Mizo nu Lalhming Mawii Wallace Hartley WAD Award hlan

Aizawl | April 30, 2020: World Art Day committee chuan India mi Hmeichhe pathum Wallace Hartley W.A.D Award a hlan zingah Mizo nu Lalhming Mawii a tel.

 

Tun hnai-a UNESCO in Art Movement thar a buatsaih,  World Art Day puala  April 15-a ResiliArt Movement in the midst of Covid -19 Pandemic online project neih zawh takah World Art Day Committee chuan India hmeichhe pathum Lalhming mawii, Sweta Jha leh Dr Neeraj Chanda Peters te hnenah Wallace Hartley World Art Day Award a hlan.

 

He Award hi UNESCO official partner International Association of Art (IAA) India 
International Association of Art (IAA) India in an hlan niin, IAA-India president Manaj Saha chuan a hlan.

IAA India hian UNESCO hnuai ah Art project hrang hrang India ram kilkhawr zawk ah hmasawnna tur in hmachhawp tam tak a nei mek.

He Award dawngtu zinga mi Lalhming Mawii hi April 24 a E-Seminar event ah IAA Turkey President Bedri chuan a lawmpui thu a sawi.

Lalhming Mawii chu tunge?

Pi Amawii hi Mizo hmeichhia zing-ah Solo Exhibition vawi thum nei thei tlemte zinga mi niin, a vawi 4-na buatsaih tum chu hrileng vangin an thulh rih a ni.

A ni hi International, National, regional, NE leh State level Art thiltih hrang hrangah vawi duailo lo tel tawhin, Art lama tui Vohbik-te chawisan kawnga thawhhlawk tak a ni.

Amawii hian kum 2005 khan Art Novelty Gallery  hi Amoii Art Novelty tia bul tanin a kalpui tan a. mahse, a hnu-ah midang tana platform siam tha a tih vangin hming hi Art Novelty Gallery tiin an thlak niin Pi Amoii chuan a sawi.

 

2013 khan  Art Novelty Institute of Art & Craft dinin kum bithliah awm lovin Art lam tui te tan zirna a buatsaih a. Instructor V Laltlanmawia thahnemngaihna vangin  an naupang ten competition lawmman tam tak an hui tawh.

 

Lalhming Mawii Solo Exhibition 3-na  chu Art pawimawh zia hriain Khang hunlaia Mizoram CM Lal Thanhawla chuan  khuallian-a tansakin, painting thahnem tak a leisak bakah tanpuina a lo hlan tawh a ni.

Amawii chuan, "Ram hruaitu mi pawimawh tak tak ten a sawmna an hlawhtlin tir thin avang leh a lemziak ngaihlu tak a promote duhna rilru pu a Mizo mipui leh  Foriegn mi thleng te pawh a leisak thin tu te chung ah a lawm hle a, an ni vanga tun dinhmun hi thleng an nih thu a sawi a. "Pathian tih a beidawng mai lova  beih talh talhin, dawhtheihna, taimakna leh inpumpekna hi hlawhthlingna bul a ni," a ti.

Thalai talent nei thate chawhphurnan leh chawisan nan a theih tawkin buai leh indaih lo chungin a thawk ve thin a. A hmalakna hi Mipui nawloui hmuh thiam loh ni mahse, Art lama tuimite tan chuan a hlutna hai rual a ni lovang.

Amawii chuan, "Mizoram chu leilung hausakna en chuan kan Pachhe ve pawh a ni thei. Mahse, Pathianin themthiamna nasa tak Mizo te a a dah hi kan ram dinchhuahna a tan a pawimawh tak a ni," a ti a, Sawrkar pawhin he lamah hian nasa zualin hma la se a duh thu a sawi bawk.

Amawii hian Indian Council for Cultural Relations (ICCR) kal tlangin Art & Culture deptt nen tangkawpin 2019 khan Aizawl-ah International Exhibition  a lo buatsaih tawh a, 2017 khan AMA bultum  in Aizawl Art Festival a lo buatsaih tawh a, Mizoram State Planning leh mi thahnem ngaite puihna-in 2018 pawh khan Aizawl Art Festival a lo buatsaih tawh bawk a ni.

Chawimawina:
2018 khan 53rd Prestigious SPANDAN Social Creative Award' chu Spandan National Exhibition ah Sikkim Cultural Affairs &Heritage minister Garjaman Gurung chuan a lo hlan tawh.

2017 khan Academy of Art Universe chuan an kum 25-na lawmna pualin, Outstanding contribution in the field of Art & Culture ,an lo hlan tawh.
2007-2008 Young talented Artistes Award  Mizoram dawng hmasa ber zingah a tel a, hei bak ah hian award hrang hrang a dawng nual tawh a ni.