Aizawl | October 1, 2019: Naktuk Oct 2, Nilaini hi North East India UPC Kohhran thalai pawl Pentecostal Youth Department (PYD) Social Work Day a ni a, India hmarchhak pum huapa hman a ni ang.
Pentecost Kohhran thlai pawl rorelna sang; General PYD Conference rorelna chuan Kum 1999 khan Social Work Day neih nise tiin a pass a, Kum 2000 atang khan hman tan nghal niin kum tin Oct ni 2-hi India hmarchhak pum huapin Vantlang tana hna tha thawhna ni atana hman chhoh a lo ni ta a ni.
Social work day ah hian thinsen pek, Damdawiina damlo tana ei tur sem, Vantlang hmun pawimawh Community hall, Damdawi in leh sub center tih fai, Vantlang inthiarna tur siam leh tihfai, khawlai thenfai leh tuiluankawr tihfai bakah thungphun hnatlang te neih thin a ni a. Aizawl leh Lunglei khawpui chhung bikah chuan sawrkar hotu lian te nena thawk hova, an mamawh anga hna thawh chang a awm bawk.
Kumin hian Aizawl City PYD chuan Save Chite Lui Co Ordination Committee (SCLCC) te nena ruahmanna siam hovin Chite lui tifaiin PYD te an hnatlang dawn a. Chawhma dar 10:00 ah Chite Mini Sports Complex-ah Evan. Vanlalpeka Fanai chuan hunserh hmangin, Save Chite Lui Co Ordination Committee (SCLCC) Joint Secretary Dr. H. Lalruatsanga'n thu tawi a sawi ang a, Pu Robert Romawia Royte, Hon'ble Minister of State chuan hnatlang hawnna a nei ang.
Lunglei khawpui chhungah chuan thalaiten Sobji Bazar tihfai hna bakah, Lunglei khawpui chhunga Damdawiinah thingpui leh a hmeh semin an fehchhuak dawn a. Siaha khawpui chhungah chuan thalai ten thisen an pe ang a, Kolasib, Serchhip leh hmun dang dangah pawh a khawpui huapa hman engemaw zat an awm bawk. Thingtlang lam bial tamzawk chuan khawchhung thenfai, vantlang hmun hma chei that leh tihfai hna an thawk dawn a ni.
General PYD Presiden Pastor H. Lalropuia chuan he ni hi tha leh tangkai thei ang bera hmang tur leh khua leh tui tana mi tangkai leh chhenfakawm ni zel turin PYD te duhsakna chibai a hlan a ni.
Post a Comment
He post chungchanga i ngaihdan lo sawi ve rawh: