MCO in General Assembly hmang; President thar atan Robert Romawia Royte

Aizawl | Feb 20, 2020: Mizo Cultural Organisation (MCO) chuan vawiin khan Art & Culture Auditorium Berawtlang Aizawl-ah General Assembly vawi 13na leh MCO Silver Jubilee lawmna hun an nei a, Mizoram Assembly speaker Lalrinliana Sailo chuan khuallian niin hun a hmanpui a, Art & Culture director R Hmingthanzuala chu khualzahawm a ni.

Khuallian Mizoram assembly speaker Lalrinliana Sailo chuan, "MCO hi a pawimawh a, Mizo hnam zirang inpui a tih theih hial.  khawvel ram hrang hrang ka zin tawhnaah Miten an culture an humhim zia hi ka hawn a ni a." a ti a.

"CAA kan ti, CAB kan ni, engtin nge khawvel hi a kal zel dawn kan hre lo. Zohnathlak hrang hrang ringtu vek kan ni tlat mai hi, engtik niah emaw chuan kan ram hi mahnia ro inrelin kan la awm mai thei a. Chu hun atan chuan MCO hi in pawimawh em em a, Mizo culture inpui in nihna hi zau zawka lo inhawng ula, Zohnathlak hnam peng hrang hrangte lenna turin ngaihtuahna in sen a ngai a ni," a ti.

Khuallian chuan sawi chhunzawmin, " Zohnahthlak chi peng hrang hrangte culture chawl vul kawngah hma in lak zel a pawimawh a ni. MCO hian rilru zau tak pu a, Zohnahthlak ṭawng hrang hrang hmangte pawh kan unau an nih zia hriaa en hrang lova, kan inpawmtawn thiam a pawimawh a ni,"  ti bawk.

Khualzahawm Mizoram Art & Culture director R Hmingthanzuala chuan, " Mizo kan nihna hi zahpui lovin kan vawng nung reng tur a ni," a ti a. 

Khualzahawm chuan sawi chhunzawmin, "Pathianin Mizote hi nunphung nei turin min siam a, kan hnam zia leg zo nun zemawi te hi vawng nung chho zel a, chhawm nung zel tura hmalak zel hi a pawimawh a ni," a ti bawk.

He hunah hian MCO general headquarters kum 2020 - 22 hruaitu tur thlangin president atan Robert Romawia Royte, Vice president atan John Saikhuma, general secretary atan Lalbiakhlua, secretary atan Lalchhuankima, treasurer atan Lalnuntluangi leh finance secretary atan C Lallawmsanga te an thlang.

MCO kum 25 lawmna pual hian hriatrengna lehkhabu buatsaih a ni a, he lehkhabu hi Khuallian hian a tlangzarh bawk.