"Vawiin Kawnpui khawtlangin ka hlawhtlinna min lawmpui a, phu loh chawimawina min hlan hi ka thinlungah ka vawng reng ang a, ka thihni thleng pawhin ka theihnghilh lo ang."
~ Marina Lalramnghaki
Kawnpui | December 14, 2019: India Hmeichhe Hockey Junior team a Mizo tel pahnih zinga pakhat Marina Lalramnghaki chu vawiin khan Kawnpui khawtlangin ropui taka hmuah a ni.
Kawnpui khawtlang Joint VC leh NGO te huaihawta Marina Lalramnghaki hmuahna hi India Hmeichhe Hockey Senior team member, Mizoram Fanu rangkachak Lalremsiami chuan a hmunah kalin a ṭawiawm bawk.
Marina hmuahnaah hian mipui an tamin Kawnpui fanu chhuanawm hmuak tur hian Mipui an phur hle a ni.
Marina Lalramnghaki hi Kawnpui vengthar/dinthar venga awm niin, Pahlira (L) fanu a ni.
Three-Nations Tourna-ment khelh zawh taka India Hmeichhe Hockey Junior team a Mizo hmeichhe pahnih kohte Hnahthial khaw nula Lalrindiki leh Kawnpui Khaw nula Marina Lalramnghaki te hi an khel ṭha hle a ni.
He tournament ah hian Australia, India leh New Zealand te an inkhel a, vawi hnih ṭheuh an in tum kual a ni.
Kawnpui fanu chhuanawm Marina chuan, "Vawiin Kawnpui khawtlangin ka hlawhtlinna min lawmpui a, phu loh chawimawina min hlan hi ka thinlungah ka vawng reng ang a, ka thihni thleng pawhin ka theihnghilh lo ang." tia a lawmzia a sawi.
Marina hi Sairang pengah hmuakin, a lawmna hun hi VC III Complex/Awithangpa Hall kawtah hmangin Kawnpui Jt. VC chairman K Lalhmachhuana chuan kaihruaiin, Pastor PC Laltlankima, UPC NEI, Kawnpui Bial in hunserh a hmang a. Kawnpui SDO (C) Lalhruaitluangi, Kawnpui VC III president H Lalfakzuala leh Kawnpui Hockey Association president C Vanlalvena ten thusawiin, Lalnunziri'n mipui zaiin a awi.
He hunah hian chawimawina hlan a nih bakah pawl hrang hrang aṭangin thilpek hlan a ni bawk.
- With inputs from J Partei Ralte
Post a Comment
He post chungchanga i ngaihdan lo sawi ve rawh: