ZIRNA UAR

(YMA Kumpuan 2019-2021)

- Lalhmachhuana

“Zirna Uar” tih hi kum 1996, 1997-ah te kumpuanah hman a lo ni tawh a, “Ram leh Hnam Humhalh” kumpuanah thangkhat lian zet kum 14 lai mai kan neih chhungin, chhunglam leh pawn lama min tibuaitu hrang hrangte theihtawp chhuahin kan bei a, kan zo fel ta a. Kan duhtawk ta e kan ti a ni lo, YMA General Conference N. Vanlaiphaia 15-17 October, 2019 a neihah Rorel Palai sang rualte chuan Zirna Uar tih chu lungrual takin kan thlang ta a, ram leh hnam humhalh kan kalpui dan a koki thlak kan duh tih a lang chiang hle. Ruihhlo do a ruihhlo ngaite kan buaipui chhung leh nektu hrang hrangte kan beih chhungin kan ram chhunga hnathawktu lian chu hnamdang an lo ni ta fur a. District thuneitute pawh a ram leilungfa ngei kan tlem ta hle a ni, hei tak mai hi Zirna Uar puan a

lo tul chhan pakhat chu a ni.

Mizo IAS, IPS, All India Service-a tling kan khat ta hle, 2014 kha IAS a Mizo tling an awm hnuhnun ber a ni. IPS-ah phei chuan 1995 daih tawh kha a ni. All India Service/ Central Service a Mizo tling an tam theih nan YMA khawmpui a Agenda kan pass zinga pakhat pawh“All India Service leh Central Service dangah te Zofate a tam thei ang ber kan luh theih nan Central YMA-in mi bikte tanpuia chhawmdawl kawngah theihtawp chhuah rawh se” tih a lo ni ta. Tun dinhmunah IAS Direct-a tling 10 tha chauh Mizo zingah kan awm ta, hun kal tawh lamah chuan 1959 atangin IAS/All India Service-ah Mizo hming hi kum tin a lang ve deuh ziah thin. Kan boruak leh dinhmun mek thlirin tan lak a tul a, khawmpuiah meuh pawh sawichhuah a ni ta hial reng a ni. Zirna Uar kumpuan hian rah tha a rawn chhuah i beisei phawt teh ang.

Hnamdangin kan ram chhungah thawh tur an hmu, kan ramah zirlai thalai kan tan em em a, mahse, thawh tur bulfuk hre lo kan pung lawi si. Eizawnna tlak thiamna, mahni intodelhna tham thiamna kan zir chhuah a, zirna hmanga ram leh hnam humhalh leh siam that hna kan thawh a tul ta hle mai. Zirna tih hian lehkha zir chauh a kawk lova, Formal Education leh Non Formal Education hi a huap vek a ni. Lehkha chauh ni lo, intodelh theihna tur thil kan zirchhuah a, kan talent kan tihpun a tul tawh hle a ni.

Khawvel a changkang zel, hmasawnna a sang zel. Chungte chu tempha ve tur

chuan zirna bawk a pawimawh. Mahni tualzalah pawr hluai lovin, thiamna, finna, remhriatna hmanga inbeihna khawvel hmachhawn thei tura tan lak a hun ta hle. Kum 2001 Census-a Literacy Rate a India rama pahnihna ni thin kha 2011 Census-ah chuan pathumna kan lo ni ta. Zirna lamah kan thlahniam a tih loh theih lovang. Ruihhlo - Drugs etc. a pung a, addict kan pung tual tual, pun dan tha lo lam a ni, Zofate kan harh a hun ta a ni.

Zirna Uar tih hian lehkha zirlai chauh hi a kawk lovang, kan zavaiin kan hma zawn theuh a hmasawnna nei tura intuaihriam kan mamawh vek dawn a ni, hawh u phur takin he kumpuan hi i hmachhawnin i bawhzui ang u.

Zirna uar hlawhtlinna tur chuan kil tinah tanruala tul. Sawrkar pawhin tan a la tih hriat a ni a, Kohhran (Synod)-ah pawh zirna lama tuite tan tanpuina kawng a inhawng zel.

YMA-in rampumah hma a la bawk anga, a tul a nih chuan naupang zan len khapte, zirlai zinga tho hma tura Information mike atanga auh thawhte, mahni area theuh a zirna in leh a thawktute dinhmunte a en a, chhawmdawl an ngaihna lai a piangah a theih dan leh remchan dan angin YMA chuan ke a pen dawn a ni. Hetihlai hian, zirlaite u tin tur in nei ve. Engkimah a remchan dan a puih che u kan inhuam lai hian tih takzet a tumruhna leh huaisenna nen Mizoram leh hnam tana lehkha zir a tan in lak ve a tula ni. Chutihrualin zirtirtute pawhin theihtawp kan chhuah a tul dawn. Kan hma zawnah step khat tala hmasawnna nei tura tan lak a tul hle mai.

Nu leh pate pawh kan bang chuang lo, zanah fate uap hman lek lova chhuah rualte pawh insum a tul dawn. Tunlaiah mitin mai hi programme-in kan khat vek mai a, kan rohlu fate tan kan programme neih sa tih tlem leh programme siam tlem pawh zir a tul ta hle a ni.

Sawrkar pawhin kalphung a neih sa pawh a tul a nih chuan zirna kawnga hma kan sawn theihna tur a nih dawn phawt chuan a her rem a la tul ang. Kan kalphung neih mek hian state dangte a el pha lo a nih chuan state dangte el pha tura ruahmanna siamte pawh a tul ngei ang.

Zirna uar hlawhtlinna tur chuan sawrkar, YMA, khawtlang, kohhran, nu leh pa leh zirlai ten kan tih tur theuh kan tih a, change siam tura tan kan lak a ngai a, chumi tlingkhawm leh thawhhona chuan Mizo thalaite tidanglamin ram leh hnam hmel a lo danglam anga, thiamna, finna, remhriatna hmangin ram leh hnam hi awmze nei zawkin kan humhalh ngei ang.

YMA vul zel rawh se.

Note: Central YMA Kumpuan, ‘Zirna Uar’ hawn Programme, Vanapa Hall-a Dt 20.1.2020 zana Kumpuan Chairman, Tv. Lalhmachhuana, Vice President CYMA thusawi a ni.