leh kohhrana inhmang tak an ni a, chhungkaw nu ber Pi Liansangi hi MHIP-ah treasurer niin MHIP pawisa a kawl ang angte leh kohhran hmeichhe rawngbawlna buhfaitham pawisa a kawlte pawh a kang fai vek a, an chhungkaw pawisa pawh cheng nuai chuang hret chu a kang niin Pi Liansangi hian a sawi.

With Input from Vana.Lps