By Rev C Kawldinglien Joute
“Hi taka hin khaw hmun nghet ei nei si naw a, khaw la hung um ding chu ei zawng lem a nih”
- (Heb.13:14).
Albert Brumley (1905-1977), Arkansas, USA chun, ‘Hnuoi hi ka in an nawh, kân zinna chau a nih, Ka in ropui a um chungtieng ram mawia khin' tiin hnuoi hi ei khuolzinna ram le ‘ram ṭha nâwk zuol’ (Heb.11:16) beiseitaka thlîrtuhai ngîrhmun hlain a lo siem a. Hi hla hi ka sak hunah Morrison, Africa rama missionary chanchin a mîn hriet suok tir hlak. Vawikhat chu Roosevelt, USA President le Morrison hai chu a ruolin Africa-a inthawkin USA panin an hung a. Roosevelt chu New York Airport-ah a ropui thei angtakin mipuiin banner-ah “Welcome Home, Mr. President” tiin an lo tuok a, parṭhi inawrtirin, motor tamtakin a hnungtieng le a hmatieng an sawm a. Morrison ruok chu chibai bûktu le tuoktu pakhat tak ngiel khawm a neinaw leiin Pathien hmaah a nuor thusim le a lungril natna intlunin, lunghnuol ṭeu pumin intieng chun ân lawi ta a. Chuonga hlim lotaka a um lai chun Lalpa’n a lungrilah hieng hin thu a hung hril ta a. Morrison President Roosevelt chun a ram a tlung ta a. Nang ruok chun *i ram i la tlung lêm. I chatuon ram i hung tlung ni chun President Roosevelt-a lo hmuoktu hai nêka lêt za tam lem in nang an lo hmuok ding che a nih” tiin. Chu nia inthawk chun a nuornahai po po insirin, lawmna mittui leh Pathien kuomah lawmthu a hril lem ta a. Morrison chu America ram New York a tlung niin tlâwm hle sienkhawm a Chatuon In, Vân Jerusalem, hmangaina khawpui a tlung nia a ropui ding zie hi eini ringtuhai chanvo ding khawm a ni ti hre vêng ei tiu.
Khuolzintu chu ân zinna ramah a châm sawng ngai naw a, a khuo tieng a kir nâwk hlak a nih. Khuolzin thiemlo chun a mamaw lo ding thuomhnaw le thil dang tamtak a chawisa hlak a; khuolzin mani insukzângkhai thiemhai chu buoina khawm an tuok tlâwm pha nghe nghe hlak.
Ezra Lekhabu ei tiem chun Israel nauhai kha kum 70 sûng Babylon sala an intâng a, hi hun sûng hi a ram mihai le inthlung zawma an innei pawl leiin, an sal tângnaa inthawk insuo zalên anni hnung khawmin mi tamtak chu Jerusalem tienga kîr nuom lovin an um thu hriet a ni a. Israel nauhai ang in ei mikhuolna rama chênghai leh zaikhata lêngin, an nuom zâwng le ditzâwnghai inchalrempui ve pal ei ti inlau um tak a nih. Chun khawvêl hi ei châm sawngna hmun ding ni âwm fahranin, Vânrama ei chawilûṭ thei lo ding rothil, sum le pai, inhmun, in ropui, thuomhnaw, bûr le bêlhai la khawmin vân tieng râwl ngaisak hman lêk lovin insukbuoi pal ei tih ti hi inlau a um bawk (Matt.6:19). Isu Krista’n hringna a mi pêk chau hi vân khawpui ei lûtpui ding chu a nih.
Khawvêl mi haia inthawk chawimawina le hmingṭhatna hlaw naw inla khawm Vân khawpui ei tlung pha leh “Hienghai hi rinumna nasataka inthawka suok hai kha an nih, an silfênhai Beramte thisena sâwpin an sukvâr ta a” (Thup.7:14) tiin Vân hmunah Hmangaitu Pathien rawiin mihrâng lo fe tahai leh mi lo lâwmlûtin, an mi lo chawimawi ding a nih. Hla siemtu’n “Vân lâwmna kim ka neih theih nan, lei lâwmna hi mîn ṭhiah sak a” a lo ti angin Chanchin Ṭha invâkvaipui leia retheina, hnêngdena, demsietna, muolphona i tuor ngamna chu Lâwmna Lallukhum (I Thes.2:19-20) i hlawna ding a ni lem.
Tirko Paula in “Ka rinumna po pova chun hlimnain ka sip liem a nih” (2 Kor.7:4) a lo ti a. Lawng chu tui a tam po leh ân sang deu deu angin Krista leia rinum le muolphona, tuor tam tam haiin khawvêl in a nei ve lo lawmna chuoi theilo neiin, mikhuolna ramah vân lâwmna kim ei lo intem lâwk thei a nih.
Rethei leiin ei mikhuolna ramah in ropui le inhawiah chêng naw inla khawm rethei nauhai ta dingin chatuon khuo a var pha lungmantam khawpuiah, hmangaina khawpui hluotu ding hai ei nih. Chu khawpui indintu le neitu Lal chu riengvai le retheihai hmangaitu LALPA a nih. Hmangaina khawpuia chun Krista’n a thisena ân tlânsa rethei nauhai chu Iengkim neitu chun hausa le tlai takin mîn um tir a ta, hlimin ei la lâwm ding a nih. Aw a vân hawi âwm ngei!
Unau, nang chu i ram i la tlung lêm i ram i tlung pha chun hmêlma ṭawngsephur leia natna, thina, lusûnna, retheina, hnêngdena, hrilsietna, endawngna, muolphona i tuorhai le khawvêl mihaiin an hrietfûk naw che leia i mithli tlâknahai po chu hrûkfai pêk ni tâng i ta, Vân khawpui tuolzawla Hnêna Lallukhum khumin lâm dêr dêrin chatuonin Lalpa kuomah i chêng lem ding an tah. Chuleiin, mani inphata nitin Kros puta a tâwp chena Krista hnung zuitu eini theina dingin ei hringnun Lalpa kuomah inhlân thar ei tiu.
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: