Aizawl | April 17, 2020: Covid 19 avanga jail a khung hmasak ber SP Laldingliana(60) leh a nupui Lalhmahruaii(57) Reiek khua te chu Myanmar atanga ramri an rawn kan avangin ni 14 khung hran hnuah thubuai siamsak an ni a, Champhai District Jail lamah dahthlak an ni.
Mizoram sawrkar thuchhuaha a tarlan danin, Champhai Police chuan Covid-19 hrileng vanga Indo-Myanmar Border khar anih hnua dan lo a ramri kana India ram lo lut mi pahnih, DPRC Quarantine Centre, Keifangtlanga dahte chu an awm hun chhung ni 14 a zawh hnuah natna kai rinhlelhawma an awm lo tih finfiah anih hnuah an man nghal a. District Court-ah hruaiin hemi hnu hian District Jail-ah an dahlut nghal an ni. Passport Act leh 188 IPC dan tlawhchhanin thubuai siamsak an ni.
Heng mi pahnihte hi India khua leh tui nimahse inkharkhipna dan hman anih hnuah dan loin Melbuk khaw ram Tiau kai atangin India ram an lo lut a, Police te’n manin an hriselnate endik anih hnuah Sawrkar siam inkhunghranna hmun Quarantine Centre, DPRC Keifangtlang-ah dah luh an ni a. An laka FIR thehluh anih bawhzuiin, Case IO in Quarantine Centre an awm chhungin tihfel ngaite a lo buaipui a. April Ni 16, 2020 hian Ni 14 chhung Quarantine Centre a dah an nih hnuah an hriselnate endika chhuah an ni a. Police te’n lo man nghalin District Court-ah an hruaia, hemi hnu hian District Jail-ah dahluh an ni.
Mizo Zirlai Pawl (MZP) Sub - Headquarters Reiek chuan thuchhuah siamin an khaw mi kum upate hi ngaihnatthiamna nena ngaihdam an beisei thu an sawi a, sawrkar an ngen bawk.
Mizo Zirlai Pawl Sub - Headquarters Reiek chuan an dinhmun chu pawi an tih thu leh an lainat thu sawiin, Khawtlang leh Kohhran tana mi thahnem ngai mi pawi sawilo, mahni sahimna atana an mahni ram ngei Mizoram a an lo luh hnu pawh a hetiang hremna na tak mai kum 5 - thleng jail - tan theihna an tawk ta mai hi, pawi an tiin an lainat takzet a, Sawrkar hian, ngaihdamna sang tak nen a chhuah zalen turin an ngen a ni.
MZP chuan, "SP Laldingliana te nupa hi Dan ang thlap leh document - felfai tak nei a ramri pel a zin an nilo tih kan pha lo a, amaherawh chu mi pawi sawilo leh, chhungkaw pawimawh an nu lungphun avanga zin an ni a, mahni sahimna leh in lam ngaihtuah a Sawrkar phalna lo a Tiau lui kan an nih avanga Sawrkarin na taka an chunga hremna a lek kawh hi, Covid - 19 avanga kan Sawrkar in jail - tang thahnem tak a ngaihdam ang a an harsatana te hriatthiam pui a ngaidam ve turin kan beisei tlat ani." tiin an thuchhuah chuan a tarlang.
Heng mi 2 te bakah hian dan lo a ramri rawn kan tho mi 3 dangte chu DPRC Quarantine Centre, Keifangtlang-ah hian Quarantine hun chhung hmang tura dah mek an ni a. An chhuah ve leh Police te’n dan angin an chungah action an la dawn a ni. Covid-19 hrileng vangin dan lo a ramri kan leh inkalpawh khap tlat a ni a, tangkhangte pawh mahni awmna hmunah theuh awm tura hriattir kan ni a, thuchhuah pawisa lova ramri kan luite chungah Champhai Police chuan dan angin action a la zel dawn a ni, a ti a.
Champhai District Jail-a dah luh tak Pu SP Laldingliana te nupa buaipuitu an ukil, H. Lalramhluna Champhai hnen atanga thudawn danin Pu SP laldingliana te hi a nu lungphun turin Myanmar ah an kala Mizoram sawrkarin Lockdown hnan niin Tiau lui kamah an nupa hian eitur pawh nei lo in zan an riak a.
A tukah Myanmar tlangval pakhat in tanpuitu hnenah ka hruai ang che u, tiin Melbuk ram hnaih Tiau lui kamah a hruai thleng a thlamah te an riak a, hemi hnu hian ni 14 quarantine tura lakchhoh an ni ta a ni. Nimin 16th April 2020 khan an quarantine hunchhung zo in Reiek lam pan tura motor pawh biak fel vek anih tawh hnuah Police lamin manin court ah hruai an ni a, Champhai District Jail lamah khungthlak anni ta a ni, a ti a.
Kan thudawnna chuan, India khua leh tui Myanmar a tangte lalet tura hmalakna pakhatmah la awm lo ni a langin, Myanmar sawrkar a khawng zel phei chuan thlenna tur nei lo a talbuai tur engemawzat an awm niin a lang a. Home ministry ah dilsak ni ta se, tiau lui kama Quarantine centre ah quarantine nise, a damthate in lamah, a dam thalo te Hospital ah dah theih nise, hei hian luhruk tum venga duty te a chhawk bakah India khua leh tui tangkhang te tana a lawmawm em em dawn a ni, a ti.
Hetih lai hian Champhai Bawrhsap chuan ni 31 March, 2020 khan thuchhuah siamin, "Hrileng laka inven angaih avangin, Myanmar atanga Mizoram India luh hi State sawrkain a phal tawh lo a. Hemi a nih avang hian tumah Myanmar atanga Mizoram luh theih a ni tawh lo.
Luh theih nana India sawrkar dawr buai tawh lo turin mitin kan in hriattir e. Mizo Burma rama awm mekte pawh hrileng vanga inkharkhipna hlih a nih hma loh chuan, Mizoramlo luh tum lo tur leh mahni awmna ngai a lo cham mai turin kan in hriattir a ni. Khawtin in kan rala Mizo hnahthlak khua awm ang angte pawh he thu hi lo hrilh chhawng vek turin kan in ngen e, tiin Champhai Bawrhsap chuan thuchhuah asiam a ni.
Heng mi pahnihte hi Sec 6 Passport Rules 1950 leh Sec 34/Sec 188, IPC bawhchhia a puh niin jail ah khung an ni ta a ni.
MZP Sub - Headquarters Reiek chuan, SP Laldingliana leh a nupui PLalhmahruaii te hi an mahni chhungkaw pawimawh, SP Dingliana nu lungphun hmang turin March 4, 2020 khan Reiek chhuahsan in Thantlang, Myanmar an pan a, SP Dingliana hian lunglam thatlohna a neih avangin Hakha, Myanmar leh Kalimyo, Myanmar damdawiin ah an awm reng a, an tum angin an rawn haw hma theih loh thu an sawi a.
"Covid -19 avangin Prime Minister, Narendra Modi in India ram pumah Lockdown a puan tak avangin Mizoram Sawrkar pawhin zawm in ramri khauh takin a veng chhunzawm nghal a, an tangkhang zui ta ani. In lam a an fa te ngaihtuah avang in Mizoram lo luh theih dan a awm mial takin tiin, Tiau kam (khawmawi) chu 30th March, 2020 khan an rawn thleng thla a, Tiau Lei an rawn kai theih takloh avangin Khawmawi khuaah baihvai takin khawlaiah an riak ta tawp a, a tuk 31th March, 2020 - ah chuan Myanmar Sawrkar lamin ramri a awm an phalloh avangin Mizoram lam a rawn luh an tum leh a, ramri a duty - ten luh an phal bawk siloh avangin an mangang hle mai a, ei leh in leina tur pawisa an neih tawh bawk siloh avangin an mahni sahimna zawngin an buai hle mai a, hetih lai hian Khawmawi (Myanmar) tlangval pakhat chuan lo khawngaih in Tiau lui daikai puiin Melbuk ramah a hruailut ta a, hetia an awm takah chuan Melbuk khaw hruaitu ten lo khawngaih in eitur leh mutbu te pe in Melbuk ram a thlam pakhat ah an riah tir ta a, Champhai District - thu neitu te beng lo thlengin Champhaiah an quarantine ta ani. tiin Ramri kanna tura harsatna an tawh dan leh ramri an kan dan chu MZP chuan an sawi.
Quarantine period (14 days) - alo zawh takah chuan SP Laldingliana te nupa pawhin Reiek khaw lam a an haw theih mai beiseiin an haw na tur motor te pawh an buaipui a, chutih lai mek chuan Champhai District - thuneitu te chuan man in section 6 passport act 1950 - leh section 34 / 188 IPC bawhchhia ah puhin District Jail - Champhaiah an khung ta zawk ani.
MZP chuan, SP Laldingliana te baihvai taka an awm laia lo khawngaih a lo lainat tu te, mimal leh pawl, Khawmawi , Myanmar tlangval , Melbuk khawtlang mipui leh an taksa himna tura Champhai District - thu neitu ten anlo enkawl (quarantine) - avangin lawmthu an sawi bawk.
- H Zate
Founder/Editor
Explore Mizoram
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: